မန်စီးတီးနည်းပြ ပက်ဂွါဒီယိုလာက ခရစ္စတယ်ပဲလေ့စ်ကို အက်ဖ်အေဖလား ဗိုလ်လုပွဲရှုံးနိမ့်မှုမှာ အိုမာမာမွတ်ရှ်က အရေးပါတဲ့ ပင်နယ်တီကို ကန်သွင်းဖို့ ဆုံးဖြတ်ချက်ကို ကွင်းထဲက ကစားသမားတွေကပဲ ချမှတ်ခဲ့တာဖြစ်ပြီး သူကတော့ အာလင်းဟာလန်းကန်လိမ့်မယ်လို့ မျှော်လင့်ထားခဲ့ကြောင်း ပြောကြားလိုက်ပါတယ်။

မနေ့ညက ဝင်ဘာလေကွင်းမှာ စီးတီးအသင်းက ၁-၀ နဲ့ ရှုံးနိမ့်နေချိန် တိုင်ရစ်မစ်ချယ်လ်က ဧရိယာထဲ ဘာနာဒိုဆေးလ်ဗားကို ဖျက်ထုတ်ပုံကြမ်းခဲ့လို့ ပင်နယ်တီရရှိခဲ့ပါတယ်။ ဟာလန်းက ဘောလုံးကို အစပိုင်းမှာ ကိုင်ထားခဲ့ပြီး မာမွတ်ရှ်ကို ပေးခဲ့ရာမှာ မာမွတ်ရှ်ရဲ့ ကန်ချက်ကို ခရစ္စတယ်ပဲလေ့စ်ဂိုးသမား ဒင်းဟန်ဒါဆန်က ကာကွယ်နိုင်ခဲ့ပါတယ်။

ပင်နယ်တီကန်သမားနဲ့ပတ်သက်ပြီး မေးမြန်းရာမှာ ဂွါဒီယိုလာက "သူတို့ ကွင်းထဲမှာ ဆုံးဖြတ်ခဲ့တာပါ။ ကျွန်တော်မသိပါဘူး။ သူတို့နဲ့ စကားမပြောခဲ့ပါဘူး။ သူ (ဟာလန်း) က ကန်ချင်လိမ့်မယ်လို့ ကျွန်တော်ထင်ခဲ့တယ်။ ဒါတွေက သူတို့အတွက်ပါ။ အလွတ်တည်ကန်ဘော၊ ပင်နယ်တီအတွက် အဲဒီအချိန်မှာ သူတို့ရဲ့ ခံစားချက်နဲ့ သူတို့ ဘယ်လိုခံစားရလဲဆိုတာပါပဲ။ သူတို့က အိုမာကန်ဖို့ အသင့်ဖြစ်နေပြီလို့ ဆုံးဖြတ်ခဲ့တယ်။ ဟန်ဒါဆန်က ကောင်းကောင်းကာကွယ်နိုင်ခဲ့တယ်" လို့ ပြောကြားခဲ့ပါတယ်။

BBC မှာ ပြောကြားခဲ့တဲ့ အင်္ဂလန်နဲ့ မန်ချက်စတာယူနိုက်တက် တိုက်စစ်မှူးဟောင်း ဝိန်းရွန်နီက ဟာလန်းလို ကစားသမားတစ်ယောက်အနေနဲ့ ပင်နယ်တီအခွင့်အရေးကို လက်လွှတ်လိုက်တာက ထူးဆန်းတယ်လို့ ဆိုပါတယ်။ "အာလင်းဟာလန်းက ကမ္ဘာ့အဆင့် တိုက်စစ်မှူးတစ်ယောက်ပါ၊ ဒါပေမဲ့ လီယွန်နယ်မက်ဆီနဲ့ ခရစ္စတီယာနိုရော်နယ်ဒိုတို့အကြောင်း ပြောရရင် သူတို့က အဲဒီဘောလုံးကို ဘယ်တော့မှ ပေးမှာမဟုတ်ဘူး။ ဒါက အဲဒီကစားသမားနှစ်ယောက်ကို အာလင်း ဟာလန်း ဒါမှမဟုတ် ကီလီယန် အမ်ဘာပေနဲ့ ဒီကစားသမားတွေဆီကနေ ခွဲခြားထားတာပါပဲ။ သူတို့က တစ်ကိုယ်ကောင်းဆန်ပြီး ပွဲတိုင်းမှာ ဂိုးသွင်းချင်ကြတယ်။ သူ (ဟာလန်း) အခွင့်အရေးတွေ လွဲချော်တဲ့အခါ သူ့အပေါ် သက်ရောက်မှုရှိတာကို တွေ့နိုင်ပြီး ဒါက သူ့ကို တကယ်ကို သက်ရောက်မှုရှိပါတယ်။ ဝင်ဘလေကွင်းမှာ ပင်နယ်တီကန်ရမယ့်အတွေးက သူ့အတွက် အရမ်းများနေတာမျိုးလည်း ဖြစ်နိုင်ပါတယ်။ ဘယ်သူသိနိုင်မလဲ၊ သူလည်း လူသားတစ်ယောက်ပဲလေ။"လို့ ရွန်နီက ပြောပါတယ်။

ဒီပွဲစဉ်မှာ ခရစ္စတယ်ပဲလေ့စ်ဂိုးသမား ဒင်းဟန်ဒါဆန်နဲ့ပတ်သက်ပြီး အငြင်းပွားစရာဖြစ်ခဲ့ပြီး သူဟာ ဟာလန်းကို တားဆီးရင်း ပင်နယ်တီဧရိယာအပြင်ဘက်မှာ ဘောလုံးကို လက်နဲ့ထိခဲ့ပုံပေါ်ခဲ့ပါတယ်။  ဒီဖြစ်စဉ်ကို VAR က ပြန်လည်စစ်ဆေးခဲ့ပေမယ့် အနီကတ်မပြခဲ့ပါဘူး။ ဂွါဒီယိုလာက VAR ဆုံးဖြတ်ချက်နဲ့ပတ်သက်ပြီး "VAR နဲ့ ဒိုင်ကို မေးပါ" လို့ ပြောကာ မှတ်ချက်ပေးဖို့ ငြင်းဆိုခဲ့ပါတယ်။

ပွဲအပြီးမှာတော့ ဂွါဒီယိုလာနဲ့ ဟန်ဒါဆန်တို့ ကွင်းထဲမှာ ခေတ္တစကားပြောခဲ့ကြပြီး စီးတီးနည်းပြက ဂိုးသမားကို အချိန်ဆွဲတယ်လို့ ယူဆပြီး ပြစ်တင်ပြောဆိုခဲ့ပုံပေါ်ပါတယ်။  ဂွါဒီယိုလာက ဒီဖြစ်စဉ်ကို အရေးမကြီးသလို ပြောကြားခဲ့ပြီး "သူက သူ့ရဲ့ရပ်တည်ချက်ကို ခုခံကာကွယ်ခဲ့တယ်၊ ကျွန်တော်တို့က ကျွန်တော်တို့ရဲ့ရပ်တည်ချက်ကို ခုခံကာကွယ်ခဲ့တယ်။ လူတိုင်းက သူတို့လုပ်ချင်တာကို လုပ်နိုင်တယ်။ ကျွန်တော်တို့က ဂိုးတွေသွင်းရမှာ။ ဟန်ဒါဆင်နဲ့ ပဲလေ့စ်ကို ဂုဏ်ပြုပါတယ်၊ ဘာလို့လဲဆိုတော့ သူတို့က တကယ်ကို ကောင်းကောင်းခုခံကာကွယ်ခဲ့ပြီး ကျွန်တော်တို့က ဂိုးမသွင်းနိုင်ခဲ့လို့ပါ" လို့ ပြောကြားခဲ့ပါတယ်။