နေးရှင်းလိဂ်ထိပ်တန်းအဆင့်မှတန်းဆင်းရမယ့်အန္တရာယ်ကို ရှောင်လွှဲနိုင်ခဲ့ပြီးနောက် ဘယ်လ်ဂျီယံရဲ့ အနာဂတ်အောင်မြင်မှုအတွက် အုတ်မြစ်ချထားနိုင်ခဲ့ပြီလို့ ရူဒီဂါစီယာက ယုံကြည်နေပါတယ်။ နေးရှင်းလိဂ်တန်းဆင်း/တန်းတက် Play-Off အဖြစ် ဘယ်လ်ဂျီယံက ပြီးခဲ့တဲ့ကြာသပတေးနေ့၊ ပထမအကျော့မှာ ယူကရိန်းကို ၃-၁ ဂိုးဖြင့် အရှက်တကွဲရှုံးနိမ့်ခဲ့ပါတယ်။

ဒါပေမယ့် သူတို့တွေက တနင်္ဂနွေနေ့၊ ဒုတိယအကျော့ပွဲစဉ်ရဲ့ ပွဲချိန်နောက်ဆုံးမိနစ်၂၀ အတွင်း သုံးဂိုးအထိ သွင်းယူပြီး နှစ်ကျော့ပေါင်းရလဒ် ၄-၃ ဂိုးဖြင့် လိဂ်(A) မှ လိဂ်(B)ဆီ တန်းဆင်းသွားရနိုင်တဲ့အရေးကို လက်မတင်လေးရှောင်လွှဲနိုင်ခဲ့ပါတယ်။

ပွဲချိန်မိနစ် ၇၀ မှာ လူနင်စောင့်ကြပ်နေတဲ့ ဂိုးပေါက်ဆီ မက်ဇင်ဒီပိုင်ပါက ပထမဆုံးကန်သွင်းချက်မှတဆင့် အဖွင့်ဂိုးရယူခဲ့သလို လူကာကူကလည်း ဒီဘရိုင်းရဲ့ဖန်တီးပေးမှုမှတဆင့် မြေမကျဂိုးကန်သွင်းမှုအပါအဝင် အဆုံးအဖြတ်သွင်းဂိုးနှစ်ဂိုးကို သွင်းယူခဲ့ပါတယ်။

ပြီးခဲ့တဲ့ဇန်နဝါရီလအတွင်း တိုဒက်ဆိုနေရာမှာ အစားထိုးတာဝန်ယူခဲ့တဲ့ နည်းပြသစ်ရူဒီဂါစီယာကတော့ ဘယ်လ်ဂျီယံအတွက် ခရီးစဉ်သစ်စတင်ဖို့ အခြေတည်နိုင်ခဲ့ပြီလို့ မျှော်လင့်ယုံကြည်နေပါတယ်။ ပထမအကျော့ရှုံးနိမ့်မှုနဲ့ပတ်သက်လို့ ဂါစီယာက “ ဒါက စိတ်ဓါတ်ပိုင်းဆိုင်ရာပြဿနာတစ်ရပ်မဟုတ်ဘဲ ယုံကြည်မှုနဲ့သက်ဆိုင်တဲ့ ပြဿနာတစ်ရပ် ဖြစ်ပါတယ်။

အသင်းလိုက်မှာရော၊ တစ်ဦးချင်အပိုင်းမှာပါ အရည်အသွေးရှိတဲ့ကစားသမားတွေဖြစ်တယ်လို့ ရှင်းပြရင်း သူတို့တွေအတွက် ယုံကြည်မှုကို ဖန်တီးပေးခဲ့ပါတယ်။ ကျွန်တော်ကိုယ်တိုင်လည်း ဒတ်ချ်ဘာသာစကားကို အနည်းအကျဉ်းလိုက်စားဖူးပါတယ်။ အခုလိုအခြေအနေမျိုးကို ဒတ်ချ်တွေက အဝတ်လဲခန်းတွေမှာ ‘ငါတို့တွေ လုပ်နိုင်ခဲ့ပြီ’ လို့ ပြောကြပါတယ်။ အခုတော့ ကောင်းမွန်တဲ့အခြေခံအုတ်မြစ်တစ်ခုကို ချမှတ်နိုင်ခဲ့ပါပြီ။

ကျွန်တော်တို့ရည်မှန်းချက်နဲ့တော့ ဝေးနိုင်သေးတယ်လို့ ထင်ပါတယ်။ အခုအချိန်မှာ ကျွန်တော်တို့က ကမ္ဘာ့ဖလားခြေစစ်ပွဲစဉ်တွေ စတင်ကစားရဖို့ရှိနေလို့ ပွဲတိုင်းကို အနိုင်ရရှိအောင် ကြိုးစားသွားရပါမယ်။ ဒါမှသာ ၂၀၂၆ ခုနှစ်၊ မတ်လအတွင်း ကျင်းပဖို့စီစဉ်ထားတဲ့ Play-off ပွဲစဉ်တွေကို ကျွန်တော်တို့ ရှောင်ရှားနိုင်ပါမယ်”လို့ ပြောပါတယ်။

လတ်တလောမှာ တိုက်စစ်မှူးလူကာကူက ဘယ်လ်ဂျီယံအတွက် ၁၂၂ ပွဲကစား၊ ၈၈ ဂိုးအထိ သွင်းယူပေးထားပြီး ဒီဘရိုင်းကလည်း နိုင်ငံ့လက်ရွေးစင်အဆင့်နောက်ဆုံးသုံးပွဲမှာ ဂိုးပါဝင်ပတ်သက်မှုသုံးကြိမ် (နှစ်ဂိုးသွင်း၊ တစ်ဂိုးဖန်တီး) ရရှိအောင် စွမ်းဆောင်ထားနိုင်ပါတယ်။

ဒီကစားသမားနှစ်ဦးနဲ့ပတ်သက်လို့ ဂါစီယာက “ ဒီဘရိုင်း၊ လူကာကူတို့ရဲ့အရည်အသွေးကို လူတိုင်း သိကြပါတယ်။ သူတို့က အသင်းအတွက် ဦးဆောင်သူတွေ ဖြစ်ပါတယ်။ ဒီနေ့မှာဆိုရင်လည်း သူတို့နှစ်ဦးလုံးက သက်ဆိုင်ရာအခန်းကဏ္ဍအလိုက် အကောင်းဆုံးပါဝင်ကစားခဲ့ပါတယ်။ လူတိုင်းလည်း အရမ်းကောင်းခဲ့ပါတယ်။ ဒိုကူဆိုရင် ပြိုင်ဘက်ဂိုးဧရိယာထဲမှာ အန္တရာယ်ပေးနိုင်သူဆိုတာကို သေသေချာချာလုပ်သွားခဲ့ပါတယ်။

ကျွန်တော်တို့အသင်းရဲ့ဦးဆောင်သူတွေအတွက်သာမက လူတိုင်းရဲ့အောင်မြင်မှုဖြစ်နေလို့ အထူးအလေးထားရပါမယ်။ ဒါပေမယ့် အသင်းဦးဆောင်သူတွေကလည်း သက်ဆိုင်တဲ့အခန်းကဏ္ဍအလိုက် တာဝန်ယူပေးကြလို့ ဒါက နည်းပြတစ်ဦးအတွက် အလွန်အရေးကြီးပါတယ်”လို့ ပြောပါတယ်။