ယခုတစ်ခေါက် နိုင်ငံတကာပွဲစဉ်တွေကျင်းပချိန်အတွင်း နေရှင်းလိဂ်ကွာတားဖိုင်နယ်အဆင့်မှာ စပိန်အသင်းနဲ့ရင်ဆိုင်သွားရမယ့် နယ်သာလန်နည်းပြ ရော်နယ်ကိုးမန်းက စပိန်တောင်ပံကစားသမားလေး လာမိုင်းယာမယ်လ်ကို ချီးကျူးပြောဆိုမှုတွေပြုလုပ်ခဲ့ပြီး အသက်-၁၇ နှစ်အရွယ်ကစားသမားဟာ လီယွန်နယ်မက်ဆီလိုပဲ ဘာစီလိုနာအတွက် အလွန်အရေးပါတဲ့ကစားသမားဖြစ်လာမယ်လို့ ပြောကြားခဲ့ပါတယ်။ 

ရော်နယ်ကိုးမန်းဟာ တစ်ချိန်က ဘာစီလိုနာကိုကိုင်တွယ်ခဲ့ဖူးသူဖြစ်ပြီး ယခုအခါမှာတော့ စပိန်လက်ရွေးစင်တွေဖြစ်နေကြတဲ့ သူ့ရဲ့ကစားသမားဟောင်းအချို့နဲ့ ပြန်လည်တွေ့ဆုံသွားတော့မှာဖြစ်ပါတယ်။ သို့သော်လည်း ကိုးမန်းဟာ သူ့လက်ထက်မှာ ယာမယ်လ်ကိုတော့ ကိုင်တွယ်ခွင့်မရခဲ့ပါဘူး။ ပါရမီရှင်လူငယ်ကစားသမားဟာ ကိုးမန်းနေရာကိုဆက်ခံခဲ့တဲ့ ဇာဗီဟာနန်ဒက်ဇ်ရဲ့လက်အောက်မှာ စတင်ပွဲထွက်ခွင့်ရခဲ့တာဖြစ်ပြီး ထိုစဉ်က အသက်-၁၅ နှစ်အရွယ်သာရှိပါသေးပါတယ်။ 

ယခုအခါမှာ ယာမယ်လ်နဲ့ပတ်သက်ပြီး မေးမြန်းမှုပြုလုပ်ခဲ့ရာ ကိုးမန်းက "လာမိုင်းယာမယ်လ်လိုကစားသမားမျိုးကို ကိုင်တွယ်ခွင့်ရတာက နည်းပြတစ်ယောက်အတွက် အရမ်းကံကောင်းပါတယ်။ ဘာကြောင့်လဲဆို‌တော့ သူ့ရဲ့အရည်အသွေးက ပွဲစဉ်တစ်ပွဲကို အဆုံးအဖြတ်ပေးနိုင်လို့ပါ။ ကျွန်တော် မက်ဆီနဲ့လက်တွဲဖို့အခွင့်အရေးရခဲ့ပါတယ်။ ယာမယ်လ်အနေနဲ့လည်း မက်ဆီလိုပဲ ဘာစီလိုနာအတွက် အရမ်းအရေးပါတဲ့ ကစားသမားတစ်ယောက်ဖြစ်လာမယ်လို့ မျှော်လင့်ပါတယ်" လို့ပြောကြားခဲ့ပါတယ်။ 

ဆက်လက်ပြီး ဘာစီလိုနာမှာလက်တွဲခဲ့ဖူးတဲ့ ပီဒရီ၊ ဂါဗီနဲ့ အလီဂျန်ဒရိုဘယ်လ်ဒီတို့နဲ့ပတ်သက်ပြီး မေးမြန်းမှုပြုလုပ်ခဲ့ရာမှာ ကိုးမန်းက "ဒီလိုကစားသမားတွေကို ကျွန်တော်ပြုစုပျိုးထောင်နိုင်ခဲ့လို့ အရမ်းဝမ်းသာရပါတယ်။ ဒါပေမယ့် ဒါက သူတို့ရဲ့အရည်အချင်းကြောင့်ပါပဲ။ သူတို့နဲ့ပြန်တွေ့ရမှာ အရမ်းကောင်းပါတယ်။ ဒါကြောင့် မနက်ဖြစ်ပွဲက ကျွန်တော့်အတွက် ထူးရှယ်ပွဲတစ်ပွဲဖြစ်လာမှာပါ" လို့ပြောကြားခဲ့ပါတယ်။ 

ကိုးမန်းလက်ထက်မှာ ဘာစီလိုနာဟာ အောင်မြင်မှုရဖို့ရုန်းကန်ခဲ့ရသလို၊ ဇာဗီလက်ထက်မှာလည်း လာလီဂါဖလားတစ်လုံးသာ ဆွတ်ခူးနိုင်ခဲ့တာဖြစ်ပါတယ်။သို့သော်လည်း ကိုးမန်းနဲ့ ဇာဗီတို့ဟာ ဘာစီလိုနာရဲ့ လူငယ်ကြယ်ပွင့်ကစားသမားလေးတွေကို ပြုစုပျိုးထောင် စင်တင်ပေးနိုင်ခဲ့သူတွေဖြစ်ပြီး လက်ရှိအချိန်မှာတော့ အဆိုပါကစားသမားလေးတွေကို ဟန်ဆီဖလစ်က သက်တောင့်သက်သာအသုံးချထားနိုင်ပါတယ်။