ဗလန်စီယာမြို့မှာကစားရမယ့် ဒုတိယအကျော့ပွဲစဉ်မတိုင်ခင် နယ်သာလန်နဲ့ရင်ဆိုင်နေရတဲ့ စပိန်အသင်းရဲ့ နေးရှင်းလိဂ်ကွာတားဖိုင်နယ်ယှဉ်ပြိုင်မှုက နောက်ကျချေပဂိုးနဲ့အတူ အဆင်ပြေပြေအဆုံးသတ်ခဲ့ပါတယ်။ ဒီနေ့မနက်ပိုင်း၊ ပထမအကျော့သရေပွဲစဉ်အပြီး စပိန်နည်းပြဒီလာဖွန်တေက နေးရှင်းလိဂ်ပြိုင်ပွဲရဲ့ ကွာတားဖိုင်နယ်အဆင့်မှာ နယ်သာလန်အသင်းကို အနိုင်ယူဖို့ဆိုတာ ခက်ခဲပါလိမ့်မယ်လို့ ပြောခဲ့ပါတယ်။

အခုပထမအကျော့ပွဲစဉ်ရဲ့ပွဲချိန်မိနစ်အစောပိုင်းမှာပဲ နီကိုဝီလျံစ်က စပိန်အသင်းအတွက် ဦးဆောင်ဂိုးသွင်းယူပေးခဲ့ပေမယ့် ဂတ်ပိုနဲ့ ရိန်းဒါစ်တို့က နယ်သာလန်အတွက် ချေပဂိုးနဲ့ ဦးဆောင်ဂိုး အသီးသီးသွင်းယူခဲ့ပါတယ်။ ဒါပေမယ့် ပွဲချိန်နှောင်းပိုင်း ဟာတိုထုတ်ပယ်ခဲ့ရမှုနဲ့အတူ ဂိုးသမားဗာဗရက်ဂန်ရဲ့အမှားတစ်ခုကို မီရီနိုက အကောင်းဆုံးအသုံးချကာ ဗလန်စီယာမြို့ဒုတိယအကျော့ပွဲစဉ်မတိုင်ခင် စပိန်အသင်းအတွက် အပြုသဘောဆောင်တဲ့ရလဒ်တစ်ခု ဖန်တီးခဲ့ပါတယ်။အခုပွဲစဉ်ရလဒ်ပိုင်းနဲ့အတူ စပိန်အသင်းက ပြိုင်ပွဲစုံနောက်ဆုံး ၁၇ ပွဲဆက်ရှုံးပွဲမရှိမှတ်တမ်းကို ပိုင်ဆိုင်ခဲ့ပြီး ၂၀၁၈ ခုနှစ်၊ စက်တင်ဘာလနောက်ပိုင်း အကောင်းဆုံးစွမ်းဆောင်နိုင်မှု ဖြစ်လာခဲ့ပါတယ်။

တဖက်မှာလည်း နယ်သာလန်က စပိန်ကို နောက်ဆုံးလေးပွဲဆက်ရှုံးပွဲမရှိ(နှစ်ပွဲနိုင်၊နှစ်ပွဲသရေ)ဆိုတဲ့ရလဒ်နဲ့ အသာစီးရရှိအောင် ဖန်တီးလာနိုင်ခဲ့ပါတယ်။ ဒီလာဖွန်တေကတော့ ဆီမီးဖိုင်နယ်တက်ရောက်နိုင်ရေးအတွက် သူ့အသင်းကစားသမားတွေရင်ဆိုင်ရမယ့် စိန်ခေါ်မှုအရွယ်အစားကို အသိအမှတ်ပြုလာခဲ့ပါတယ်။

ဒီလာဖွန်တေက “နယ်သာလန်လိုအသင်းတစ်ခုကို အနိုင်ယူဖို့ဆိုတာ အလွန်ခက်ခဲလွန်းပါတယ်။ အခုပွဲစဉ်ကလည်း ကြိုတင်စီမံထားသလိုပဲ အလှည့်အပြောင်းများစွာရှိခဲ့တဲ့ပွဲစဉ်တစ်ခု ဖြစ်ခဲ့ပါတယ်။ အသေးစိတ်အချက်အလက်တွေမှစပြီး ဖြေရှင်းပေးသွားရမယ်ဆိုတာ သိထားပြီးကြပါပြီ။ သူတို့တွေက အလွန်အားကောင်းတဲ့အသင်းတစ်ခုပါ။ လေးလလောက်အဆက်ပြတ်ပြီးနောက် အခုလိုပြိုင်ဘက်ကောင်းနဲ့ ရင်ဆိုင်ရချိန်မှာတောင် အခုလိုရလဒ်မျိုးရယူနိုင်လို့ ကျွန်တော်တို့ အလွန်ကျေနပ်မိပါတယ်။

သူတို့အတွက် တတိယမြောက်ဂိုး ရရှိသွားနိုင်သလို ကျွန်တော်တို့လည်း မိုရာတာခေါင်းတိုက်ချက်နဲ့ ဒုတိယမြောက်ဂိုးရရှိဖို့ နီးစပ်ခဲ့ပါတယ်။ ဗလန်စီယာမှာကစားရမယ့်ပွဲစဉ်မှာလည်း အနိုင်ရရှိဖို့ဆိုတာ ကျွန်တော်တို့အတွက် အရမ်းခက်ခဲပါလိမ့်မယ်။ ဒါကို ကျွန်တော် သံသယမရှိပါဘူး”လို့ ပြောပါတယ်။