ရွှေ့ဆိုင်းထားခဲ့တဲ့ ဘာစီလိုနာနဲ့ အိုဆာဆူနာတို့ရဲ့လာလီဂါပွဲစဉ်ကို လာမယ့်သောကြာနေ့မှာ ပြန်လည်ကစားသွားမှာဖြစ်ပြီး စပိန်လက်ရွေးစင်အသင်းအတွက် ကစားပေးနေတဲ့ ပီဒရီက သူ့အနေနဲ့ လက်ရွေးစင်အသင်းအတွက်ပါဝင်ကစားပေးရင်း ပွဲပန်းနေကြောင်း ဝန်ခံပြောကြားလာခဲ့ပါတယ်။ 

နိုင်ငံ့လက်ရွေးစင်အသင်းတွေအတွက် ပါဝင်ကစားပေးနေရတဲ့ ဘာစီလိုနာရဲ့ကြယ်ပွင့်ကစားသမားအများစုဟာ ၄၈ နာရီထက်နည်းတဲ့နားချိန်သာ ရရှိသွားမှာဖြစ်ပြီး အိုဆာဆူနာနဲ့ပွဲစဉ်ကို ကစားသွားရမှာဖြစ်ပါတယ်။ ပီဒရီကတော့ နားချိန်အပြည့်အဝရရှိသွားမှာဖြစ်ပေမယ့် ယခုအခါမှာကစားသမားက နယ်သာလန်နဲ့ပွဲစဉ်အပြီးမှာ ပွဲပန်းတဲ့ဒဏ်ကို ခံစားနေရကြောင်း ဝန်ခံပြောကြားလာခဲ့ပါတယ်။ 

စပိန်နဲ့နယ်သာလန်တို့ဟာ ၃-၃ နဲ့သရေကျပြီး အနိုင်အရှုံးမပြတ်သားခဲ့တာကြောင့် အချိန်ပိုနဲ့ ပင်နယ်တီတွေဆက်လက်ယှဉ်ပြိုင်ခဲ့ရတာဖြစ်ပြီး စပိန်အသင်းအတွက် ဘာစီလိုနာကစားသမားတွေဖြစ်တဲ့ ဖာရန်းတောရက်စ်၊ ပီဒရီ၊ လာမိုင်းယာမယ်လ်နဲ့ ဒန်နီအိုလ်မိုတို့ ပါဝင်ကစားခဲ့ပါတယ်။ နောက်ထပ် ဘာစီလိုနာကြယ်ပွင့်တွေဖြစ်တဲ့ ရာဖင်ဟာနဲ့ အရူဂျိုတို့ကလည်း တောင်အမေရိကမှာ နိုင်ငံ့လက်ရွေးစင်အသင်းတွေအတွက် ကိုယ်စီပါဝင်ကစားပေးနေရတာဖြစ်ပါတယ်။ 

ယခုအခါမှာ ပီဒရီက "ကျွန်တော်တို့ ပွဲပန်းနေပါတယ်။ ဒါပေမယ့် ဘာစီလိုနာအတွက်ကစားပေးရမယ်ဆိုတာ မေ့ထားလို့မရပါဘူး။ တကယ်လို့ သောကြာနေ့မှာ ကစားရမယ်ဆိုရင် ကျွန်တော်တို့ အစွမ်းကုန်ပေးဆပ်သွားဦးမှာပါ" လို့ပြောကြားခဲ့ပါတယ်။ 

နယ်သာလန်နဲ့ပွဲစဉ်မှာ ပင်နယ်တီလွဲခဲ့တဲ့ ယာမယ်လ်နဲ့ပတ်သက်ပြီး ကွင်းလယ်လူက "ကျွန်တော်သူ့ကို ဘယ်လိုသောက်တလွဲပင်နယ်တီကြီးလဲကွာ လို့ပြောခဲ့ပါတယ်။ ဒါပေမယ့် သူက ဒီလိုအရာတွေကို သင်ယူဖို့လိုအပ်ပါတယ်။ သူ့ကိုဖိအားတော့ဖြစ်စေမှာမဟုတ်ပါဘူး။ ပင်နယ်တီလွဲခွင့်က လူတိုင်းမှာရှိပါတယ်" လို့ပြောကြားခဲ့ပါတယ်။ 

ဆက်လက်ပြီး ပီဒရီက "ကျွန်တော်က နားနေရတာထက်စာရင် ကစားနေရတာကို ပိုကြိုက်ပါတယ်။ တစ်ခါတလေ တစ်ပတ်လောက်နားနေရရင် ကျွန်တော်ပိုပန်းတယ်လို့ခံစားရပါတယ်။ ပုံမှန်ကစားနေမှ ကျွန်တော့်အတွက်ပိုအဆင်ပြေတာပါ။ ပြီးတော့ မကစားရရင် ကျွန်တော်ကြံ့ခိုင်မှုပြန်ယူလို့မရပါဘူး။ အချိန် ၇၂ နာရီအတွင်း ကြံ့ခိုင်မှုပြန်ယူဖို့က ခက်ခဲပါတယ်။ ပွဲအချိန်ဇယားတွေက ကြပ်ပြီးရင်း ကြပ်လာပါတယ်။ ကစားသမားတွေ ၁၀၀ ရာခိုင်နှုန်း ကြံ့ခိုင်မှုပြည့်မှ လက်မှတ်ဝယ်ကြည့်တဲ့ပရိသတ်တွေအတွက်လည်း ကြည့်ရတာတန်မှာပါ" လို့ပြောကြားခဲ့ပါတယ်။ 

ဘာစီလိုနာဟာ လာမယ့် ၂၈ ရက်အတွင်း ပွဲစဉ် ၉ ပွဲအထိကစားသွားရမှာဖြစ်ပြီး ကြပ်တည်းတဲ့အချိန်ဇယားနဲ့ ဘယ်လိုလိုက်လျောညီထွေဖြစ်အောင် စီမံသွားနိုင်မလဲ စောင့်ကြည့်ရပါမယ်။ အဆိုပါပွဲစဉ်တွေထဲမှာ ဘာစီလိုနာဟာ ကိုပါဒယ်ရေးပွဲစဉ်တွေအပါအဝင် ဒေါ့မွန်နဲ့ယှဉ်ပြိုင်သွားရမယ့် ချန်ပီယံလိဂ်ကွာတားဖိုင်နယ်ပွဲစဉ်ပါ ကစားသွားရဦးမှာဖြစ်ပါတယ်။