လာမယ့်ဂျိုအမ်ဂမ်ပါဖလားပွဲစဉ်မတိုင်ခင်မှာပဲ လီဝန်ဒေါစကီးရဲ့တံကောက်ကြောဒဏ်ရာပြဿနာတစ်ခုနဲ့အတူ ဆုတ်ယုတ်မှုတစ်ခုကို ဘာစီလိုနာတို့ ရင်ဆိုင်သွားရပါတယ်။ လာမယ့်တနင်္ဂနွေနေ့၊ ကိုမိုနဲ့ရင်ဆိုင်ရမယ့် ဂျိုအမ်ဂမ်ပါဖလားပွဲစဉ်မတိုင်ခင် ဘာစီလိုနာက လီဝန်ဒေါစကီးကို ဘယ်ပေါင်တံကောက်ကြောဒဏ်ရာပြဿနာကြောင့် အနားယူနေရသူအဖြစ် တရားဝင်ကြေညာခဲ့ပါတယ်။ ပိုလန်တိုက်စစ်မှူးအနေဖြင့် အခုရာသီကြိုနောက်ဆုံးပွဲစဉ်ကို လွဲချော်သွားဖွယ်ရှိပြီး သူ့ရဲ့ပြန်လည်ကောင်းမွန်လာမှုအပေါ်မူတည်ကာ သြဂုတ် ၁၆ ရက်၊ မာယော့ကာနဲ့ရင်ဆိုင်ရမယ့် လာလီဂါရာသီအဖွင့်ပွဲစဉ်မှာ ပွဲကစားချိန်ပေး၊မပေး ဆုံးဖြတ်သွားမယ်လို့ သိရပါတယ်။ လီဝန်ဒေါစကီး ပြန်လာနိုင်မယ့်နေ့ရက်ကို အတိအကျမထုတ်ပြန်ခဲ့ပေမယ့် ပြီးခဲ့တဲ့ဘောလုံးရာသီနှောင်းပိုင်းမှာ ကစားသမားကို ဒုက္ခပေးခဲ့တဲ့ ဒဏ်ရာပုံစံမျိုးနဲ့ အလားသဏ္ဍာန်တူတယ်လို့ သိရပါတယ်။ ကစားသမားအတွက် ဆော်ဒီဆီပြောင်းရွှေ့ဖို့ ချိတ်ဆက်မှုတစ်ခု ရှိလာခဲ့ပြီးနောက် အခုသတင်းထွက်ပေါ်လာခဲ့တာပါ။

လီဝန်ဒေါစကီးက ပြီးခဲ့တဲ့ဘောလုံးရာသီ၊ ဘာစီလိုနာအတွက် ၅၂ ပွဲပါဝင်ကစားကာ ၄၂ ဂိုးသွင်းယူပြီး လာလီဂါ၊ ကိုပါဒယ်လ်ရေး၊ စပိန်စူပါဖလားတို့ကို ဆွတ်ခူးနိုင်အောင် ကူညီပေးခဲ့ပါတယ်။ သူ့ရဲ့ဒဏ်ရာရရှိမှုက ရာသီသစ်မတိုင်ခင် ဟန်စီဖလစ်ခ်ရဲ့တိုက်စစ်ပိုင်းအစီအမံတွေကို အနှောင့်အယှက်ဖြစ်လာစေပါတယ်။ လီဝန်ဒေါစကီးမကစားနိုင်ချိန်မှာ မားကပ်ရက်ရှ်ဖို့ဒ်နဲ့ ဖာရန်တောရက်စ်က တိုက်စစ်ပိုင်းကို ဦးဆောင်သွားဖွယ် ရှိပါတယ်။ ရက်ရှ်ဖို့ဒ်ကတော့ ဂျိုအမ်ဂမ်ပါဖလားပွဲစဉ်မှာ ပါဝင်ကစားဖို့ စီစဉ်ထားပါတယ်။ တဖက်မှာလည်း ကြွက်သားပြဿနာတစ်ခုခံစားရပြီးနောက် ပြန်လည်သက်သာလာတဲ့ ဖာရန်တောရက်စ်က အသင်းနဲ့အတူ လေ့ကျင့်ခန်းပြန်ဆင်းနေပြီး ကိုမိုနဲ့ပွဲစဉ်မှာပါဝင်ကစားဖို့ သံသယဖြစ်စရာမရှိဘူးဆိုတဲ့သတင်းတွေ ထွက်ပေါ်နေပါတယ်။ လီဝန်ဒေါစကီးဒဏ်ရာရရှိမှုက ဘဏ္ဍာရေးပြဿနာကြောင့် ကစားသမားသစ်အချို့ကို မှတ်ပုံမတင်နိုင်သေးတဲ့ ဘာစီလိုနာရဲ့အသင်းလူစာရင်းပိုင်းစုဖွဲ့ပုံကျစ်လစ်မှုအပေါ် စိန်ခေါ်မှုတွေ ထပ်တိုးဖြစ်ပေါ်စေပါတယ်။

ဆက်လက်ပြီး ဒါနီအိုလ်မိုလည်း ကြွက်သားပြဿနာတစ်ခုနဲ့ ရင်ဆိုင်နေရလို့ အသင်းဖော်တွေနဲ့ခွဲပြီး သီးခြားလေ့ကျင့်နေတယ်လို့ ဘာစီလိုနာက ကြေညာခဲ့ပါတယ်။ ဘာစီလိုနာအနေဖြင့် ရာသီကြိုခြေစမ်းပွဲစဉ်နဲ့ လာလီဂါရာသီအဖွင့်ပွဲစဉ်အတွက် တိုက်စစ်ကြယ်ပွင့်မပါဝင်နိုင်မှု အခြေအနေအပေါ် အလျှင်အမြန်လိုက်လျောညီထွေဖြစ်အောင် လုပ်သွားရပါလိမ့်မယ်။ နည်းပြဟန်စီဖလစ်ခ်ကိုယ်တိုင်လည်း ဒီကွက်လပ်ကို ဖြည့်ဆည်းဖို့ ရက်ရှ်ဖို့ဒ်၊ ဖာရန်တောရက်စ်နဲ့  အခြားသောတိုက်စစ်ပိုင်းရွေးချယ်စရာတွေကို အားကိုးအားထားပြုသွားနိုင်ပါတယ်။