အယ်လ်ကလက်စီကိုမတိုင်ခင် ထိုးနှက်ချက်ကြီးတစ်ခုနဲ့ ရင်ဆိုင်ခဲ့ရတဲ့ ဘာစီလိုနာ
ဆန်တီယာဂိုဘာနေဗျူးမှာကျင်းပမယ့် တနင်္ဂနွေနေ့၊ အယ်လ်ကလက်စီကိုပွဲစဉ်မတိုင်ခင် ဘာစီလိုနာနဲ့ ဟန်စီဖလစ်ခ်အတွက် ပိုမိုဆိုးရွားတဲ့ဒဏ်ရာသတင်းစကားတွေ ရောက်ရှိလာခဲ့ပါတယ်။ အစောပိုင်းမှာ အခုပွဲစဉ်အတွက် လေ့ကျင့်ခန်းပြန်ဆင်းပြီး အချိန်မီကြံ့ခိုင်မှုပြည့်ဝမယ်လို့ ရာဖင်ဟာကို မျှော်လင့်ထားခဲ့ပေမယ့် ဆုတ်ယုတ်မှုအချို့နဲ့ကြုံတွေ့ခဲ့တယ်ဆိုတဲ့သတင်းတွေ ထွက်ပေါ်ခဲ့ပါတယ်။ သတင်းရင်းမြစ်များစွာရဲ့အဆိုအရ သောကြာနေ့လေ့ကျင့်ရေးအစီအစဉ်ကို ရာဖင်ဟာမပါဝင်နိုင်ဘဲ ရီးရဲလ်မက်ဒရစ်နဲ့ပွဲစဉ်မှာ ပါဝင်ကစားဖို့ မသေချာမရေရာတဲ့အခြေအနေနဲ့ ရင်ဆိုင်နေရတယ်လို့ သိရပါတယ်။
ဘရာဇီးသားက ဒဏ်ရာပြဿနာကြောင့် ဘာစီလိုနာရဲ့နောက်ဆုံးပွဲစဉ်ငါးခုကို လွဲချော်ခဲ့ပြီး အခုလိုစိတ်ပျက်စရာတိုးတက်မှုမျိုးဆိုရင် ကွင်းဘေးမှာ အချိန်အတော်ကြာ ဆက်ရှိနေရဦးမယ်လို့ ယူဆရပါတယ်။ ရာဖင်ဟာမကစားနိုင်ဘူးဆိုရင် ဘာစီလိုနာအတွက် စပိန်နိုင်ငံရဲ့မြို့တော်မှာ သွင်းဂိုးတွေရှာဖွေဖို့ ယာမယ်လ်၊ ရက်ရှ်ဖို့ဒ်၊ ဖာရန်တောရက်စ်နဲ့ ဘတ်ဒ်ဂီးတို့ဆီ တာဝန်ကျလာပါလိမ့်မယ်။ ရာဖင်ဟာအတွက်တော့ နောက်ထပ်စစ်ဆေးစမ်းသပ်မှုတွေ လုပ်ဆောင်သွားရဖွယ် ရှိပါတယ်။
