အာဆင်နယ်နည်းပြ မီကယ် အာတီတာက အသင်းရဲ့ အဓိကကစားသမားတချို့ ဒဏ်ရာကြောင့် ပြန်လာနိုင်ဖို့ မသေချာတာတွေကြောင့် နွေရာသီအပြောင်းအရွှေ့မှာ အခက်အခဲတွေဖြစ်လာနိုင်တယ်လို့ ပြောကြားလိုက်ပါတယ်။ အာဆင်နယ်အသင်းဟာ ပရီးမီးယားလိဂ်မှာ (၃) ရာသီဆက်တိုက် ဒုတိယနေရာရရှိဖို့များနေတာကြောင့် နည်းပြ အာတီတာနဲ့ အားကစားဒါရိုက်တာသစ် အန်ဒရေယာဘာတာတို့က အသင်းကို ပိုမိုခိုင်မာအောင်ပြုလုပ်ဖို့အတွက် အပြောင်းအရွှေ့ဈေးကွက်မှာ ခြေလှမ်းကောင်းတွေ မျှော်လင့်နေကြပါတယ်။

အာဆင်နယ်အသင်းဟာ ဆိုစီဒက်ကွင်းလယ်ကစားသမား မာတင်ဇူဘီမန်ဒီကို ခေါ်ယူဖို့ စိတ်ဝင်စားနေပြီး အထောင်တိုက်စစ်ပိုင်းနဲ့ ညာတောင်ပံနေရာတွေမှာ ကစားသမားသစ်တွေခေါ်ယူဖို့လည်း စီစဉ်နေပါတယ်။ အရန်ဂိုးသမားသစ်၊ ခံစစ်ပိုင်းနဲ့ ကွင်းလယ်ပိုင်းအတွက် ကစားသမားသစ်တွေ (အထူးသဖြင့် သောမတ်စ်ပါတေးနဲ့ ဂျော်ဂျင်ဟိုတို့ရဲ့ စာချုပ်သက်တမ်းကုန်ဆုံးတော့မှာဖြစ်တာကြောင့်) ကိုလည်း ခေါ်ယူဖို့ စီစဉ်ထားပါတယ်။

ဒါပေမဲ့ အာတီတာကတော့ ဒဏ်ရာရသွားတဲ့ ကစားသမားတချို့ ပြန်ကစားနိုင်မယ့်ရက်အတိအကျ မသိရသေးတာကြောင့် လာမယ့်ရာသီ အသင်းရဲ့လိုအပ်ချက်တွေကို အကဲဖြတ်ရခက်နေတယ်လို့ ဝန်ခံခဲ့ပါတယ်။ နောက်ခံလူ ဂါဘရီရယ်မာဂယ်ဟေးစ်နဲ့ တိုက်စစ်မှူး ဟာဗက်ဇ်တို့ဟာ ဒဏ်ရာပြဿနာကြောင့် ရာသီကုန်ထိ နားရမှာဖြစ်ပြီး နွေရာသီမှာ ပြန်ကစားနိုင်ဖို့ မျှော်လင့်နေကြပါတယ်။ 

ဒါ့အပြင် ဂါဘရီရယ်ဂျီးဆပ်စ်နဲ့ တာဟီရိုတိုမီယာဆုတို့ကတော့ နှစ်ကုန်ပိုင်းမှသာ ပြန်ကစားနိုင်မယ်လို့ မျှော်လင့်ရပြီး ဘူကာယိုဆာကာနဲ့ ဘင်ဝှိုက်တို့ဟာလည်း မကြာသေးခင်ကမှ ဒဏ်ရာကနေ သက်သာလာတာဖြစ်ပါတယ်။ အာတီတာက "အဲဒါက ပိုခက်ခဲစေပါတယ်။ ဘာလို့လဲဆိုတော့ ခွဲစိတ်ကုသမှုခံယူပြီးမှ ရာသီသစ်ကို စတင်ရမယ့် ကစားသမားတွေရှိနေတာကြောင့်ပါပဲ။ အဲဒါက အမြဲတမ်း မေးခွန်းထုတ်စရာတစ်ခုပါ။ ကစားသမားအများအပြားရှိတဲ့ နေရာတွေမှာ အဲဒီလိုပြဿနာတွေရှိနေတာကြောင့် ကျွန်တော်တို့မသိရတဲ့အရာတွေ အများကြီးရှိနေပါတယ်။ အဲဒီကစားသမားတွေဟာ ပွဲများတဲ့ကာလတွေမှာ ဘယ်လောက်ထိ ခံနိုင်ရည်ရှိမလဲဆိုတာ မသိရပါဘူး။ ဒါကြောင့် အဲဒါနဲ့ပတ်သက်ပြီး အများကြီးလုပ်ဆောင်နေပါတယ်။ အဲဒါက သက်ရောက်မှုရှိမရှိဆိုတာ ကြည့်ရပါမယ်။ ဘာလို့လဲဆိုတော့ ကစားသမားတချို့နဲ့ပတ်သက်ပြီး သူတို့ဟာရာသီရဲ့ ပထမ ၅ လ၊ ၆ လလောက်မှာ ဘယ်လိုရင်ဆိုင်ရမလဲဆိုတာ မသေချာမရေရာမှုတွေ အများကြီးရှိနေလို့ပါပဲ" လို့ ပြောကြားခဲ့ပါတယ်။