မန်ချက်စတာယူနိုက်တက် တိုက်စစ်မှူးဟောင်း ဒီယေဂို ဖော်လန်ဟာ စိတ်ပျက်စရာကောင်းတဲ့ ကမ္ဘာ့ဖလားပြိုင်ပွဲအပြီးမှာ ဥရုဂွေးအသင်းရဲ့ နည်းပြသစ် ဖြစ်လာတော့မှာပါ။ ဥရုဂွေးအသင်းဟာ နည်းပြ ဘီယဲလ်ဆာရဲ့ လက်အောက်မှာ ဆော်ဒီအာရေဗျ၊ ကိပ်ဗာဒီ အသင်းတွေနဲ့ နှစ်ပွဲဆက် သရေကျခဲ့ပြီး နောက်ဆုံးပွဲမှာ စပိန်ကို ၁ ဂိုး - ဂိုးမရှိနဲ့ ရှုံးနိမ့်ခဲ့တာကြောင့် အုပ်စုအဆင့်ကနေ အံ့အားသင့်ဖွယ် ထွက်ခွာခဲ့ရတာ ဖြစ်ပါတယ်။ အခုလိုမျိုး နွေရာသီပြိုင်ပွဲမှာ ရလဒ်တွေ ဆိုးရွားခဲ့ပြီးနောက် မာဆယ်လို ဘီယဲလ်ဆာ နုတ်ထွက်သွားခဲ့တာကြောင့် ၎င်းရဲ့နေရာမှာ ဒီယေဂို ဖော်လန်ကို လက်ရွေးစင်အသင်းရဲ့ ယာယီနည်းပြအဖြစ် ခန့်အပ်လိုက်ကြောင်း ဥရုဂွေးဘောလုံးအဖွဲ့ချုပ်က တနင်္ဂနွေနေ့မှာ ကြေညာခဲ့ပါတယ်။ ဥရုဂွေးဘောလုံးအဖွဲ့ချုပ်ရဲ့ ပြောကြားချက်အရ ဖော်လန်ရဲ့ ကနဦးစာချုပ်ဟာ ၂၀၂၇ ခုနှစ် မတ်လအထိ သက်တမ်းရှိမှာဖြစ်ပြီး ၂၀၂၇ တောင်အမေရိက ယူ-၂၀ ချန်ပီယံရှစ်ပြိုင်ပွဲမှာလည်း ဥရုဂွေးရဲ့ မျိုးဆက်သစ်ကြယ်ပွင့်တွေကို မြေတောင်မြှောက်ပေးဖို့ တာဝန်ယူရမှာ ဖြစ်ပါတယ်။ ဖော်လန်ဟာ သူရဲ့ ဂန္ထဝင်ကစားသမားဘဝတစ်လျှောက်မှာ မန်ယူ၊ ဗီလာရီးယဲလ်၊ အက်သလက်တီကိုနဲ့ အင်တာနေစီယွန်နယ် အသင်းတွေမှာ ခြေစွမ်းပြခဲ့သူဖြစ်ပြီး ဥရုဂွေးအသင်းအတွက် ၃၆ ဂိုး သွင်းယူကာ တတိယမြောက် ဂိုးအများဆုံးသွင်းသူအဖြစ် မှတ်တမ်းဝင်ခဲ့သလို ၂၀၁၀ ကမ္ဘာ့ဖလားမှာလည်း အသင်းအတွက် အဓိကကစားသမားဖြစ်ခဲ့ပါတယ်။ စိတ်ဝင်စားဖို့ကောင်းတာက ဖော်လန်ဟာ ၂၀၁၉ ဒီဇင်ဘာလမှာ ပီနာရောလ်အသင်းရဲ့ နည်းပြအဖြစ် ပထမဆုံး စတင်ခဲ့ပေမဲ့ ၁၁ ပွဲမှာ ၄ ပွဲသာ အနိုင်ရခဲ့တာကြောင့် ရာထူးကနေ ထုတ်ပယ်ခံခဲ့ရပါတယ်။ အဲဒီနောက် ၆ လအကြာမှာတော့ အာတီနာ့စ်အသင်းကို နည်းပြဖို့ ရောက်ရှိလာခဲ့ပေမဲ့ ၁၂ ပွဲမှာ ၃ ပွဲသာ ရှုံးနိမ့်ခဲ့တာတောင်မှ ဥရုဂွေး ဒုတိယတန်းကလပ်အသင်းက သူ့ကို ရာထူးကနေ ရက်ရက်စက်စက် ထုတ်ပယ်ခဲ့တာ ဖြစ်ပါတယ်။