အားထားရတဲ့ ဗဟိုနောက်ခံလူဆာလီဘာကိုယ်တိုင် အသင်းရဲ့လေ့ကျင့်ရေးကွင်းဆီ ပြန်လည်ပူးပေါင်းလာလို့ ပြင်သစ်အသင်းအတွက် အားတက်စရာသတင်းကောင်းတစ်ရပ် ဖြစ်လာခဲ့ပါတယ်။

ဒက်စ်ချမ့်စ်ရဲ့အသင်းက လာမယ့် ဇူလိုင် ၁၉ ရက်မှာကျင်းပမယ့် ကမ္ဘာ့ဖလားဗိုလ်လုပွဲကြီးမှာ ချန်ပီယံဆုကို ကိုင်မြှောက်နိုင်ဖို့အတွက် ရေပန်းအစားဆုံးအသင်းတွေထဲမှာ ပါဝင်နေပါတယ်။

ပထမဦးဆုံးတော့ သူတို့က အုပ်စုအဆင့်မှာ ထိပ်တိုက်တွေ့ဆုံနေတဲ့ ဆီနီဂေါကို အနိုင်ယူဖို့ ရည်မှန်းထားပါလိမ့်မယ်။ ဆီနီဂေါကလည်း ၂၀၀၂ ကမ္ဘာ့ဖလားအုပ်စုအဖွင့်ပွဲစဉ်မှာ အဲ့ဒီအချိန်တုန်းက လက်ရှိချန်ပီယံဖြစ်တဲ့ ပြင်သစ်ကို ၁-၀ ဂိုးဖြင့် အနိုင်ယူခဲ့ဖူးပါတယ်။

သတင်းထောက်ဖာဘရစ်ဟော့ကင်းစ်ရဲ့ဖော်ပြချက်အရ အာဆင်နယ်ဗဟိုနောက်ခံလူဆာလီဘာက စီနီယာအသင်းကြီးရဲ့လေ့ကျင့်ရေးကွင်းဆီ ပြန်လည်ရောက်ရှိလာခဲ့လို့ ပြင်သစ်အသင်းအတွက် သတင်းကောင်းတစ်ရပ် ဖြစ်လာတယ်လို့ သိရပါတယ်။

အသက် ၂၅ နှစ်အရွယ်ကစားသမားက ၂၀၂၅-၂၀၂၆ ရာသီရဲ့ ဒုတိယရာသီဝက်ကာလအများစုမှာ ဒုက္ခပေးခဲ့တဲ့ နောက်ကျောဒဏ်ရာပြဿနာကြောင့် ပြီးခဲ့တဲ့နှစ်ရက်တာလေ့ကျင့်ရေးအစီအစဉ်တွေကို လွဲချော်ခဲ့ပါတယ်။

သူက မြောက်အိုင်ယာလန်ကို ၃-၁ ဂိုးနဲ့ အနိုင်ရရှိခဲ့တဲ့ ခြေစမ်းပွဲစဉ်မှာ ပထမပိုင်း ၄၅ မိနစ်ကို ပါဝင်ကစားခဲ့ပြီး ဒုတိယပိုင်းမစတင်မီ လာခရို့စ်နဲ့ လူစားလဲလှယ်ခဲ့ပါတယ်။