နည်းပြ တန်ဟတ်ရဲ့ ဦးဆောင်မှုနဲ့အတူ ဥရောပထိပ်တန်းအသင်းတစ်သင်းအဖြစ် ပြန်လည်ဦးမော့နိုင်ရေး အားစိုက်လုပ်ဆောင်နေတဲ့ မန်ချက်စတာယူနိုက်တက်အသင်းက ကွင်းလယ်ပိုင်းပြင်ဆင်မှု ပြုလုပ်ရန် ကြိုးပမ်းတဲ့အနေဖြင့် ရောင်းချရန် စီစဉ်ထားတဲ့ တိုမီနေးအပေါ် ဘိုင်ယန်မြူးနစ်က စိတ်ဝင်စားနေချိန် ဂရာဗန်ဘက်ချ်နဲ့ အလဲအထပ် ပြုလုပ်ရန် စိတ်အားထက်သန်နေတာပဲ ဖြစ်ပါတယ်။

ပရီးမီးယားလိဂ် ပွဲစဉ် ၃ပွဲကစားပြီးချိန်မှာ ရမှတ် ၆မှတ်သာ စုဆောင်းနိုင်ခဲ့ပြီး ကွင်းလယ်ပိုင်းလိုအပ်ချက် မြင့်မားနေတာကြောင့် အပြောင်းအလဲပြုလုပ်တဲ့ အနေဖြင့် ယူနိုက်တက်အသင်းက တိုမီနေးကို ရောင်းချကာ ကစားသမားခေါ်ယူရန် လုပ်ဆောင်နေတာလည်း ဖြစ်ပါတယ်။ နည်းပြ မိုယက်စ်ရဲ့ ဝက်စ်ဟမ်းအသင်းက သရဲနီတပ်ရဲ့ အကယ်ဒမီထွက် ကွင်းလယ်ကစားသမားအတွက် ပြောင်းရွှေ့ကြေး ပေါင်သန်း ၃၀ ဖြင့်ကမ်းလှမ်းမှု ပြုလုပ်ဖူးခဲ့ပေမဲ့ ယူနိုက်တက်အသင်းက ပယ်ချထားခဲ့တာ ဖြစ်ပါတယ်။

ဘွန်ဒက်စ်လီဂါပြိုင်ပွဲတွင် ၁၁နှစ်ဆက် ချန်ပီယံဖြစ်ထားတဲ့ ဘိုင်ယန်မြူးနစ် အသင်းကလည်း တိုမီနေးကို ခေါ်ယူရေးအတွက် ကမ်းလှမ်းမှုပြုလုပ်ရန် လုပ်ဆောင်နေတဲ့ အကြောင်း ဥရောပ အခြေစိုက် နာမည်ကျော် သတင်းဌာနတစ်ခုဖြစ်တဲ့ BILD က ဖော်ပြလာခဲ့တာလည်း ဖြစ်ပါတယ်။ ဘွန်ဒက်စ်လီဂါ ချန်ပီယံအသင်းအနေဖြင့်လည်း တိုမီနေးကို အရခေါ်ယူနိုင်ရန်အတွက် ယူနိုက်တက်အသင်း ပစ်မှတ်ထားနေတဲ့ ဂရာဗန်ဘက်ချ်ကို ပြန်လည် အငှားချသွားရန် ပြင်ဆင်လုပ်ဆောင်နေတဲ့အကြောင်းပါ သတင်းထွက်ပေါ်နေတာပဲ ဖြစ်ပါတယ်။