ကစားသမားတွေရဲ့ ရှုံးနိမ့်မှုအပေါ်ကြောက်လန့်စိတ်အပြင် ရှင်းလင်းပြတ်သားမှုအားနည်းချက်တွေကြောင့် ယူရို-၂၀၂၄ မှာ အင်္ဂလန်လက်ရွေးစင်အသင်းကျဆုံးခဲ့တယ်လို့ သောမတ်စ်တူချယ်က ယုံကြည်နေပါတယ်။

ပြီးခဲ့တဲ့နွေရာသီ၊ ယူရို-၂၀၂၄ ပြိုင်ပွဲကာလတလျှောက်လုံး အထင်ကြီးလောက်စရာစွမ်းဆောင်ရည်မျိုး ပြသနိုင်ဖို့ ရုန်းကန်ခဲ့ရပေမယ့် ဆောက်ဂိတ်ရဲ့အသင်းက ဖိုင်နယ်အဆင့်ဆီတက်ရောက်နိုင်အောင် စွမ်းဆောင်နိုင်ခဲ့ပါတယ်။ ဖိုင်နယ်မှာတော့ အင်္ဂလန်အသင်းက စပိန်အသင်းကို ၁-၂ ဂိုးဖြင့် ရှုံးနိမ့်ခဲ့ပါတယ်။ ပြိုင်ပွဲကာလအတွင်း ဆောက်ဂိတ်က အမှားအယွင်းမခံတဲ့နည်းဗျူဟာပိုင်းချဉ်းကပ်မှုပုံစံမျိုးကို ချမှတ်ခဲ့လို့ ဂယ်ရီလိုင်နီကာ၊ အလန်ရှီးယားတို့လို အင်္ဂလန်လက်ရွေးစင်တိုက်စစ်မှူးဟောင်းတွေကပင် အသင်းကစားဟန်အပေါ် အပြင်းအထန်ဝေဖန်ခဲ့ပါတယ်။

အောက်တိုဘာလအတွင်း အင်္ဂလန်လက်ရွေးစင်အသင်းနည်းပြသစ်ဖြစ်လာခဲ့တဲ့ သောမတ်စ်တူချယ်က ဒီည၊ ဝင်ဘာလေကွင်းမှာ အယ်လ်ဘေးနီးယားနဲ့ရင်ဆိုင်ရမယ့် ကမ္ဘာ့ဖလားခြေစစ်ပွဲအုပ်စုအဖွင့်ပွဲစဉ်ကို လက်ရွေးစင်နည်းပြဘ၀ ဗွေဆော်ဦးပွဲစဉ်အဖြစ် ကိုင်တွယ်သွားပါလိမ့်မယ်။

ယူရို-၂၀၂၄ ပြိုင်ပွဲဝင် ဆောက်ဂိတ်ရဲ့အင်္ဂလန်လက်ရွေးစင်အသင်းမှာ ရှင်းလင်းပြတ်သားတဲ့ကစားဟန်တစ်ခု ရှိခဲ့သလားဆိုတဲ့ မေးခွန်းကို တူချယ်က “ ပြီးခဲ့တဲ့နွေရာသီမှာလား.. မရှိပါဘူး။ လုံးဝမရှိပါဘူး”လို့ တုံပြန်ဖြေကြားပါတယ်။ဘယ်အရာတွေ ပျောက်ဆုံးနေခဲ့သလဲဆိုတဲ့မေးခွန်းကို တူချယ်က “ အသင်းရဲ့ဝိသေသလက္ခဏာ၊ ရှင်းလင်းပြတ်သားမှု၊ ဟန်ချက်ညီမှု၊ စံနမူနာပြပုံစံတွေ၊ ကစားသမားတွေရဲ့လွတ်လပ်ခွင့်၊ ကစားသမားတွေရဲ့ရဲဝံ့မှု၊ နိုင်ပွဲဆာလောင်စိတ်တွေပေါ့။ကျွန်တော့်အမြင် သူတို့တွေက နိုင်ပွဲဆာလောင်မှုနဲ့အတူ စိတ်လှုပ်ရှားဖွယ်တိုက်ပွဲဝင်ဖို့ထက် ပြိုင်ပွဲမှ ထွက်ခွာသွားနိုင်မယ့်အရေးကို ပိုကြောက်လန့်နေတယ်လို့ ထင်ပါတယ်”လို့ ဖြေကြားပါတယ်။

အင်္ဂလန်အသင်းအတွက် ပျောက်ဆုံးနေတဲ့အပိုင်းအစ ဘာဖြစ်မလဲဆိုတဲ့မေးခွန်းကို တူချယ်က “ စိတ်လှုပ်ရှားစရာကောင်းတဲ့ အပိုင်းပေါ့။ ပရိသတ်တွေရဲ့အမြင်မှာ ဒီအသင်းက အနိုင်ယူမယ့်အစုအဖွဲ့လို့ ခံစားမိရပါမယ်။ အနိုင်ယူနိုင်မယ့်အသင်းလို့ သူတို့ ယုံကြည်နေရပါမယ်”လို့ ဆက်ဖြေကြားခဲ့ပါတယ်။