ယနေ့နံနက်ယှဉ်ပြိုင်ခဲ့တဲ့ ချန်ပီယံလိဂ်ဗိုလ်လုပွဲမှာ ဒေါ့မွန်ဟာ ရီးရဲလ်မက်ဒရစ်ကို ၀-၂ နဲ့ရှုံးနိမ့်ခဲ့ပေမယ့် ပွဲအပြီးမှာတော့ အသင်းနည်းပြ အီဒင်တာဇစ်က မန်ချက်စတာယူနိုက်တက်အနေ အငှားနဲ့ခေါ်ယူထားခဲ့တဲ့ တောင်ပံကစားသမား ဂျေဒန်ဆန်ချိုကို ချီးကျူးပြောဆိုမှုတွေ ပြုလုပ်လာခဲ့ပါတယ်။ 

ရာသီအစက ယူနိုက်တက်မှာ နည်းပြဖြစ်သူ အဲရစ်တန်ဟက်နဲ့ လူသိရှင်ကြားပြဿနာတက်ပြီးနောက် ဇန်နဝါရီအပြောင်းအရွှေ့မှာ အသင်းဟောင်းဒေါ့မွန်နဲ့ပြန်လည်ချိတ်ဆက်ခဲ့တဲ့ ဆန်ချိုဟာ ခြေစွမ်းကောင်းကို တောက်လျှောက်ပြသထားနိုင်ပြီး ယခုပွဲစဉ်အတွင်း ရီးရဲလ်မက်ဒရစ်ကို သွင်းဂိုးတွေ ခွင့်မပြုရခင်မှာလည်း ဒေါ့မွန်တိုက်စစ်ကို ဦးဆောင်ကာ ပြိုင်ဘက်နောက်တန်းကို အကောင်းဆုံးခြိမ်းခြောက်နိုင်ခဲ့တာဖြစ်ပါတယ်။ 

ယခုအခါမှာတော့ မန်နေဂျာ တာဇစ်က “ပြီးခဲ့တဲ့ ၆ လအတွင်း ဆန်ချိုက ကျွန်တော်တို့အတွက် အရမ်းကောင်းခဲ့ပါတယ်။ အခုလိုပုံစံမျိုးပြန်ရဖို့အတွက် အချိန်တစ်ခုတော့ ယူခဲ့ရတာပေါ့။ ဒါပေမယ့် သူ့ရဲ့အရည်အသွေးနဲ့ ကျွမ်းကျင်မှုကိုတော့ လူတိုင်းမြင်တွေ့နိုင်မယ်လို့ထင်ပါတယ်။ အသင်းရဲ့တိုးတက်မှုက သူ့ကြောင့်လည်း ပါဝင်ပါတယ်” လို့ပြောကြားခဲ့ပါတယ်။ 

ဒေါမွန်မှာနေထိုင်ခဲ့တဲ့ ပထမဆုံး ၄ နှစ်မှာ ဆန်ချိုဟာ ဂိုး ၅၀ အထိသွင်းယူနိုင်ခဲ့ပြီး ဥရောပကြယ်တစ်ပွင့်အဖြစ် ထွန်းတောက်လာခဲ့တာကြောင့် ၂၀၂၁ ခုနှစ်မှာ ယူနိုက်တက်က အင်္ဂလန်သားကို ပေါင် ၇၃ သန်းနဲ့ ခေါ်ယူခဲ့ပါတယ်။သို့သော်လည်း ဆန်ချိုဟာ အိုးလ်ထရက်ဖို့ဒ်မှာတော့ ပုံမှန်ခြေစွမ်းရဖို့ ရုန်းကန်ခဲ့ရပြီး ယူနိုက်တက်အတွက် ၈၂ ပွဲကစားထားရာမှာ ၁၂ ဂိုးသာသွင်းယူထားနိုင်ပါတယ်။ 

ထို့နောက်မှာတော့ တောင်ပံကစားသမားဟာ မန်နေဂျာအဲရစ်တန်ဟက်နဲ့ အငြင်းပွားခဲ့ပြီး ပထမအသင်းလူစာရင်းကနေ ထုတ်ပယ်ခံခဲ့ရတာကြောင့် အသင်းဟောင်းနဲ့ပြန်လည်ချိတ်ဆက်ဖို့ ဆုံးဖြတ်ခဲ့တာဖြစ်ပါတယ်။ ဆန်ချိုရဲ့ ၆ လစာအငှားစာချုပ်ဟာ ရီးရဲလ်မက်ဒရစ်နဲ့ပွဲစဉ်အပြီးမှာပဲ သက်တမ်းကုန်ဆုံးခဲ့ပြီဖြစ်ပြီး ဒေါ့မွန်အနေနဲ့ အသက်-၂၄ နှစ်အရွယ်ကစားသမားကို ဆက်လက်ထိန်းသိမ်းလိုနေပေမယ့် ယူနိုက်တက်ရဲ့ဆုံးဖြတ်ချက်အပေါ်မှာပဲ မူတည်နေတာဖြစ်ပါတယ်။ 

ဆက်လက်ပြီးတော့ တာဇစ်က “ဆန်ချိုနဲ့ အလုပ်အတူတူတွဲလုပ်ရတာ ပျော်စရာပါ။ အနာဂတ်မှာဘာတွေဖြစ်လာဦးမလဲ မသိသေးပေမယ့် သူ့အရည်အချင်းနဲ့ဆိုရင် ချန်ပီယံလိဂ်ဗိုလ်လုပွဲကို နောက်ထပ်တစ်ကြိမ်တက်လှမ်းနိုင်ဦးမယ်ဆိုတာ သေချာပါတယ်” လို့ထပ်လောင်းပြောကြားခဲ့ပါတယ်။