အလက်ဇန်းဒါးအီဆက် နယူးကာဆယ်အသင်းကနေ ပြောင်းရွှေ့ဖို့ လုပ်ဆောင်နေတဲ့အပေါ် အရင်က တော့တင်ဟမ်ကနေ ဂါရတ် ဘေးလ်နဲ့ လူကာ မိုဒရစ်တို့ ထွက်ခွာခဲ့တဲ့ အခြေအနေနဲ့ နှိုင်းယှဉ်ခဲ့ကြပါတယ်။

အီဆက်က နယူးကာဆယ်ကနေ လီဗာပူးကို ပြောင်းရွှေ့ဖို့ လုပ်ဆောင်နေတဲ့ အခြေအနေဟာ ၂၀၁၂ ခုနှစ်နဲ့ ၂၀၁၃ ခုနှစ်က မိုဒရစ်နဲ့ ဘေးလ်တို့ တော့တင်ဟမ်ကနေ ရီးရဲလ်မက်ဒရစ်ကို ပြောင်းရွှေ့ခဲ့တဲ့ အခြေအနေတွေနဲ့ ဆင်တူတယ်လို့ အာဆင်နယ် နောက်ခံလူဟောင်း ဝီလျံ ဂါးလက်စ်က ယုံကြည်နေပါတယ်။ တော့တင်ဟမ်အသင်း ဥက္ကဋ္ဌ ဒန်နီယယ် လီဗိုင်းက ကစားသမား ၂ ဦးကို ထိန်းသိမ်းဖို့ ကြိုးစားခဲ့ပုံအကြောင်းကိုလည်း ပြောခဲ့ပါတယ်။

“နယူးကာဆယ်က လုပ်ဆောင်ခဲ့တာဟာ ဒန်နီယယ် လီဗိုင်းက ဂါရတ် ဘေးလ်နဲ့ လူကာ မိုဒရစ်တို့ကို လုပ်ခဲ့တဲ့အတိုင်းပါပဲ။ ဒါပေမဲ့ ဒီကစားသမား ၂ ဦးနဲ့ အခုလိုမျိုး အခြေအနေတွေ ဖြစ်မလာခဲ့ပါဘူး။ သူတို့က ဆက်ပြီး လေ့ကျင့်နေခဲ့ပါတယ်။ သတင်းစာတွေမှာ မပါခဲ့ပါဘူး။ သူတို့က ပရော်ဖက်ရှင်နယ် ဆန်ခဲ့ပါတယ်။ ဒါဟာ ဇာတ်လမ်းတစ်ပုဒ် မဖြစ်ခဲ့ပါဘူး။ နယူးကာဆယ်အနေနဲ့ သတိထားဖို့ လိုပါတယ်”

“ဟူဂို အီကီတီကီက ၂ ဂိုး သွင်းယူထားပြီးပါပြီ။ လီဗာပူးကလည်း သူတို့ပွဲကို အနိုင်ရရှိထားပါတယ်” “ဒါကြောင့် နယူးကာဆယ်က ရူးကြောင်ကြောင် ပြောင်းရွှေ့ကြေး တောင်းဆိုမယ်ဆိုရင် လီဗာပူးက စားပွဲကနေ ထွက်သွားနိုင်ပါတယ်။ အဲ့ဒီအခါ ကစားသမားကလည်း မရေမရာဖြစ်နေပြီး နယူးကာဆယ်က ဇန်နဝါရီမှာ ငွေလျော့ယူပြီး လက်ခံရပါလိမ့်မယ်။ အဲ့ဒီအချိန်မှာတော့ ရာသီဝက်မှာ အားနည်းတဲ့ လူစာရင်းမျိုးနဲ့ ကစားရမှာပါ” လို့ ဂါးလက်စ်က ပြောခဲ့ပါတယ်။

ဘေးလ်နဲ့ မိုဒရစ်တို့ရဲ့ ပြောင်းရွှေ့မှုနဲ့ အီဆက်ရဲ့ အခြေအနေက ဆင်တူလားလို့ မေးတဲ့အခါမှာတော့ “ဂါရတ်နဲ့ပတ်သက်ပြီးတော့ ကျွန်တော် မသိပါဘူး။ ဒါပေမဲ့ လူကာနဲ့တော့ သိပါတယ်။ သူ့အတွက် ခက်ခဲခဲ့ပါတယ်” “သူ့ရဲ့ အပြောင်းအရွှေ့က ဆွဲဆန့်နေတာကြောင့် သူက ဒေါသထွက်ခဲ့ပါတယ်။ သူက ဒန်နီယယ် လီဗိုင်းကို အရမ်းဒေါသထွက်ခဲ့ပါတယ်”

“အလက်ဇန်းဒါး အိုင်ဆက်ရဲ့ အခြေအနေကို ကြည့်လိုက်ရင်တော့ သူက အသင်းကနေ ထွက်ခွာချင်နေတယ်ဆိုတာ ကျွန်တော်တို့အားလုံး သိပါတယ်။ အသင်းကတော့ သူ့ကို ထိန်းသိမ်းချင်နေပေမဲ့ သူက လေ့ကျင့်ခန်း မဆင်းတော့ပါဘူး။ သူက ထွက်ခွာဖို့ ကြိုးစားနေပါတယ်။ ဒါပေမဲ့ ဒါက အသင်းကနေ ထွက်ခွာဖို့ အကောင်းဆုံးနည်းလမ်း မဟုတ်ပါဘူး။ ဘာလို့လဲဆိုတော့ အသင်းအသစ်ကို ပြောင်းတဲ့အခါ ရုပ်ပိုင်းဆိုင်ရာအရ အဆင်သင့် ဖြစ်နေရပါမယ်”

“သင်က အသင်းအသစ်ကို ရောက်တဲ့ ပထမဆုံးနေ့မှာ ပုံစံမကျတာမျိုး မဖြစ်ချင်ပါဘူး။ ပြောင်းရွှေ့ချင်တယ်ဆိုရင်တောင် လက်ရှိအသင်းနဲ့ လေ့ကျင့်ဖို့ လိုအပ်ပါသေးတယ်” လို့ ဂါးလက်စ်က ထပ်လောင်းပြောဆိုခဲ့ပါတယ်။

နယူးကာဆယ်အသင်းက လီဗာပူးရဲ့ ကမ်းလှမ်းမှုကို ပယ်ချခဲ့ပြီး အီဆက်ရဲ့ လုပ်ရပ်တွေအပေါ် စိတ်ပျက်မိကြောင်း ပြောဆိုခဲ့ပါတယ်။ နည်းပြ အက်ဒီဟောင်းကတော့ ဒီဇာတ်လမ်းက “အဆုံးသတ်တော့မယ်” လို့ သောကြာနေ့မှာ ပြောခဲ့ပါတယ်။ အိုင်ဆက်ရဲ့ အန်ဖီးလ်ကို ပြောင်းရွှေ့ဖို့ အိပ်မက်ဟာ ဖြစ်လာမလားဆိုတာကိုတော့ ဆက်လက်ကြည့်ရှုရဦးမှာ ဖြစ်ပါတယ်။

အီဆက်ရဲ့ လုပ်ရပ်တွေကို ဝေဖန်ခဲ့ပေမဲ့ နယူးကာဆယ်က သူ့ကို ထွက်ခွာခွင့် ပြုသင့်တယ်လို့ ဂါးလက်စ်က ယုံကြည်နေပါတယ်။ “အိုင်ဆက် ဒီလိုကိုင်တွယ်ပုံကို ကြည့်ရတာ သူ့ပတ်ဝန်းကျင်က မကောင်းတဲ့ အကြံဉာဏ်တွေ ပေးခဲ့ပုံပေါ်ပါတယ်။ လွယ်လွယ်ကူကူပါပဲ။ ဒါက လူတွေရဲ့ မကောင်းတဲ့ အကြံဉာဏ်တွေရဲ့ ရလဒ်ပါပဲ။ ဒါပေမဲ့ တစ်ချိန်တည်းမှာပဲ ကျွန်တော် သူ့ကိုပဲ အပြစ်တင်မှာ မဟုတ်ပါဘူး။ နယူးကာဆယ်ကလည်း ဒီအရာတွေအတွက် တာဝန်ယူရမှာပါ”

“အသင်းရဲ့ ချဉ်းကပ်ပုံနဲ့ ကျွန်တော် သဘောမတူဘူး။ ကစားသမားက ရာသီတိုင်း ဂိုးတွေအများကြီး သွင်းပေးနေပါတယ်” “ပြီးခဲ့တဲ့ရာသီက သူ ၂၀ ဂိုးကျော် သွင်းယူပေးခဲ့ပါတယ်။ လီဗာပူးရဲ့ ကမ်းလှမ်းမှုနဲ့ သင်က ငွေနှစ်ဆရတော့မှာပါ” “သူက အဲ့ဒီနှစ်တွေအတွင်း နယူးကာဆယ်အတွက် အရာအားလုံး ပေးခဲ့ပါတယ်။ တစ်ခါတလေမှာ ဒီလိုအခြေအနေမျိုးမှာ ကစားသမားတွေကို ထွက်ခွာခွင့် ပြုရမှာပါ”

“ဒီလိုကြီးမားတဲ့ ကမ်းလှမ်းမှု ရောက်လာတဲ့အခါ သူ့ဘဝကို ဒီလောက်ထိ ခက်ခဲအောင် လုပ်တာက မျှတပုံမပေါ်ပါဘူး။ တချို့ကစားသမားတွေက သူတို့ ကစားနေတဲ့ ကလပ်ကို ဂရုမစိုက်ဘဲ သူတို့ရဲ့ ကိုယ်ရေးကိုယ်တာ ကိစ္စတွေကိုသာ တွေးကြပါတယ်”

“အီဆက်ဟာ နယူးကာဆယ်ကို ပြောင်းရွှေ့ပြီးကတည်းက အရာအားလုံးကို ပေးဆပ်ခဲ့ခြင်းမရှိဘူးလို့ သင် မပြောနိုင်ပါဘူး။ တချို့အသင်းဖော်တွေကသာ ကြီးမားတဲ့ အသင်းတစ်ခုက ကမ်းလှမ်းလာတဲ့အခါ တစ်နှစ်နေမယ်ဆိုတာမျိုး မပြောဘဲ သူ့လိုမျိုး လုပ်ဆောင်ဖို့ အားပေးကောင်း အားပေးနိုင်ပါတယ်။နောက်ဆုံးတော့ နယူးကာဆယ်က သူ့ကို ထွက်ခွာခွင့် ပေးသင့်ပါတယ်” လို့ ဂါးလက်စ်က ပြောဆိုသွားပါတယ်။