တူရကီဘောလုံးလောကကို လူတွေစိတ်ဝင်စားလာအောင် လုပ်ဆောင်ပေးမယ်လို့ မော်ရင်ဟို ပြောကြား
ဖီနာဘာချီ အသင်းနည်းပြသစ် မော်ရင်ဟိုက အင်တာဗျူးမှာ တူရကီလိဂ်ကို လူအများစိတ်ဝင်စားလာအောင် လုပ်ဆောင်ပေးမယ်လို့ ပြောကြားလိုက်ကာ လာမယ့်ရာသီ တူရကီအမှတ်ပေးချန်ပီယံအပြင် ချန်ပီယံလိဂ်အတွက်ပဲ ပြင်ဆင်သွားမယ်လို့ ဆိုပါတယ်။
“အရာအားလုံးထဲက တစ်ခုတည်းသောအရာဖြစ်တဲ့ ကျွန်တော်နဲ့အတူ စိတ်ဝင်စားမှုတွေ ယူဆောင်လာပါတယ်။ လူတွေ တူရကီလိဂ်ကို ပိုစိတ်ဝင်စားလာအောင် လုပ်ဆောင်ပေးသွားမှာပါ။ တူရကီမြေကို လာခဲ့တာက တူရကီစူပါလိဂ်အတွက် အလုပ်လုပ်ပေးဖို့ပါ။ ဒါပေမယ့် ဖီနာဘာချီအတွက်တော့ ပိုပြီးအခြေခံကျစေဖို့ပါ။ တူရကီလိဂ်က နေရာတိုင်းကနေ တိုးတက်အောင် လုပ်ဆောင်ပေးချင်တဲ့ ဆန္ဒရှိပါတယ်။ ဒါပေမယ့် ကျွန်တော် ဖီနာဘာချီကို ကာကွယ်ဆိုတဲ့အသံကြားရမယ်ဆိုရင် ၂ ကြိမ်စဉ်းစားမှာမဟုတ်ပါဘူး”လို့ မော်ရင်ဟိုက ပြောကြားခဲ့ပါတယ်။
ပြီးခဲ့တဲ့ရာသီတုန်းက တူရကီလိဂ်ဟာ အငြင်းပွားဖွယ်ရာတွေရှိခဲ့ပြီး ဖီနာဘာချီနဲ့ ဂါလာတာစာရေးတို့ကြားမှာ ချန်ပီယံဆုအတွက် အားပြိုင်မှုတွေ ရှိခဲ့တာဖြစ်ပါတယ်။ မော်ရင်ဟိုဟာ ရိုးမားအသင်းကနေ အထုတ်ခံခဲ့ရပြီးနောက် ၆ လအကြာမှာ ဖီနာဘာချီ အသင်းထံ ၂ နှစ်စာချုပ်နဲ့ ပြောင်းရွှေ့လာခဲ့ပါတယ်။ ဒါပေမယ့် ဖီနာဘာချီ ပရိသတ်တွေကိုတော့ ချန်ပီယံဆုအတွက် အာမခံချက်မပေးခဲ့တာဖြစ်ပါတယ်။
ဖီနာဘာချီဟာ ၂၀၁၃ - ၁၄ ရာသီပြီးကတည်းက ချန်ပီယံဆုနဲ့ လွဲချော်နေတာဖြစ်ပြီး နောက်ဆုံးချန်ပီယံဆုက ၂၀၁၄ တုန်းက တူရကီစူပါဖလားရရှိခဲ့တာဖြစ်ပါတယ်။
“ကျွန်တော် ဖီနာဘာချီ ပရိသတ်တွေကိုတော့ ချန်ပီယံဆုအတွက် ကတိမပေးနိုင်ပါဘူး။ ဒါပေမယ့် အသင်းအတွက် အာရုံစိုက်မှုအပြည့်နဲ့ သေချာလေးလုပ်ဆောင်ပေးသွားမယ်ဆိုတာတော့ ကတိပေးနိုပါတယ်။ ဒီလိုနည်းလမ်းနဲ့ဖော်ပြပြီး အလုပ်လုပ်ပေးသွားမှာပါ။ ဒီအသင်းအကျီက ကျွန်တော့်အရေပြားနဲ့ဆက်စပ်နေပါပြီ။ အဲ့တာက စိတ်ခံစားချက်ဖြစ်သလို ကျွန်တော့်စိတ်ပိုင်းဆိုင်ရာကိုလည်း ပြသနေပါတယ်။ ကျွန်တော် ဒီအသင်းမှာအားလုံးရှိစေချင်ပါတယ်။ အဓိကပစ်မှတ်က တူရကီစူပါလိဂ်ဖလားရယူနိုင်ဖို့ပါ”လို့ မော်ရင်ဟိုက ပြောကြားခဲ့ပါတယ်။
ဖီနာဘာချီဟာ ၁ ပွဲပဲ အရေးနိမ့်ခဲ့ပေမယ့် အခုနှစ်မှာတော့ ဂါလာတာစာရေးရဲ့နောက် အဆင့် ၂ နေရာမှာ ရာသီသိမ်းခဲ့တာဖြစ်ပါတယ်။ ချန်ပီယံလိဂ်စည်းမျည်းအသစ်ကြောင့် ဖီနာဘာချီအနေနဲ့ ခြေစစ်ပွဲတော့ ကန်ရဦးမှာဖြစ်ပါတယ်။ မော်ရင်ဟိုဟာ ၂၀၀၄ ကတည်းက ဥရောပထိပ်တန်း ၅ လိဂ်မှာ တာဝန်ယူခဲ့တာဖြစ်ပြီး ပေါ်တိုကနေ ထွက်ခွာပြီးနောက် ချဲလ်ဆီးထံပြောင်းရွှေ့ခဲ့ကာ အဲ့နောက် အင်တာ၊ ရီးရဲလ်၊ ယူနိုက်တက်နဲ့ တော့တင်ဟမ်တို့မှာ တာဝန်ထမ်းဆောင်ခဲ့ပါတယ်။
မော်ရင်ဟိုရဲ့စွမ်းဆောင်ရည်ကောင်းတွေကြောင့် ဖီနာဘာချီပရိသတ်တွေက အောင်မြင်မှုတွေ ရယူနိုင်လိမ့်မယ်လို့ မျှော်လင့်နေကြပါတယ်။
