အိမ်ကွင်းမှာ အဲလက်စ် အိုင်ဝိုဘီက ဖူလ်ဟမ်အတွက် ဦးဆောင်ဂိုး သွင်းယူခဲ့ပြီးနောက် ချဲလ်ဆီးတို့ဟာ နောက်ထပ် စိတ်ပျက်ဖွယ်ရလဒ်တစ်ခုကို ရင်ဆိုင်ရတော့မယ့် အနေအထားမှာ ရှိနေခဲ့ပါတယ်။ ဒါပေမဲ့ တိုင်ရစ် ဂျော့ခ်ျရဲ့ နောက်ကျဂိုး (သူ့ရဲ့ ပရီးမီးယားလိဂ်မှာ ပထမဆုံးဂိုး) က ချေပဂိုးကို ရရှိစေခဲ့ပြီး ပက်ဒရို နက်တိုက ၉၃ မိနစ်မှာ အနိုင်ဂိုး သွင်းယူခဲ့တာကြောင့် အနိုင် သုံးမှတ်ကို စတမ်းဖို့ဒ်ဘရစ်ချ်ဆီ ပြန်လည်ယူဆောင်လာနိုင်ခဲ့ပါတယ်။

ချန်ပီယံလိဂ်ဝင်ခွင့်အတွက် ကြိုးပမ်းနေတဲ့ ချဲလ်ဆီးအတွက်တော့ ဒါဟာ အရေးပါတဲ့ အနိုင်ပွဲတစ်ခုဖြစ်ပြီး ဒီရလဒ်ကြောင့် သူတို့ဟာ အမှတ်ပေးဇယားရဲ့ အဆင့် ၅ သို့ တက်လှမ်းနိုင်ခဲ့ကာ နော်တင်ဟမ်ဖောရက်စ်၊ အက်စတွန်ဗီလာတို့နဲ့ ရမှတ်တူသွားခဲ့ပါတယ်။ ဒါပေမဲ့ ဒါဟာ လွယ်ကူတဲ့ပွဲတော့ မဟုတ်ခဲ့ဘဲ မာရက်စ်ကာဟာ ပထမပိုင်းပြီးချိန်မှာ အဓိက ပြောင်းလဲမှုတစ်ခုကို လုပ်ဆောင်ခဲ့ရပြီး ရုန်းကန်နေရတဲ့ အသင်းခေါင်းဆောင် ရီးစ် ဂျိမ်းစ်ကို ဂတ်စတိုနဲ့ လူစားလဲခဲ့ပါတယ်။

နောက်ခံလူဟာ ခြေစွမ်းကောင်းမွန်ခဲ့ပေမယ့် နောက်ဆုံးမိနစ်ပိုင်းအနည်းငယ်အလိုမှာ လူစားလဲခံခဲ့ရတာကြောင့် စိုးရိမ်ဖွယ်ရာ မြင်ကွင်းတွေ ဖြစ်ပေါ်ခဲ့ပြီး သူ့နေရာမှာ အဒါရာဘီယိုယိုက ဝင်ရောက်ကစားခဲ့ပါတယ်။ ပြင်သစ်သားရဲ့ အခြေအနေနဲ့ပတ်သက်ပြီး မေးမြန်းရာမှာ မာရက်စ်ကာက သူ့ရဲ့ ခြေစွမ်းကို ချီးကျူးခဲ့ပေမယ့် ရာသီကုန်ဖို့ ပွဲအနည်းငယ်သာ ကျန်တော့တာကြောင့် သူ့ရဲ့ ဒဏ်ရာအတွက် စိုးရိမ်နေပုံရပါတယ်။ “မကောင်းပါဘူး။ ကံမကောင်းစွာနဲ့ ကြွက်သားဒဏ်ရာပုံစံမျိုးနဲ့တူပါတယ်” လို့ နည်းပြက ပွဲအပြီး သတင်းစာရှင်းလင်းပွဲမှာ ပြောကြားခဲ့ပါတယ်။

“ပထမ မိနစ် ၂၀ မှာ ကျွန်တော်တို့ ကောင်းကောင်းစတင်နိုင်ခဲ့ပေမယ့် ကံမကောင်းစွာနဲ့ ဂိုးပေးလိုက်ရတယ်။ ပြီးတော့ မဖြစ်မနေ အနိုင်ရရမယ့်ပွဲမျိုးမှာ ကစားသမားတွေအတွက် မလွယ်ပါဘူး” လို့ သူက BBC Match of the Day ကို ပြောကြားခဲ့ပါတယ်။ “ဒါဟာ ပိုခက်ခဲလာပေမယ့် ဒုတိယပိုင်းမှာ ကျွန်တော်တို့ နည်းဗျူဟာပိုင်းအရလည်း အပြောင်းအလဲတချို့ လုပ်ခဲ့ပြီး ပိုကောင်းလာခဲ့တယ်။ မာလို ဂတ်စတိုကို အတွင်းပိုင်းမှာ ထားကစားတာက ကျွန်တော်တို့ကို ပိုပြီး လှုပ်ရှားမှုအားကောင်းစေခဲ့တယ်"

“သူဟာ ပထမနေ့ကတည်းက ကျွန်တော်တို့အတွက် အံ့သြစရာကောင်းလောက်အောင် လုပ်ဆောင်ပေးနေပြီး ဒုတိယပိုင်းမှာ ကျွန်တော်တို့ ပိုကောင်းခဲ့ပါတယ်” လို့ မာရက်စ်ကာက ဆိုပါတယ်။ ချဲလ်ဆီးအသင်းမှာ ပရီးမီးယားလိဂ်ပွဲစဉ်ကစားရန် ငါးပွဲသာ ကျန်ရှိတော့ပြီး ထိပ်ဆုံးငါးသင်းပြိုင်ဘက်တွေဖြစ်တဲ့ နယူးကာဆယ်၊ နော်တင်ဟမ်ဖောရက်စ်တို့နဲ့ ခက်ခဲတဲ့ပွဲတွေအပြင် မကြာခင် ချန်ပီယံဖြစ်တော့မယ့် လီဗာပူးနဲ့လည်း ကစားဖို့ရှိပါတယ်။

သူတို့ဟာ ဆွီဒင်ကလပ်နဲ့ ကွန်းဖရန့်လိဂ် ဆီမီးဖိုင်နယ်ကို ကစားဖို့ရှိပြီး မေ ၂၈ ရက်နေ့မှာ ပိုလန်နိုင်ငံ ဝရော့ကလောမြို့မှာ ဗိုလ်လုပွဲ ကစားဖို့လည်း အလားအလာရှိပါတယ်။ ဒါ့အပြင် မာရက်စ်ကာက အသင်း‌ခေါင်းဆောင် ဂျိမ်းစ်ကို ပထမပိုင်းအပြီးမှာ လူစားလဲခဲ့တာဟာ ကြိုတင်စီစဉ်ထားတာဖြစ်ပြီး နည်းဗျူဟာပိုင်းအရ ဒါမှမဟုတ် ဒဏ်ရာကြောင့် မဟုတ်ဘူးလို့လည်း ဖွင့်ဟခဲ့ပါတယ်။ “သူက လွန်ခဲ့တဲ့ နှစ်ရက်တုန်းက မိနစ် ၉၀ ကစားခဲ့ပြီး ဒီနေ့မှာ ၄၅ မိနစ် ကစားခဲ့တယ်” လို့ အီတလီသားက ထပ်လောင်းပြောကြားခဲ့ပါတယ်။

“ဒါဟာ အရေးကြီးတဲ့ အချိန်အခါတစ်ခုပါ၊ ဘာလို့လဲဆိုတော့ ကျွန်တော်တို့ သူ့ကို သုံးရက်တစ်ကြိမ် ကစားစေနိုင်တော့မှာပါ။ သူ့ကို လူစားလဲခဲ့တဲ့ အကြောင်းရင်းကတော့ သူက လွန်ခဲ့တဲ့ရက်အနည်းငယ်တုန်းက မိနစ် ၉၀ ကစားခဲ့လို့ပါ” လို့ မာရက်စ်ကာက ရှင်းပြခဲ့ပါတယ်။