ပြီးခဲ့တဲ့ ၆ လအတွင်း ချဲလ်ဆီးရဲ့ စိတ်ဓာတ်တက်ကြွဖွယ်ရာ ခြေစွမ်းကြောင့် ကျွမ်းကျင်သူအများအပြားက လာမယ့်ရာသီတွင် ဖလားဆွတ်ခူးရန် အလားအလာရှိသူအဖြစ် သတ်မှတ်ခဲ့ကြပါတယ်။ ချဲလ်ဆီးဟာ ရာသီရဲ့ နောက်ဆုံးနေ့တွင် ချန်ပီယံလိဂ်ဝင်ခွင့် ရရှိခဲ့ပြီး ကွန်ဖရန့်လိဂ်ကိုလည်း ဆွတ်ခူးခဲ့ပါတယ်။ အားလပ်ရက်များအတွင်းတွင် ချဲလ်ဆီးဟာ ကလပ်ကမ္ဘာ့ဖလားကိုလည်း အနိုင်ရရှိခဲ့ပါတယ်။

ငွေကြေးအမြောက်အမြား သုံးစွဲတဲ့ အနောက်လန်ဒန်အသင်းဟာ ယခုနွေရာသီတွင် နည်းပြ အန်ဇို မာရက်စ်ကာရဲ့ အသင်းကို ကစားသမားသစ်များဖြစ်တဲ့ ဂျာအို ပက်ဒရို၊ လီယမ် ဒီလက်ပ်၊ ဂျေမီ ဂစ်တန်းစ် နှင့် ဂျော်ရယ်လ် ဟာတိုတို့ဖြင့် အင်အားဖြည့်တင်းခဲ့ပါတယ်။ ချဲလ်ဆီးဟာ လိုက်ပ်ဇစ်မှ ဇာဗီ ဆိုင်းမွန်စ်နှင့် ယူနိုက်တက် တောင်ပံကစားသမား အလက်ဂျန်ဒရို ဂါနာချိုတို့ကို ခေါ်ယူရန် ကြိုးပမ်းနေတာကြောင့် အပြောင်းအရွှေ့မပိတ်မီ လုပ်ငန်းများ ပိုမိုလုပ်ဆောင်နိုင်ဖွယ်ရှိနေပါတယ်။

လက်ရှိ ဂိုးသမား ဆန်ချက်ဇ်ဟာ အမှားများ မကြာခဏ ပြုလုပ်တတ်တာကြောင့် ဂျေမီ ကာရေဂါက ချဲလ်ဆီးရဲ့ ငွေကြေးအမြောက်အများ သုံးစွဲခြင်းဟာ ဂိုးသမားသစ်တစ်ဦးကို မခေါ်ယူနိုင်သရွေ့ ပရီးမီးယားလိဂ်ဖလား ရရှိမှာမဟုတ်ဘူးလို့ သံသယရှိနေပါတယ်။ ချဲလ်ဆီးဟာ နွေရာသီအစောပိုင်းက ပြင်သစ်နံပါတ် ၁ ဂိုးသမား မိုက်ခ် မိုင်နန်ကို ခေါ်ယူရန် ဆွေးနွေးခဲ့သော်လည်း အေစီမီလန် နှင့် ဆွေးနွေးမှုများ ပျက်ပြားသွားခဲ့ပါတယ်။

The Overlap တွင် စကားပြောကြားရာ၌ လီဗာပူးလ်နှင့် အင်္ဂလန် နောက်ခံလူဟောင်း ကာရေဂါက "ယူနိုက်တက်က ပီတာ ရှမိုက်ကယ် ကို ခေါ်ယူပြီးနောက် လိဂ်ဖလားတွေ စတင်ရရှိခဲ့ပါတယ်" "ကျွန်တော် ကလေးဘဝက အဲဗာတန် နဲ့ နဗီးလ် ဆောက်သိုလ် ကို သတိရပါတယ်။ မန်စီးတီးက ဂိုးသမားပြောင်းပြီး လိဂ်ဖလားတွေ စတင်ရရှိခဲ့ပါတယ်။ ကျွန်တော်တို့ အလီဆင်ကို ခေါ်ယူပြီး လိဂ်ဖလားတွေ စတင်ရရှိခဲ့ပါတယ်။ ချဲလ်ဆီးက ပီတာ ဆက်ခ်ျ ကို ခေါ်ယူပြီးမှ လိဂ်ဖလားတွေ စတင်ရရှိခဲ့ပါတယ်"

"ဒါကြောင့် ချဲလ်ဆီးက လိဂ်ဖလားကို မရနိုင်သေးတာပါ။ ချဲလ်ဆီး ဘာလုပ်လုပ်၊ ဘယ်လောက်ပဲ ပိုက်ဆံသုံးသုံး၊ သူတို့မှာ လိဂ်ဖလားရရှိအောင် လုပ်ပေးနိုင်မယ့် ဂိုးသမား မရှိဘူးဆိုရင် လိဂ်ဖလားကို မရနိုင်ပါဘူး" လို့ ပြောပါတယ်။ ဂိုးသမားများရဲ့ အရေးပါမှုနှင့်ပတ်သက်၍ မန်ချက်စတာယူနိုက်တက် ဂန္ထဝင်ကစားသမား ပေါလ် စခိုးလ်စ်ကလည်း "ဂိုးသမားတွေအကြောင်းကို လုံလောက်အောင် ပြောဆိုမှု မရှိဘူးလို့ ကျွန်တော် ထင်ပါတယ်။ ပြီးခဲ့တဲ့နှစ်က အကောင်းဆုံးအသင်းကို ကြည့်လိုက်ပါ၊ သူတို့မှာ ကမ္ဘာ့အကောင်းဆုံး ဂိုးသမား ရှိပါတယ်။ အီဒါဆင်က မန်စီးတီးအတွက် စိုးရိမ်စရာဖြစ်တယ်၊ ဂျိမ်းစ် ထရက်ဖို့ဒ်က အဖြေဖြစ်မယ်လို့လည်း ကျွန်တော် မထင်ပါဘူး"

"ဘောလုံးကို ထိန်းချုပ်ပြီး ကစားတာက ဒီဘက်ခေတ်မှာ အဓိက အစိတ်အပိုင်းတစ်ခု ဖြစ်လာပေမဲ့ ကျွန်တော်ကတော့ ဒါဟာ ဒုတိယအဆင့်ပဲလို့ ထင်ပါတယ်။ သင်ဟာ ဂိုးတိုင်မှာ ကောင်းနေဖို့ လိုအပ်ပါသေးတယ်" "ကျွန်တော် အလီဆင် ကို ကြည့်လိုက်ရင် သူ့ကို ဘယ်လို ဂိုးသွင်းရမယ်ဆိုတာ မသိဘူး။ ပရီးမီးယားလိဂ်က တခြားဘယ်ဂိုးသမားနဲ့မှ ဒီလို မခံစားရပါဘူး" လို့ ပြောကြားခဲ့ပါတယ်။ ချဲလ်ဆီး၏ နံပါတ် ၁ ဂိုးသမားကို မေးခွန်းထုတ်သလိုပင် ကာရေဂါက ကလပ်ရဲ့ နွေရာသီခေါ်ယူမှုများနှင့်ပတ်သက်၍လည်း သံသယများ ထုတ်ဖော်ပြောကြားခဲ့ပါတယ်။

"ချဲလ်ဆီးကို ကြည့်လိုက်တဲ့အခါ ကလပ်ကမ္ဘာ့ဖလားမှာ သူတို့ လုပ်ခဲ့တာကို ကျွန်တော် တွေးမိပါတယ်၊ လူတိုင်း အဲဒါကို အနိုင်ရချင်ခဲ့ကြပါတယ်" "ရီးရဲလ်မက်ဒရစ်က အနိုင်ရချင်ခဲ့တယ် ပီအက်စ်ဂျီ ကလည်း အနိုင်ရချင်ခဲ့တယ်၊ မန်စီးတီးကလည်း အနိုင်ရချင်ခဲ့တယ်။ ကျွန်တော်တို့ အကောင်းဆုံးအသင်းတွေအဖြစ် သတ်မှတ်ထားတဲ့ အသင်းအားလုံးပါပဲ" "ဒါကြောင့် ဒါဟာ ကြီးမားတဲ့အရာတစ်ခုဖြစ်ပြီး မာရက်စ်ကာနဲ့ ပရိသတ်တွေကြား ဆက်ဆံရေးကို တည်ဆောက်နိုင်မယ်လို့ ကျွန်တော် ထင်ပါတယ်။ ပြီးခဲ့တဲ့ရာသီကတော့ ဒီလို ဆက်ဆံရေးမျိုး မရှိခဲ့ပါဘူး"

"ဒါပေမဲ့ ဒါက ချဲလ်ဆီးကို ဖလားနဲ့ ပိုနီးစပ်စေမယ်လို့တော့ ကျွန်တော် မထင်ပါဘူး။ ချဲလ်ဆီးက ပြီးခဲ့တဲ့ နှစ်အနည်းငယ်အတွင်း လုပ်ခဲ့တဲ့ လုပ်ငန်းတွေကို ကြည့်လိုက်ရင် ကစားသမား အများအပြား ပြောင်းလဲနေပေမဲ့ ဘယ်သူကမှ အဆင့်ကို မြှင့်တင်နိုင်တာမျိုး မရှိဘူးလို့ ခံစားရပါတယ်" "ကိုးလ် ပါလ်မာက အံ့ဩစရာကောင်းခဲ့တယ်ဆိုတာ ကျွန်တော် သိပါတယ်။ ဒါပေမဲ့ တောင်ပံကစားသမားအားလုံးက တစ်ပုံစံတည်း ဖြစ်နေပါတယ်။ ပြီးပြည့်စုံတဲ့ ဥပမာတစ်ခုက ဂျေမီ ဂစ်တန်းစ် ဝင်လာပြီး မာဒူကီထွက်ခွာသွားတာပါပဲ၊ ဘာမှ အဆင့်မြှင့်တင်မှု မရှိပါဘူး။ အဲဒီအရာကို ချဲလ်ဆီးရဲ့ နေရာအတော်များများမှာ ကျွန်တော် တွေ့ရပါတယ်" လို့ ကာရေဂါက ပြောကြားထားပါတယ်။