အာဆင်နယ်အသင်းကို ချန်ပီယံလိဂ်ကွာတားဖိုင်နယ်ပို့ဆောင်ပေးနိုင်ခဲ့ပြီးနောက် တောင်ပံကစားသမား စတာလင်က သူ့အနေနဲ့ အာဆင်နယ်ရဲ့ဒီရာသီချန်ပီယံဆုအိပ်မက်အတွက် အရေးပါတဲ့နေရာကနေ ပါဝင်နေဆဲလို့ ယုံကြည်နေပါတယ်။ အင်္ဂလန်သားဟာ ပီအက်စ်ဗွီကို ၂-၂ သရေကျခဲ့တဲ့ပွဲမှာ အာဆင်နယ်ရဲ့သွင်းဂိုး ၂ ဂိုးစလုံးကို ဖန်တီးပေးနိုင်ခဲ့ပါတယ်။

အဆိုပါစွမ်းဆောင်ရည်ကြောင့် စတာလင်ဟာ ချန်ပီယံလိဂ်မှာ မတူညီတဲ့အသင်း ၄ သင်းနဲ့ ဂိုးပါဝင်ပတ်သက်နိုင်တဲ့ ပထမဆုံးအင်္ဂလိပ်ကစားသမားဖြစ်လာခဲ့ပါတယ်။ အသက် ၃၀ နှစ်သားဟာ ချန်ပီယံလိဂ်မှာ ၄၆ ဂိုးအထိ ပါဝင်ပတ်သက်ထားပြီး သူ့ထက်ပါဝင်ပတ်သက်တဲ့သူတွေအဖြစ် ဘက်ခမ်းက ၅၂ ဂိုး ၊ ကိန်းက ၅၀ ဂိုး ၊ ရွန်းနီက ၄၇ ဂိုးပါဝင်ပတ်သက်ထားပါတယ်။
“အသင်းကို ကူညီပေးနိုင်တာက တကယ်ကောင်းပါတယ်။ ကျွန်တော် ဘာလုပ်နိုင်လဲဆိုတာ ကျွန်တော်သိပါတယ်။ ခင်ဗျားကစားချင်တယ်ဆိုရင် ထိပ်တန်းအသင်းတစ်သင်းမှာ အခိုက်အတန့်တစ်ခုကို စောင့်ရပါတယ်။

အဲ့တာက အခုကျွန်တော်လုပ်နေတာပါ။ ကျွန်တော် ယုံကြည်မှုရှိနေဆဲဖြစ်သလို အသင်းရဲ့အရေးပါတဲ့ကစားသမားအဖြစ်ရှိနေဆဲလို့ ယုံကြည်ပါတယ်။ ခင်ဗျားလုပ်နိုင်တာကိုပဲ ခင်ဗျားထိန်းချုပ်နိုင်ဖို့ လိုအပ်ပါတယ်။ ကျွန်တော့်မှာ မိနစ်အများကြီးမရပေမယ့် ကျွန်တော် အခွင့်အရေးရလာရင် အသုံးချရတာကို ကြိုက်ပါတယ်။ ကျွန်တော့်ကိုယ်ကျွန်တော်ယုံကြည်မှုရှိသလို ကျွန်တော် ဒီမှာအများကြီးကစားခဲ့ရပါတယ်။ ၁၀ မိနစ်လည်းရှိသလို ၄၅ မိနစ် ဒါမှမဟုတ် ပွဲဦးထွက်လည်းရခဲ့ပါတယ်။

ကျွန်တော် အဆင်သင့်ဖြစ်အောင်လုပ်ဆောင်ပြီး ကြိုးစားနေသလို အသင်းကိုလည်း ကူညီပေးချင်ပါတယ်။ မှန်ပါတယ်။ ပရီးမီးယားလိဂ်မှာက အမှတ်ပြတ်ခဲ့ပေမယ့် မတူညီတဲ့အခြေအနေတွေရှိနေပါတယ်။ ကောင်လေးတွေ အကောင်းဆုံးလုပ်ဆောင်ပြီး ဒီရာသီပိတ်အတွက် သေချာလေးတွန်းအားပေးမယ်လို့ ကျွန်တော်ထင်ပါတယ်”လို့ စတာလင်က ပြောကြားခဲ့ပါတယ်။
စတာလင်ဟာ အာဆင်နယ်အသင်းရဲ့ ဝက်စ်ဟမ်း နဲ့ နော်တင်ဟမ်ပွဲတွေမှာ ပါဝင်ခွင့်ရခဲ့ပေမယ့် ခြေစွမ်းကောင်းပြသနိုင်ခြင်းမရှိတာဖြစ်ပါတယ်။

အဆိုပါအခြေအနေကြောင့် ယူနိုက်တက်ကို ၁-၁ သရေကျခဲ့တဲ့ပွဲမှာ စတာလင်တစ်ယောက် အရန်ခုံမှာပဲ ပါဝင်လာခဲ့ပါတယ်။ နယူးကာဆယ် နဲ့ အိုင်ယာလန်စတားဟောင်း ရှေးဂစ်ဗန်းကတော့ စတာလင်ရဲ့ပီအက်စ်ဗွီနဲ့ပွဲက စွမ်းဆောင်ဟာ အာတီတာအတွက် တွေးစရာဖြစ်လာစေတယ်လို့ ယုံကြည်နေပါတယ်။“စတာလင်က ပွဲကြီးကစားသမားပါ။ သူက ပရီးမီးယားလိဂ် ချန်ပီယံဖြစ်သလို စီးတီးနဲ့လည်း အကောင်းဆုံးလုပ်ဆောင်ထားနိုင်ပါတယ်။ ချဲလ်ဆီးမှာ အလုပ်မဖြစ်ခဲ့သလို အာဆင်နယ်မှာလည်း အလုပ်မဖြစ်ပေမယ့် အခွင့်အရေးရလာနိုင်ပါတယ်။
အာဆင်နယ်မှာ တိုက်စစ်မှူးပြဿနာရှိနေပါတယ်။ အဲ့တာက သူ့အတွက် အခွင့်အရေးဖြစ်လာနိုင်ပြီး မနေ့ညကပွဲမှာ သူဘယ်လောက်ကောင်းလဲဆိုတာ မြင်ခဲ့ရပါတယ်”လို့ ဂစ်ဗန်းက ပြောကြားခဲ့ပါတယ်။