လီဗာပူးအသင်းမှာ အနာဂတ်မရေမရာဖြစ်နေတဲ့ ဗန်ဒိုက်နဲ့ပတ်သက်လို့ နယ်သာလန်နည်းပြရော်နယ်ကိုးမန်းက လတ်တလောသိရှိထားရတဲ့ သတင်းအချက်အလက်ကြီးတစ်ခုကို ချပြလာခဲ့ပါတယ်။ ဗန်ဒိုက်က အန်ဖီးလ်မှာ စာချုပ်သက်တမ်းသုံးလသာ ကျန်ရှိပြီး ကလပ်အသင်းနဲ့စာချုပ်သစ်ဆွေးနွေးမှု အပြီးမသတ်နိုင်သေးပါဘူး။ လီဗာပူးကပ္ပတိန်ရဲ့အနာဂတ် မရေမရာဖြစ်နေချိန်မှာပဲ နယ်သာလန်နည်းပြရော်နယ်ကိုးမန်းက လက်ရွေးစင်အသင်းလေ့ကျင့်ရေးကွင်းအတွင်း နောက်ခံလူနဲ့ စကားစမြည်ပြောဆိုပြီးနောက် တန်ဖိုးရှိတဲ့နောက်ဆုံးရသတင်းအချက်အလက်တစ်ခုကို ဝေမျှလာခဲ့ပါတယ်။

အင်္ဂါနေ့သတင်းစာရှင်းလင်းပွဲအတွင်း ၂၀၂၆ ကမ္ဘာ့ဖလားပြိုင်ပွဲနောက်ပိုင်းကာလတွေအထိ လီဗာပူးနဲ့အတူ ဗန်ဒိုက်ဆက်ရှိနေဖို့ မျှော်လင့်ထားသလားဆိုတဲ့မေးခွန်းကို ရော်နယ်ကိုးမန်းက “ လီဗာပူးနဲ့ ဗန်ဒိုက်လက်မှတ်ရေးထိုးတာပဲဖြစ်ဖြစ်၊ အခြားအသင်းကြီးတစ်ခုဆီ ပြောင်းရွှေ့သွားတာပဲဖြစ်ဖြစ် ဒါတွေအားလုံးက ကျွန်တော့်အတွက်တော့ ကောင်းပါတယ်။ ဘာတွေဖြစ်လာမလဲဆိုတာ စောင့်ကြည့်သွားကြတာပေါ့။ ဗန်ဒိုက်ဆီကနေ ကျွန်တော်နားလည်လိုက်တဲ့အချက်ကတော့ သူဟာ အခုရရှိနေတဲ့အဆင့်အတန်းမျိုးကို ဆက်ပြီးထိန်းထားချင်နေတယ်ဆိုတာပဲ ဖြစ်ပါတယ်”လို့ တုံ့ပြန်ဖြေဆိုပါတယ်။

ပြီးခဲ့တဲ့တနင်္ဂနွေနေ့၊ နာကျင်စရာကာရာဘောင်ဖလားဗိုလ်လုပွဲအပြီးမှာလည်း ဗန်ဒိုက်က သူ့ရဲ့အနာဂတ်နဲ့ပတ်သက်လို့ “ ရာသီကုန်မတိုင်ခင်အထိ ဒါတွေက သတင်းတွေအဖြစ်ပဲ ဆက်ရှိနေပါဦးမယ်။ ကျွန်တော်ကတော့ ကလပ်အသင်းကို သစ္စာအပြည့်ရှိပြီး ရှေ့လာမယ့်စိန်ခေါ်မှုတွေပေါ်မှာပဲ အပြည့်အ၀ အာရုံစိုက်ထားပါတယ်။ ကျွန်တော် ဒီကလပ်အသင်းကို ချစ်ပါတယ်။ ဒါ အဓိကအချက်ဖြစ်ပါတယ်”လို့ ပြောပါတယ်။

ဒတ်ချ်ဗဟိုခံစစ်မှူးက နှစ်ကျော့ယှဉ်ပြိုင်ကစားရမယ့် နေးရှင်းလိဂ်ကွာတားဖိုင်နယ်ပွဲစဉ်အဖြစ် စပိန်အသင်းနဲ့ရင်ဆိုင်ဖို့ အစွမ်းကုန်ပြင်ဆင်နေပါတယ်။ ဒီပွဲစဉ်တွေကို မတ် ၂၀ ရက်နဲ့ မတ် ၂၃ ရက်တို့မှာ ယှဉ်ပြိုင်ကစားကြဖို့ စီစဉ်ထားပါတယ်။