ချဲလ်ဆီးအသင်းနည်းပြမာရက်စ်ကာက အက်စ်တာနာကို သက်သောင့်သက်သာဖြင့် အနိုင်ယူခဲ့တဲ့ပွဲစဉ်အပြီး အသင်းအတွက် ပွဲဦးထွက်ပါဝင်ကစားခဲ့တဲ့ အာချီအမ်ပေါင်၊ တိုင်ရီကွီဂျော့ရှ်နဲ့ ဆမ်မြူရယ်ရက်ခ်ဆာကီတို့ကို ဂုဏ်ပြုချီးကျူးစကားဆိုခဲ့ပါတယ်။

မာရက်စ်ကာက လွန်ခဲ့တဲ့သီတင်းပတ်၊ တော့တင်ဟမ်နဲ့ပွဲစဉ်မှ တစ်ဦးတည်းသောကစားသမားအဖြစ် နက်တိုကိုသာ အခုယူရိုပါကွန်ဖရန့်လိဂ်ပွဲစဉ်အတွက် ပွဲထွက်စေခဲ့ပြီး ပွဲထွက်ကစားသမား ၁၀ နေရာအထိ အပြောင်းအလဲပြုလုပ်လာခဲ့ပါတယ်။ ကာဇက်စတန်ရဲ့ပြင်းထန်လှတဲ့ ရာသီဥတုအခြေအနေအောက်မှာပဲ လူငယ်အားပြုဖွဲ့စည်းလာတဲ့ချဲလ်ဆီးအသင်းက အကောင်းဆုံးခြေစွမ်းပြနိုင်ပြီး ပြိုင်ဘက်အက်စ်တာနာကို ၃-၁ ဂိုးဖြင့် အနိုင်ယူခဲ့ပါတယ်။

အခုပွဲစဉ်အတွင်း စီနီယာအသင်းအတွက် ပထမဆုံးအကြိမ်ပွဲထွက်လာတဲ့ အင်္ဂလန်လူငယ်ခံစစ်မှူး အာချီအမ်ပေါင်ရဲ့ခြေစွမ်းက တိုင်ရီကွီဂျော့ရှ်၊ ဆမ်မြူရယ်ရက်ခ်ဆာကီတို့လိုပဲ ချဲလ်ဆီးအသင်းနည်းပြရဲ့ အထူးသဘောကျနှစ်ခြိုက်မှုကို ရရှိခဲ့ပါတယ်။ အထူးသဖြင့် အခက်အခဲတွေပြည့်နှက်နေတဲ့ အခြေအနေအောက်မှာ လူငယ်ကစားသမားလေးတွေရဲ့သက်သောင့်သက်သာစီးမျောနိုင်မှုကို မြင်တွေ့ရလို့ အီတာလျံလူမျိုးနည်းပြ အလွန်အားရကျေနပ်နေခဲ့ပါတယ်။

ပွဲစဉ်အပြီး သတင်းထောက်တွေနဲ့တွေ့ဆုံချိန် အသက်-၄၄ နှစ်အရွယ်နည်းပြက “သူတို့အားလုံးရဲ့စွမ်းဆောင်ရည်ကို ကျွန်တော် သဘောကျပါတယ်။ အခုပွဲစဉ်မှာ ပွဲဦးထွက်အဖြစ် ပါဝင်ကစားခဲ့တဲ့ တိုင်ရီကွီဂျော့ရှ်၊ ဆမ်မြူရယ်ရက်ခ်ဆာကီနဲ့ အာချီအမ်ပေါင်တို့လည်း အရမ်းကောင်းခဲ့ပါတယ်။ သူတို့တွေအတွက် အရမ်းပျော်ရွှင်မိပါတယ်။ ဒုတိယပိုင်းမှာပါဝင်ကစားလာသူတွေအတွက်လည်း ဒီအတိုင်းပါပဲ။ ဒါကြောင့် ကျွန်တော် သူတို့အတွက် ကျေနပ်အားရပျော်ရွှင်မိပါတယ်”လို့ ပြောပါတယ်။

လတ်တလောပြိုင်ပွဲစုံနောက်ဆုံးခြောက်ပွဲဆက်အနိုင်ရရှိခဲ့တဲ့ လန်ဒန်အခြေစိုက်ကလပ်အသင်းက လာမယ့်တနင်္ဂနွေနေ့၊ စတမ်းဖို့ဒ်ဘရစ်ချ်မှာ ဘရန့်ဖို့ဒ်နဲ့ ပရီးမီးယားလိဂ်ပွဲစဉ်ကို ယှဉ်ပြိုင်ကစားသွားရပါမယ်။