ဘိုင်ယန် နဲ့ ကနေဒါစတား အယ်လ်ဖွန်ဆိုဒေးဗီးစ်တစ်ယောက် အမေရိကန်အသင်းနဲ့ပွဲရဲ့အစောပိုင်းမှာ လူစားလဲခံခဲ့ရပြီး အရွတ်ကြောဒဏ်ရာရရှိခဲ့တယ်လို့ သိရပါတယ်။ ကွန်ကာကက်ဖ်နေးရှင်းလိဂ်တတိယနေရာအတွက် ကနေဒါနဲ့အမေရိကန်တို့အားပြိုင်ခဲ့ရပြီး ကနေဒါအသင်းက ၂-၁ နဲ့အနိုင်ရရှိခဲ့ပေမယ့် ပွဲကစားချိန် ၁၂ မိနစ်မှာ ညာဘက်ခြေထောက် မသက်မသာဖြစ်လာတာကြောင့် ဒေးဗီးစ်တစ်ယောက် ကွင်းထဲကနေ ထွက်ခွာခဲ့ရပါတယ်။

အဲ့နောက် အဝတ်လဲခန်းထဲကို ချက်ချင်းဝင်သွားခဲ့ပြီး အရန်ခုံကိုပြန်လာထိုင်ခဲ့ပေမယ့် ညာဘက်ဒူးကို ရေခဲပတ်လာခဲ့ရတာဖြစ်ပါတယ်။ ဘိုင်ယန်က အခုချိန်မှာ ကနေဒါသားဟာ အရွတ်ကြောဒဏ်ရာရရှိခဲ့တာဖြစ်ပြီး ကာလရှည်နားရနိုင်တယ်လို့ အတည်ပြုခဲ့ပါတယ်။ ဒါ့အပြင် နောက်ခံလူ အူပါမီကာနိုလည်း ဒူးဒဏ်ရာရရှိနေတာကြောင့် နည်းပြ ကွန်ပနီအတွက် ခေါင်းခဲစရာဖြစ်လာခဲ့ပါတယ်။ အူပါမီကာနိုဟာ ခရိုအေးရှားနဲ့ပွဲမှာ မိနစ် ၁၂၀ လုံးပါဝင်ကစားခဲ့တာဖြစ်ပြီး အခုချိန်မှာတော့ ဒဏ်ရာရရှိနေခဲ့တာဖြစ်ပါတယ်။

“ဘိုင်ယန်အနေနဲ့ အယ်လ်ဖွန်ဆိုမပါပဲ ကာလရှည်ကန်ရတော့မှာဖြစ်ပါတယ်။ အူပါတစ်ယောက်လည်း ကာလရှည်နားရနိုင်ပါတယ်။ ဒေးဗီးစ်အခြေအနေက ညာဘက်ဒူးဒဏ်ရာရရှိခဲ့တာဖြစ်ပါတယ်။ ဒီနေ့မှာ ခွဲစိတ်မှုခံယူမှာဖြစ်ပြီး ကာလရှည်နားရနိုင်ပါတယ်။ အူပါလည်း အတူတူပါပဲ”လို့ ဘိုင်ယန်က ကြေညာချက်ထုတ်ပြန်ခဲ့ပါတယ်။

ဘိုင်ယန်အားကစားဒါရိုက်တာ မက်စ်ကလည်း “ကံမကောင်းစွာနဲ့ ကျွန်တော်တို့ကစားသမားတွေ နိုင်ငံတကာရက်သတ္တပတ်မှာ ဒဏ်ရာရခဲ့ကြပါတယ်။ ဘိုင်ယန်အတွက်တော့ သူတို့မပါပဲကန်ရမှာက ခက်ခဲနိုင်ပါတယ်။ ဆေးအဖွဲ့ကတော့ သူတို့ လိုအပ်တာတွေကို ထောက်ပံ့ပေးသွားမှာပါ။ အူပါအခြေအနေကိုလည်း ကျွန်တော်တို့ သေချာလေးစောင့်ကြည့်နေပါတယ်။ မကြာခင်မှာ သူပြန်လာနိုင်ဖို့ မျှော်လင့်ပါတယ်။

ကျွန်တော်တို့မှာ သူတို့မပါဝင်နိုင်ပေမယ့် တောင့်တင်းတဲ့လူအင်အားရှိပါတယ်။ကျွန်တော်တို့ အတူတူလုပ်ဆောင်ဖို့ လိုအပ်ပါတယ်။ အရည်အချင်းကောင်းတွေနဲ့အတူ လိုချင်တဲ့ပစ်မှတ်တွေဆီကိုသွားရပါမယ်”လို့ မက်စ်က ပြောကြားခဲ့ပါတယ်။ ကွန်ပနီရဲ့ဘိုင်ယန်အသင်းဟာ အဓိကဂိုးသမား နူအာကိုလည်း လက်လွှတ်ထားရပြီး ပြန်လည်ကြံ့ခိုင်မှုရအောင် လုပ်ဆောင်နေရတာဖြစ်ပါတယ်။

ဘိုင်ယန်ဟာ လက်ရှိမှာ ချန်ပီယံလိဂ်အပြင် ဘွန်ဒက်စ်လီဂါချန်ပီယံဆုကိုလည်း ရယူနိုင်ဖို့ အလားအကောင်းနေပါတယ်။ လာမယ့်စနေနေ့မှာ ဘိုင်ယန်ဟာ စိန့်တ်ပေါလီအသင်းနဲ့ရင်ဆိုင်ရမှာဖြစ်ပါတယ်။