စပိန်လက်ရွေးစင်နည်းပြ လူးဝစ်ဒီလာဖွန်တေက တနင်္လာနေ့က နယ်သာလန်ကို ပင်နယ်တီအဆုံးအဖြတ်နဲ့အနိုင်ရခဲ့တဲ့ ယူအီးအက်ဖ်အေနေရှင်းလိဂ် ကွာတားဖိုင်နယ်ဒုတိယအကျော့ပွဲစဉ်မှာ အသင်းအား နောက်တစ်ဆင့်တက်ရောက်စေခဲ့တဲ့ အဆုံးအဖြတ်ပင်နယ်တီကို ကန်သွင်းယူပေးခဲ့တဲ့ ပီဒရီဟာ ဉာဏ်ကြီးရှင်တစ်ယောက်ဖြစ်တယ်လို့ ချီးကျူးပြောဆိုလာခဲ့ပါတယ်။ 

ပထမအကျော့က ၂-၂ နဲ့သရေကျခဲ့တဲ့ စပိန်နဲ့ နယ်သာလန်တို့ဟာ ဒုတိယအကျော့မှာလည်း ၃-၃ နဲ့သရေကျနေခဲ့တာကြောင့် ပင်နယ်တီအဆုံးအဖြတ်ခံယူပြီးနောက်မှာတော့ စပိန်က ၅-၄ နဲ့အနိုင်ပြီး ဆီမီးဖိုင်နယ်သို့ တက်လှမ်းနိုင်ခဲ့တာဖြစ်ပါတယ်။ 

ပွဲအပြီးမှာ ဖွန်တေက "အချိန်ပိုနဲ့ ပင်နယ်တီအဆုံးအဖြတ်တွေအထိ ကစားရတာက အခုလိုပြိုင်ပွဲတွေရဲ့ တန်ဖိုးတစ်ခုပါပဲ။ အရမ်းကောင်းတဲ့ပွဲဖြစ်ခဲ့ပြီး နည်းပြတွေထက်စာရင် ပရိသတ်တွေက ပိုပျော်ပါလိမ့်မယ်။ အသင်းရဲ့ခြေစွမ်းက အရမ်းကောင်းခဲ့ပါတယ်။ ကျွန်တော်တို့အသင်းက ရည်မှန်းချက်ကြီးမားပြီး အနိုင်ရလိုစိတ်ပြင်းထန်ပါတယ်" လို့ပြောကြားခဲ့ပါတယ်။ 

လာမိုင်းယာမယ်လ်ရဲ့ပင်နယ်တီလွဲချော်မှုနဲ့ပတ်သက်ပြီးတော့လည်း ဖွန်တေက "လောလောဆယ်မှာတော့ ယာမယ်လ်က သူ့ကိုယ်သူစိတ်ပျက်နေပါတယ်။ ဒါပေမယ့် သူပျော်လည်းပျော်ပါတယ်။ အသင်းရဲ့လိုအပ်ချက်ကို သူအပြည့်အဝထောက်ပံ့ပေးနိုင်ခဲ့ပါတယ်။ ဒါပေမယ့် အခုထက်ပိုပြီး ရင့်ကျက်ဖို့တော့လိုအပ်ပါသေးတယ်။ သူ့ရဲ့စွမ်းဆောင်ရည်ကို ကျွန်တော်ကျေနပ်ပြီးသားပါ" လို့ပြောကြားခဲ့ပါတယ်။ 

ပီဒရီကို လူစားလဲဝင်ရောက်စေခြင်းနဲ့ပတ်သက်ပြီးတော့လည်း စပိန်သားနည်းပြက "ပီဒရီကိုထည့်ခဲ့တာ နည်းဗျူဟာကြောင့်ပါ။ အဲဒီအချိန်မှာ သူဝင်ကစားသင့်ပြီလို့ ကျွန်တော်တို့ထင်ခဲ့ပါတယ်။ ပီဒရီက ဉာဏ်ကြီးရှင်တစ်ယောက်ပါ" လို့ပြောကြားခဲ့ပါတယ်။ 

မီရီနို၊ အိုယာဇာဘယ်တို့နဲ့ပတ်သက်ပြီးတော့ ဖွန်တေက "သူတို့က ယုံကြည်စိတ်ချရတဲ့အဆင့်အတန်းမှာရှိနေတဲ့ ကစားသမားတွေပါ။ သူတို့မှာ ထူးခြားတဲ့ ဘောလုံးပါရမီတွေရှိကြပါတယ်။ ရင့်ကျက်ပြီး အဆင့်အတန်းမြင့်တဲ့စွမ်းဆောင်ရည်တွေကို အမြဲတမ်းထိန်းသိမ်းထားကြပါတယ်။ ကွင်းတွင်းကွင်းပြင် လေးစားစရာကောင်းတဲ့လူတွေပါ။ အသင်းတည်ငြိမ်နေတာ သူတို့ကြောင့်ပါပဲ" လို့ပြောကြားခဲ့ပါတယ်။ 

နောက်ခံလူမင်ဂူဇာကို ပွဲထုတ်အသုံးပြုခဲ့ခြင်းနဲ့ပတ်သက်ပြီးတော့ ဖွန်တေက "ကျွန်တော်တို့အသင်းကို အပြောင်းအလဲလေး နည်းနည်းလုပ်ချင်ခဲ့ပါတယ်။ မင်ဂူဇာက ဘောလုံးအမြင်ကောင်းကောင်းရှိပါတယ်။ ပြီးတော့ ပွဲကိုလည်း ဖတ်နိုင်ပါတယ်။ ဒီပွဲမှာ ၃-၀ လောက်နဲ့အနိုင်ရဖို့ မျှော်လင့်ထားခဲ့ပေမယ့် အရမ်းခက်ခဲခဲ့ပါတယ်" လို့ပြောကြားခဲ့ပါတယ်။ 

ပင်နယ်တီနဲ့ပတ်သက်ပြီးတော့လည်း ဖွန်တေက "ကျွန်တော်တို့ ပထမဆုံးကစားသမား ၅ ယောက်ကို ရွေးလိုက်ပါတယ်။နောက်မှ ၆ ယောက်မြောက်အဖြစ် ပီဒရီကိုရွေးခဲ့တာပါ။အသင်းမှာ ပင်နယ်တီနဲ့ပတ်သက်ပြီးတော့လည်း ကောင်းကောင်းလေ့ကျင့်ထားပြီး အသေးစိတ်အချက်အလက်လေးတွေကအစ ပြင်ဆင်ထားပါတယ်။ ဒါပေမယ့် ဒီပွဲမှာက ကစားသမားတွေရဲ့စိတ်ဓာတ်နဲ့ စွမ်းဆောင်ရည်က အရေးအကြီးဆုံးဖြစ်ခဲ့ပါတယ်"

"အသင်းမှာ ဘယ်တော့မှ အကန့်အသတ်ဆိုတာမရှိပါဘူး။ နိုင်ငံ့လက်ရွေးစင်အသင်းက အရမ်းငယ်ရွယ်ပြီး ရှည်လျားတဲ့သမိုင်ကြောင်းရှိပါတယ်။ အရေးကြီးတာက ကစားသမားတွေရဲ့စိတ်ဓာတ်ပါပဲ။ သူတို့က ယှဉ်ပြိုင်လိုစိတ်ပြင်းထန်ပြီး၊ အနိုင်ရလိုကြပါတယ်။ ဒီအသင်းက ကစားသမားတွေကို ကျွန်တော်အချိန်အကြာကြီးအလိုရှိပေမယ့် အမြဲတမ်းတော့အသင်းက နိုင်နေမှာမဟုတ်ပါဘူး" လို့ထပ်လောင်းပြောကြားခဲ့ပါတယ်။