အင်္ဂလန်အသင်းနဲ့ ဝရက်ဇ်ဟမ်းအသင်းရဲ့ ဂိုးသမားဟောင်း ဘင်ဖော်စတာက အာဆင်နယ်ဂိုးသမား ရမ်စ်ဒေးဟာ လက်ရှိမှာ အင်္ဂလန်နိုင်ငံရဲ့အကောင်းဆုံး ဂိုးသမားဖြစ်ကြောင်းချီးကျူးပြောဆိုခဲ့ပြီး ဒေးဗစ်ရာယာကိုခေါ်ယူခဲ့တဲ့ အာဆင်နယ် အသင်းကို ပြင်းပြင်းထန်ထန်ဝေဖန်လိုက်တာဖြစ်ပါတယ်။ ရက်သတ္တပတ်များစွာအကြာ ဆွေးနွေးညှိနှိုင်းမှုများအပြီးမှာ အာဆင်နယ်အသင်းဟာ ဘရန့်ဖို့ဒ်ဂိုးသနား ဒေးဗစ်ရာယာကို အငှားစာချုပ်နဲ့ ပေါင် ၃ သန်း အကုန်ကျခံကာခေါ်ယူနိုင်ခဲ့ပြီး စာချုပ်ပါသဘောတူညီချက်အရ ဂိုးသမားကို ပေါင် ၂၇ သန်းနဲ့ အပြီးသတ်ဝယ်ယူခွင့်လည်းရရှိထားတာဖြစ်ပါတယ်။

ပြီးခဲ့တဲ့ စနေနေ့မှာ အာဆင်နယ်ဟာ အိမ်ကွင်းမှာ ဖူလ်ဟမ်အသင်းကို ၂-၂ နဲ့သရေ ရလဒ်သာ ရယူနိုင်ခဲ့ပြီး ရမ့်စ်ဒေးရဲ့ စွမ်းဆောင်ရည်ကိုလည်း ဝေဖန်မှုတွေပြုလုပ်ခဲ့ကြတာကြောင့် အာတီတာအနေနဲ့ ဒေးဗစ်ရာယာကို နံပါတ် ၁ ဂိုးသမားအဖြစ် စတင်ပွဲထုတ်သွားဖို့ မျှော်လင့်နေတယ်လို့ သတင်းတွေထွက်ပေါ်လာတာဖြစ်ပါတယ်။ သို့သော် ဝရက်ဇ်ဟမ်းနဲ့ အင်္ဂလန်လက်ရွေးစင်ဂိုးသမားဟောင်း ဖော်စတာက ရမ်စ်ဒေးရဲ့အနောက်မှာ ခိုင်ခိုင်မာမာရပ်တည်နေပြီး အာတီတာအနေနဲ့ ရာယာကို မလိုအပ်ဘဲ ခေါ်ယူခဲ့တာဖြစ်တယ်လို့ ဝေဖန်ပြောဆိုခဲ့တာဖြစ်ပါတယ်။

၎င်းရဲ့ယူကျုချန်နယ်မှတစ်ဆင့် ဖော်စတာက "ကျွန်တော်ဒါကိုမကြိုက်ပါဘူး။ သနားစရာကောင်းတယ်လို့ထင်ပါတယ်။ ဒါကလုံးဝမဖြစ်သင့်တဲ့အရာတစ်ခုပါ။ သူတို့ ဒေးဗစ်ရာယာကို ခေါ်ယူစရာအကြောင်းကိုမရှိပါဘူး။ ရမ့်စ်ဒေးဟာ ထိပ်တန်းဂိုးသမားအဖြစ် ၂ နှစ်ကြာရပ်တည်ထားနိုင်ခဲ့တာပါ။ သူက အင်္ဂလန်အသင်းရဲ့ နံပါတ် ၁ ဂိုးသမား ဂျော်ဒန်ပစ်ဖို့ဒ်နဲ့  အဆင့်အတန်းတစ်ခုတည်းမှာ ရှိနေတာပါ။ သူ့ကိုယ်သူ ယုံကြည်မှုပြည့်ပြည့်ဝဝရှိပြီး မန်နေဂျာကလည်း သူ့ဘက်မှာ ရှိမယ်ဆိုရင် ရမ်စ်ဒေးလောက်ကောင်းတဲ့ဂိုးသမား အင်္ဂလန်မှာမရှိပါဘူး"လို့ပြောကြားခဲ့တာဖြစ်ပါတယ်။

အာဆင်နယ်အသင်းနည်းပြ အာတီတာအနေနဲ့လည်း အတိတ်မှာပြုလုပ်ခဲ့ဖူးတဲ့ ရမ်စ်ဒေးရဲ့အမှားတွေကို သက်ညှာမှုတွေပြုလုပ်ခဲ့ပေးဖူးပြီး ၎င်းအနေနဲ့ အသင်းရဲ့ ကစားသမားအင်အားကို ၂ သင်းစာအလိုရှိနေတာကြောင့် ‌နေရာတိုင်းအတွက် ကစားသမားတွေကို ၂ ဦးစီဖြည့်တင်းထားတာဖြစ်ပါတယ်။ အာဆင်နယ်ဟာ စက်တင်ဘာလ ၃ ရက်နေ့မှာ စတုတ္ထမြောက် ပရီးမီးယားလိဂ်ပွဲစဉ်အဖြစ် အိမ်ကွင်း အမ်းမရိတ်မှာ မန်ချက်စတာယူနိုက်တက်အသင်းနဲ့ ယှဉ်ပြိုင်သွားရမှာဖြစ်ပြီး အာတီတာအနေနဲ့ ပွဲထွက်ဂိုးသမားအဖြစ် ရမ့်စ်ဒေးကိုပဲဆက်လက်ရွေးချယ်သွားမှာလား ဒါမှမဟုတ် ဒေးဗစ်ရာယာကို စတင်ပွဲထုတ်သွားမှာလားဆိုတာ စောင့်ကြည့်သွားရမှာဖြစ်ပါတယ်။