အာဆင်နယ်နည်းပြ မီကယ်အာတီတာက ယနေ့နံနက် ဘရန့်ဖို့ဒ်ကို ၂-၀ နဲ့ အနိုင်ရခဲ့တဲ့ပွဲမှာ ကစားသမားနှစ်ဦး ဒဏ်ရာထပ်ရခဲ့ပြီးနောက် စံချိန်တင်ပွဲစဉ်ဇယားကို အပြစ်တင်ခဲ့ပါတယ်။ အာဆင်နယ်တို့ဟာ မီကယ်မီရီနိုနဲ့ လူစားဝင်ကစားသမား ဘူကာယိုဆာကာတို့ရဲ့ သွင်းဂိုးတွေနဲ့ အမှတ်ပေးဇယားထိပ်ဆုံးမှာ ၅ မှတ်အသာနဲ့ ဦးဆောင်နိုင်ခဲ့ပေမဲ့ ခရစ်စတီယန်မော့စကွီရာနဲ့ ဒီကလန်ရိုက်စ်တို့ နှစ်ဦးစလုံးကို ဒဏ်ရာကြောင့် လူစားလဲခဲ့ရပါတယ်။

အာဆင်နယ်ဟာ စနေနေ့မှာလည်း Aston Villa ကို သွားရောက်ရင်ဆိုင်ရမှာဖြစ်တဲ့အတွက် အနားယူချိန်နည်းပါးနေပါတယ်။ အာဆင်နယ်ရဲ့ ကြံ့ခိုင်မှုပြဿနာတွေနဲ့ပတ်သက်ပြီး အာတီတာက "ဒါဟာ တစ်ခုတည်းသော အကြောင်းအရာတော့ မဟုတ်ပါဘူး။ ဒါပေမဲ့ ကျွန်တော်တို့ ကစားသမားတွေနဲ့ လိဂ်ထဲက လူတိုင်းကို ကူညီနိုင်ပါတယ်။ ကျွန်တော်တို့ လုပ်သင့်တာကို လုပ်ဆောင်နိုင်ပါတယ်။

ဥရောပမှာ ပွဲအများကြီးကစားနေရတဲ့ အသင်းတွေအတွက် နောက်ထပ်တစ်ရက် အနားယူချိန်ပေးပါ။ အားလုံးအတွက် ကျွန်တော်တို့ အဲဒါကို လုပ်နိုင်မယ်လို့ ထင်ပါတယ်။ ဘာလို့လဲဆိုတော့ အားလုံးအတွက် အကျိုးရှိမှာဖြစ်လို့ပါ။ ပရီးမီးယားလိဂ်မှာတင်မဟုတ်ဘဲ နိုင်ငံတကာပြိုင်ပွဲအားလုံးမှာပါ ဒီလိုပွဲစဉ်ဇယားမျိုး ကျွန်တော်တို့ ဘယ်တုန်းကမှ မကြုံခဲ့ဖူးပါဘူး။ ဒါကြောင့် ကျွန်တော်တို့ တတ်နိုင်ရင် အဲဒါကို လုပ်ဖို့ ကြိုးစားရပါမယ်။

ဒါက သာမန်အသိပါပဲလို့ ကျွန်တော်ထင်ပါတယ်။ တစ်ချိန်ချိန်မှာ ဒါက များလွန်းလာပါလိမ့်မယ်။ ကစားသမားတွေက စက်ရုပ်တွေမဟုတ်ပါဘူး။ ဒါပေမဲ့ ကျွန်တော်တို့ တတ်နိုင်သမျှ လုပ်ဆောင်ဖို့ ကြိုးစားရပါမယ်"လို့ ပြောခဲ့ပါတယ်။ အာတီတာက ဒီရာသီ မီရီနိုရဲ့ မထင်မှတ်ထားတဲ့ စွမ်းဆောင်မှုတွေကြောင့် နွေရာသီက ခေါ်ယူထားတဲ့ ဗစ်တာယောကရက်စ်ကို လက်ရှိကစားသမားတွေနဲ့ ဘယ်လိုတွဲပေးရမလဲဆိုတာ စိုးရိမ်ပူပန်နေမယ့်အစား လက်ရှိအခြေအနေမှာ ပိုနေထိုင်တတ်လာအောင် သင်ခန်းစာယူခဲ့ရတယ်လို့ ဝန်ခံခဲ့ပါတယ်။

အာတီတာက"ဒါက သင်ခန်းစာတစ်ခုလို့ ကျွန်တော်ထင်ပါတယ်။ ဒီသင်ခန်းစာကို ကျွန်တော်ယူခဲ့ရပါတယ်။ ဘာလို့လဲဆိုတော့ နွေရာသီတစ်လျှောက်လုံး ကျွန်တော်စဉ်းစားနေခဲ့တာက တိုက်စစ်မှူးတစ်ယောက်ခေါ်လိုက်ရင် ဂျီးဆပ်စ်နဲ့ ကိုင်ဟာဗက်ဇ်တို့ ဘယ်လိုဖြစ်သွားမလဲပေါ့။ ကျွန်တော့်မှာ တိုက်စစ်မှူးတွေ အများကြီးရှိခဲ့ပါတယ်။

ကျွန်တော် သူတို့ကို အရမ်းသဘောကျပါတယ်။ ကောင်းပြီ၊ ကျွန်တော်တို့ ဘာလုပ်ကြမလဲ? ဒီကိစ္စကို ဘယ်လိုကိုင်တွယ်ကြမလဲ? သူတို့ ဒဏ်ရာရခဲ့တာကြောင့် အခုချိန်ထိတော့ ပြဿနာမရှိခဲ့ပါဘူး။ ဒါကြောင့် ပစ္စုပ္ပန်မှာနေထိုင်ပါ၊ အခိုက်အတန့်မှာ နေထိုင်ပါ၊ အခြေအနေဖြစ်လာတဲ့အခါ ကိုင်တွယ်ပါ" လို့ ပြောကြားခဲ့ပါတယ်။