သတင်းတွေအရ အာဆင်နယ်ဟာ အခုလာမယ့်နွေရာသီမှာ ကစားသမားအယောက် ၂၀ အထိ ရှင်းထုတ်မယ်လို့ သိရပါတယ်။ အာဆင်နယ်ဘက်က အဆိုပါသတင်းကို အတည်ပြုခဲ့တာဖြစ်ပြီး အမျိုးသားအသင်းအပြင် အမျိုးသမီးအသင်း နဲ့ အကယ်ဒမီကစားသမားတွေပါ ပါဝင်တယ်လို့ သိရပါတယ်။

လက်ရှိကွင်းလယ်လူ ပါတေးကိုတော့ စာချုပ်သစ်ချုပ်ဆိုဖို့ ဆွေးနွေးနေပါတယ်။အာဆင်နယ်ရှင်းထုတ်မယ့်ကစားသမားတွေထဲမှာ ဂျော်ဂျင်ဟို ၊ တီယာနေး ၊ စတာလင် ၊ နက်တို ၊ အိုယီဒီဂျေ ၊ ဖရန့်စစ်တို့ ပါဝင်နေသလို အမျိုးသမီးအသင်းထဲက လီနာ ၊ ဂိုလ်ဒီ ၊ အာမန်ဒါတို့ ပါဝင်နေပါတယ်။

ပါတေးကို အာတီတာက အသင်းမှာဆက်ထိန်းထားချင်နေပြီး အမျိုးသမီးအသင်းက ကယ်လီ နဲ့ အကယ်ဒမီစတား ရိုဆက်တို့ကိုလည်း စာချုပ်သစ်အတွက် ဆွေးနွေးနေပါတယ်။ “မှန်ပါတယ်။ ဒီရာသီက သူ့ရဲ့အကောင်းဆုံးရာသီလို့ ကျွန်တော်ထင်ပါတယ်။ သူကစားပြခဲ့တာ ၊ စွမ်းဆောင်ပြခဲ့တာ နဲ့ ပါဝင်နိုင်မှုက ထိပ်တန်းအဆင့်မှာရှိခဲ့ပါတယ်။ သူက ကျွန်တော်တို့အတွက် အရေးပါတဲ့ကစားသမားဖြစ်ခဲ့ပါတယ်”လို့ အာတီတာက ပြောကြားခဲ့ပါတယ်။

အာဆင်နယ်ဟာ ကွင်းလယ်ခံစစ်နေရာအတွက် ဇူဘီမန်ဒီကိုခေါ်ယူထားနိုင်ခဲ့ပေမယ့် ပါတေးကိုပါ ဆက်ထိန်းထားချင်နေပါတယ်။ အခုနွေရာသီမှာ နောက်ထပ်ကစားသမားတွေဖြစ်တဲ့ ရစ်ဆီ ၊ အက်ဒ်ဝါ့တ် ၊ ဖစ်ရှာ ၊ ဖော့ဒ် ၊ ဂိုဝါ ၊ မက်စ် ၊ ဆာလက် ၊ အစ္စမေးလ် ၊ အိုကွန်ကို ၊ အီလီယန် ၊ ရှာအစ်တို့လည်း ထွက်ခွာမှာဖြစ်ပါတယ်။

အာဆင်နယ်ဘက်ကတော့ အသင်းကနေထွက်ခွာတော့မယ့်ကစားသမားတွေကို အနာဂတ်မှာအောင်မြင်ပါစေလို့ ဆုတောင်းပေးခဲ့ပြီး အသင်းအတွက်အကျိုးပြုခဲ့တာတွေအတွက် ကျေးဇူးတင်စကားဆိုခဲ့ပါတယ်။ အာဆင်နယ်ဟာ ၃ ရာသီဆက်ဒုတိယနေရာနဲ့သာ ရာသီသိမ်းနိုင်ခဲ့ပြီးနောက် အခုနွေရာသီမှာ အလုပ်များတော့မှာဖြစ်ပါတယ်။ လက်ရှိတိုက်စစ်ပိုင်းအတွက် ဆက်စ်ကို နဲ့ ယိုကရက်စ်တို့ကိုလည်း ချိတ်ဆက်နေပါတယ်။