
ချန်ပီယံလိဂ်ဗိုလ်လုပွဲမှာ ဗင်နီးစီးယက်စ် ဂိုးသွင်းနိုင်ရန် ဘာတွေလုပ်ပေးခဲ့သလဲဆိုတာ ရှင်းပြလိုက်တဲ့ အန်ဆယ်လော့တီ
ဒေါ့မွန်ကိုကျော်ဖြတ်ပြီး ရယူနိုင်ခဲ့တဲ့ ချန်ပီယံလိဂ်အောင်ပွဲမှာ သွင်းဂိုးရယူနိုင်ဖို့အတွက် ဗင်နီးစီးယက်စ်ကို ရီးရဲလ်မက်ဒရစ်နည်းပြအန်ဆယ်လော့တီက အနည်းငယ်ဆူပူကြိမ်းမောင်းခဲ့ရပါတယ်။
ဒီနေ့မနက်အစောပိုင်း၊ လန်ဒန်မြို့၊ ဝင်ဘာလေကွင်းကြီးမှာ ရီးရဲလ်မက်ဒရစ်က ဂျာမန်ဘွန်ဒက်စ်လီဂါကလပ်ကို ၂-၀ ဂိုးဖြင့် အနိုင်ယူပြီး သူတို့အသင်းအတွက် ၁၅ ကြိမ်မြောက် ချန်ပီယံလိဂ်ဆုဖလားကြီးကို သိမ်းပိုက်နိုင်ခဲ့ပါတယ်။ ဒီပွဲစဉ်ရဲ့ ပထမပိုင်းပွဲချိန်အတွင်း မက်ဒရစ်အခြေစိုက်ကလပ်ဟာ ပြိုင်ဘက်ရဲ့ဖိအားပေးမှုတွေကို ရင်ဆိုင်ခဲ့ရပါတယ်။
ဒုတိယပိုင်းပွဲချိန် ၇၄ မိနစ်မှာတော့ ကာဗာဂျယ်လ်က ရီးရဲလ်မက်ဒရစ်အတွက် ဦးဆောင်ဂိုးသွင်းယူပေးခဲ့ပြီး နောက်ထပ်ကိုးမိနစ်အကြာမှာပဲ ဗင်နီးစီးယက်စ်က ပြိုင်ဘက်နောက်ခံလူအီယန်မတ်ဆန်ရဲ့ အမှားမှတဆင့် ဒုတိယမြောက်ဦးဆောင်ဂိုး ထပ်မံသွင်းယူပေးခဲ့ပါတယ်။
ဒါပေမယ့် ဗင်နီးစီးယက်စ်က ပထမပိုင်းပွဲချိန်အတွင်း ဒေါ့မွန်နောက်ခံလူဂျူလီယန်ရာဆင်ရဲ့လူကပ်ကစားမှု အောက်မှာ ခြေစွမ်းပြသနိုင်ဖို့ ရုန်းကန်ခဲ့ရပါတယ်။ ဘရာဇီးသားက ပထမပိုင်းပွဲချိန်အပြီး နည်းပြဖြစ်သူရဲ့ ကြိမ်းမောင်းမှုကို ခံယူခဲ့ရပြီးနောက် ဒုတိယပိုင်းပွဲချိန်တွေမှာတော့ ပုံမှန်ခြေစွမ်းပြန်လည်ရရှိခဲ့ပြီး ရီးရဲလ်မက်ဒရစ်ကို နောက်ဆုံးဆယ်စုနှစ်အတွင်း ခြောက်ကြိမ်မြောက်ချန်ပီယံလိဂ်ဆုဖလား ဆွတ်ခူးနိုင်အောင် ကူညီပေးခဲ့ပါတယ်။
ပွဲစဉ်အပြီး Movistar သတင်းဌာနနဲ့တွေ့ဆုံချိန် အန်ဆယ်လော့တီက “ ဗင်နီးစီးယက်စ်ကို ကျွန်တော် နည်းနည်းလောက် ဆူပူကြိမ်းမောင်းခဲ့ပါတယ်။ ပထမပိုင်းပွဲချိန်တွေအတွင်း ကျွန်တော်တို့ နည်းနည်း ပျင်းရိလေးတွဲခဲ့ပြီး ဘောလုံးဆုံးရှုံးမှုတွေ ရှိခဲ့ကာ ပြိုင်ဘက်ကို သူတို့အလိုရှိတဲ့အတိုင်း ကစားစေဖို့ ခွင့်ပြုပေးခဲ့ပါတယ်”လို့ ထုတ်ပြောလာပါတယ်။
အီတာလျံဝါရင့်နည်းပြကြီးက ရီးရဲလ်မက်ဒရစ်နည်းပြဘ၀ တတိယအကြိမ်ချန်ပီယံလိဂ်ဆုဖလားကို ဆွတ်ခူးနိုင်ခဲ့ပြီး လာမယ့်ဘောလုံးရာသီမှာလည်း သူ့အတွက် လေးကြိမ်မြောက်ချန်ပီယံဆုရရှိအောင် ကြိုးစားသွားမယ်လို့ ဝန်ခံပြောဆိုခဲ့ပါတယ်။
“ ထင်ထားထာထက် ပိုမိုခက်ခဲခဲ့တာကြောင့် ဒီလိုအောင်မြင်မှုတွေနဲ့ အသားကျနေဖို့ဆိုတာ လုံးဝမဖြစ်နိုင်ပါဘူး။ ဒီနေ့ပွဲစဉ်ရဲ့ဒုတိယပိုင်းပွဲချိန်တွေမှာလည်း ကျွန်တော်တို့အသင်းက ဟန်ချက်ညီလာပြီး ပိုကောင်းလာခဲ့သလို ဘောလုံးဆုံးရှုံးမှုတွေလည်း နည်းပါးခဲ့ပါတယ်။ ဒါက ရှင်သန်နေဆဲ အိပ်မက်တစ်ခု ဖြစ်ပါတယ်”လို့ အန်ဆယ်လော့တီက ဆက်ပြောခဲ့ပါတယ်။
လီဗာပူးနဲ့ရင်ဆိုင်ရတဲ့ ၂၀၂၁-၂၀၂၂ ချန်ပီယံလိဂ်ဗိုလ်လုပွဲမှာ တစ်လုံးတည်းသောအနိုင်ဂိုးကို သွင်းယူခဲ့တဲ့ ဗင်နီးစီးယက်စ်က သူ့ရဲ့ဒုတိယမြောက်ချန်ပီယံလိဂ်ဗိုလ်လုပွဲမှာလည်း သွင်းဂိုးရယူနိုင်ခဲ့ပါတယ်။ ဒါ့အပြင် သူက ပွဲချိန်အတွင်း တစ်ဦးချင်းဖြတ်ကျော်မှု ရှစ်ကြိမ်အထိ အောင်မြင်အောင် စွမ်းဆောင်နိုင်ခဲ့ပြီး ဒါက ၂၀၁၅ ခုနှစ်၊ ဂျူဗင်တပ်စ်နဲ့ရင်ဆိုင်ရတဲ့ ဗိုလ်လုပွဲအတွင်း မက်ဆီ (၁၀ ကြိမ်)ရဲ့စွမ်းဆောင်ရည်နောက်ပိုင်း အကောင်းဆုံးမှတ်တမ်းလည်း ဖြစ်လာခဲ့ပါတယ်။
ရီးရဲလ်မက်ဒရစ်နဲ့အတူ ဥရောပချန်ပီယံအောင်ပွဲရယူနိုင်ပြီးနောက် ဗင်နီးစီးယက်စ်က အမေရိကန်မြေမှာ ဘရာဇီးလက်ရွေးစင်အသင်းနဲ့အတူ ကိုပါအမေရိကချန်ပီယံဆုဆွတ်ခူးနိုင်ဖို့ ရည်မှန်းချက်ထားရှိနေပါလိမ့်မယ်။ ဒီပြိုင်ပွဲမှာ ဘရာဇီးအသင်းက ကော်စတာရီကာ၊ ပါရာဂွေး၊ ကိုလံဘီယာတို့နဲ့အတူ တစ်အုပ်စုတည်းကျရောက်နေပါတယ်။