ရီးရဲလ်အသင်းနည်းပြ အန်ဆယ်လော့တီက အာဆင်နယ်နဲ့ ချန်ပီယံလိဂ်ပွဲမှာ ကော်တိုရစ်ပါဝင်နိုင်မယ်လို့ ယုံကြည်နေပြီး အခုအပတ်ဗလန်စီယာနဲ့ပွဲမှာ ပါဝင်နိုင်ဖွယ်မရှိတာဖြစ်ပါတယ်။ ရီးရဲလ်ဟာ စနေနေ့ ဘာနေဗျူးမှာ ဗလန်စီယာနဲ့ကန်ရမှာဖြစ်ပြီး အန်ဆယ်လော့တီက ကော်တိုရစ်သတင်းကို အတည်ပြုခဲ့ပါတယ်။

ကော်တိုရစ်ဟာ အခုရာသီတစ်လျှောက်လုံးမှာ ဒဏ်ရာပြဿနာတွေနဲ့နပန်းလုံးနေရတာဖြစ်ပြီး နောက်ဆုံး ၂ ပွဲကို လွဲချော်ခဲ့ပါတယ်။ ဘယ်လ်ဂျီယံသားဟာ ဒီရာသီလာလီဂါမှာ ၈ ပွဲပေးဂိုးမရှိအောင် စွမ်းဆောင်ထားနိုင်ခဲ့ပြီး ဆိုစီဒက်ဂိုးသမား အဲလက်စ် ၊ တီကိုဂိုးသမား အော့လဘက်တို့က ၁၂ ပွဲစီပေးဂိုးမပေးရအောင် စွမ်းဆောင်ထားနိုင်ခဲ့ပါတယ်။ ကော်တိုရစ်တစ်ယောက် ဗလန်စီယာနဲ့ပွဲမှာ ပါဝင်မှာမဟုတ်ပဲ အန်ဆယ်လော့တီက အာဆင်နယ်နဲ့ပွဲမှာအဆင်သင့်ဖြစ်နေမယ်လို့ ယုံကြည်နေပါတယ်။

“စိုးရိမ်စရာတော့မရှိပါဘူး။ ကော်တိုရစ်အခြေအနေက ပိုကောင်းလာပါတယ်။ အင်္ဂါနေ့မှာ သူပါဝင်နိုင်မယ်လို့ ယုံကြည်ပါတယ်”လို့ အန်ဆယ်လော့တီက ပြောကြားခဲ့ပါတယ်။ အာဆင်နယ်နဲ့ပွဲမှာ ဘာပေ ၊ ရူဒီဂါတို့လည်း ပါဝင်နိုင်ဖို့ အခြေအနေကောင်းနေပါတယ်။ သူတို့ ၂ ဦးဟာ တီကိုနဲ့ပွဲမှာ မဆီလျော်တဲ့အောင်ပွဲခံမှုကြောင့် ပြစ်ဒဏ်ကျခံရဖို့များနေပါတယ်။
ဗလန်စီယာနဲ့ပွဲကို ရီးရဲလ်အနေနဲ့ ကော်တိုရစ် နဲ့ လူနင်တို့မရှိတာကြောင့် အသက် ၁၉ နှစ်သား ဂွန်ဇာလက်ဇ်ကို အသုံးပြုရဖွယ်ရှိနေပါတယ်။

“ဒီနေ့ လူနင်အခြေအနေကို စစ်ဆေးရာမှာ အဆင်မပြေပါဘူး။ ဒါကြောင့် ဂွန်ဇာလက်ဇ်ကို အသုံးပြုရဖို့ရှိနေပါတယ်။ ပြဿနာက သူငယ်ရွယ်တာပဲရှိတာပါ။ မနက်ဖြန်မှာ သူ့အချိန်တွေရောက်လာမယ်ဆိုရင် ကျွန်တော်တို့ ပျော်ရွှင်မိမှာပါ။ ဘာလို့လဲဆိုတော့ သူ့မှာ ကြီးမားတဲ့အနာဂတ်ရှိနေပါတယ်။ စိုးရိမ်စရာတွေမရှိပါဘူး”လို့ အန်ဆယ်လော့တီက ပြောကြားခဲ့ပါတယ်။

ရီးရဲလ်အသင်းဟာ ဆုဖလား ၃ လုံးလမ်းကြောင်းပေါ်မှာရှိနေဆဲဖြစ်ပြီး ဘာစီလိုနာ နဲ့ ၃ မှတ်သာကွာဟနေသလို ကိုပါဒယ်ရေးဖိုင်နယ် နဲ့ ချန်ပီယံလိဂ်မှာလည်း ကွာတားဖိုင်နယ်လမ်းကြောင်းပေါ်မှာရှိနေပါတယ်။ “ကျွန်တော်တို့ အကောင်းဆုံးလုပ်နေပါတယ်။ ယေဘုယျအားဖြင့် ဆိုစီဒက်နဲ့ပွဲတုန်းကလို အချိန်ပိုမှာ အားစိုက်ထုတ်မှုနဲ့ပတ်သက်ပြီး သံသယအချို့ရှိခဲ့ပါတယ်။ ဒါပေမယ့် အသင်းက စိတ်ဓာတ်မြင့်တက်နေပါတယ်။

ကျွန်တော်တို့ လုပ်နိုင်မယ်လို့ ယုံကြည်သလို အကောင်းလည်းမြင်ပါတယ်။ ပြိုင်ပွဲတိုင်းမှာ အရမ်းနီးစပ်နေသလို ဆုဖလားရမယ်လို့လည်း ယုံကြည်ပါတယ်”လို့ အန်ဆယ်လော့တီက ပြောကြားခဲ့ပါတယ်။