မန်ချက်စတာယူနိုက်တက် တိုက်စစ်မှူးဟောင်း လူးဝစ်ဆာဟာက ဘရူနိုဖာနန်ဒက်စ်ဟာ ပရီးမီးယားလိဂ်ဖလားကို တစ်ကြိမ်တစ်ခါမှ မကိုင်မြှောက်ဖူးတဲ့ အကောင်းဆုံးကစားသမား ဖြစ်လာနိုင်တယ်လို့ ပြောကြားလိုက်ပါတယ်။

ဖာနန်ဒက်စ်ဟာ ယူနိုက်တက်ကို ချန်ပီယံလိဂ်ဝင်ခွင့်ရရှိအောင် ဆက်လက်ဦးဆောင်နေပြီး အာဆင်နယ်က ဒက်ကလန်ရိုက်စ်နဲ့အတူ ဒီရာသီရဲ့ ပရီမီယာလိဂ် အကောင်းဆုံးကစားသမားဆု ရရှိဖို့ ရေပန်းအစားဆုံးသူတွေထဲမှာ တစ်ဦးအပါအဝင် ဖြစ်နေပါတယ်။

ပေါ်တူဂီအသင်းနဲ့အတူ မက္ကဆီကို၊ အမေရိကန်အသင်းတွေနဲ့ ကစားရမယ့် နိုင်ငံတကာပွဲစဉ်တွေအတွက် ပြင်ဆင်နေတဲ့ ဒီကွင်းလယ်လူဟာ လက်ရှိမှာ ခြေစွမ်းအထူးကောင်းမွန်နေပါတယ်။ ဒါပေမဲ့ ယူနိုက်တက်ကို ဥရောပစင်မြင့်ဆီ ပြန်လည်ပို့ဆောင်ပေးနေပေမဲ့လည်း ပရီမီယာလိဂ်ဖလားကို လွဲချော်နေရတာက သူ့စိတ်ထဲမှာ ရှိနေဦးမှာပါ။

ဆာဟာက Ozoon နဲ့ အင်တာဗျူးမှာ ဖာနန်ဒက်စ်ဟာ ပရီမီယာလိဂ်မှာ အောင်မြင်မှုအဆုံးထိ မရရှိခဲ့ဖူးတဲ့ အကောင်းဆုံးကစားသမားအဖြစ် သမိုင်းတွင်ကျန်ရစ်နိုင်တယ်လို့ ယုံကြည်နေပါတယ်။

"အခုတော့ သူ့ကို တစ်နှစ်တာ အကောင်းဆုံးကစားသမားအဖြစ် ပြောဆိုနေကြပါပြီ။ တကယ်တော့ သူဟာ ယူနိုက်တက်မှာ အမြဲတမ်း အဆင့်မြင့်မြင့် ကစားပြနေခဲ့တာပါ။ ဒါပေမဲ့ အရင်ကတော့ အခုလိုမျိုး အပြောမခံခဲ့ရပါဘူး။ သူ့အပေါ် မဟုတ်ကဟုတ်က ပြောဆိုဝေဖန်မှုတွေ အများကြီး ရှိခဲ့ပါတယ်။ ဖာနန်ဒက်စ်က ပရီမီယာလိဂ်သမိုင်းမှာ ဖလားမရဖူးတဲ့ အကောင်းဆုံးကစားသမား ဖြစ်လာနိုင်ပါတယ်။ စတီဗင်ဂျရတ်ဆိုရင်လည်း အရမ်းပြိုင်ဆိုင်မှုပြင်းထန်တဲ့ ခေတ်ကာလမှာ ကစားခဲ့ရပြီး လီဗာပူးကို ချန်ပီယံလိဂ်ဖလား ရအောင် ဦးဆောင်ပေးနိုင်ခဲ့တာပါ။ ဘရူနိုဟာ အမြဲတမ်း အပြောင်းအလဲတွေ ဖြစ်နေတဲ့ အသင်းထဲမှာ ကောင်းကောင်းကစားနိုင်ခဲ့တာကို ကျွန်တော် သတိပြုမိပါတယ်။ ဒီလိုအခြေအနေမျိုးမှာ သူလုပ်ပြနိုင်ခဲ့တဲ့အတွက် ချီးကျူးမှုတွေ အများကြီးနဲ့ ထိုက်တန်ပါတယ်။ ဖလားမရခဲ့ရင်တောင် သူ တကယ်ကို တောက်ပအောင် စွမ်းဆောင်နိုင်ခဲ့တာပါ" လို့ ဆာဟာက ပြောပါတယ်။

ပေါ်တူဂီအသင်းခေါင်းဆောင်ဟာ ဒီရာသီမှာ ယူနိုက်တက်အတွက် ပြိုင်ပွဲစုံ ၈ ဂိုးသွင်းပြီး ဂိုးဖန်တီးမှု ၁၇ ကြိမ် ပြုလုပ်ထားပါတယ်။ နောက်ရာသီမှာတော့ ဖြစ်နိုင်ချေရှိတဲ့ နည်းပြသစ် မိုက်ကယ်ကားရစ်နဲ့အတူ အသင်းကို ဖလားလမ်းကြောင်းပေါ် ရောက်အောင် သူ တွန်းတင်သွားဖို့ ရည်မှန်းထားပါလိမ့်မယ်။