အင်္ဂလန်အသင်းခေါင်းဆောင် ဟယ်ရီကိန်းကို ပရီးမီးယားလိဂ် ဒါမှမဟုတ် ဆော်ဒီပရိုလိဂ်ကလပ်တွေက စိတ်ဝင်စားနေတယ်ဆိုတဲ့ သတင်းတွေ ထွက်ပေါ်နေပေမဲ့ ဘိုင်ယန်မြူးနစ်ကတော့ သူတို့ရဲ့တိုက်စစ်မှူးဟာ စာချုပ်သစ်အတွက် လက်မှတ်ရေးထိုးလိမ့်မယ်လို့ အခိုင်အမာ ယုံကြည်နေပါတယ်။

ဟယ်ရီကိန်းဟာ ၂၀၂၃ ခုနှစ်မှာ တော့တင်ဟမ်အသင်းကနေ ဘိုင်ယန်ကို ပြောင်းရွှေ့လာခဲ့တာဖြစ်ပြီး သုံးရာသီမပြည့်ခင်မှာတင် အသင်းအတွက် သွင်းဂိုး ၁၂၃ ဂိုးအထိ သွင်းယူပေးထားနိုင်ခဲ့သူပါ။

သူ့ရဲ့ လက်ရှိစာချုပ်သက်တမ်းဟာ ၂၀၂၇ ခုနှစ်အထိ ရှိနေပြီး စာချုပ်ထဲမှာ ပေါင် ၅၇ သန်း (ဒေါ်လာ ၇၈ သန်း) နဲ့ အသင်းကနေ ထွက်ခွာခွင့်ရနိုင်တဲ့ စာချုပ်ဖျက်သိမ်းကြေး အပိုဒ်ခွဲတစ်ခု ပါဝင်နေတယ်လို့လည်း သိရပါတယ်။ ဂျာမနီကို ရောက်ရှိလာချိန်ကစလို့ ဟယ်ရီကိန်းဟာ မိုက်ကယ်အိုလီဆေး၊ မူစီယာလာ၊ ဂနာဘရီတို့နဲ့အတူ အချိတ်အဆက်မိမိ ကစားနိုင်ခဲ့ပြီး ဘိုင်ယန်ရဲ့ ခေတ်သစ်တိုက်စစ်မှူးတွေထဲမှာ အကောင်းဆုံးတစ်ဦး ဖြစ်လာခဲ့ပါတယ်။

ဘိုင်ယန်မှာ ကစားခဲ့တဲ့ ပထမဆုံးရာသီမှာ ဆုဖလားလက်မဲ့ ဖြစ်ခဲ့ပေမဲ့ ၂၀၂၄-၂၅ ရာသီမှာတော့ အင်္ဂလန်တိုက်စစ်မှူးဟာ ဘိုင်ယန်မြူးနစ်နဲ့အတူ ဘွန်ဒက်လီဂါချန်ပီယံဆုကို ဆွတ်ခူးရရှိခဲ့ပါတယ်။

ဘိုင်ယန်အားကစားဒါရိုက်တာ မက်စ်အီဘာကတော့ စာချုပ်သစ်အတွက် စကားပြောဆိုမှုတွေ ရှိနေကြောင်း အတည်ပြုခဲ့ပေမဲ့ တရားဝင် ညှိနှိုင်းမှုတွေကတော့ မစတင်ရသေးဘူးလို့ ဆိုပါတယ်။ ဒါပေမဲ့ အသက် ၃၀ အရွယ် ဟယ်ရီကိန်းနဲ့ အမြဲတစေ အနီးကပ် ထိတွေ့ဆက်ဆံမှုရှိနေတယ်လို့လည်း သူက ပြောပါတယ်။

"ကျွန်တော်တို့ စကားပြောနေကြတယ်လို့ ပြောခဲ့ဖူးပါတယ်၊ ဒါပေမဲ့ ညှိနှိုင်းမှုတွေကတော့ တရားဝင် မစတင်ရသေးပါဘူး။ ဟာရီနဲ့ ကျွန်တော်တို့ အမြဲတမ်း အနီးကပ်ရှိနေပြီး နောက်ထပ်လုပ်ဆောင်ရမယ့် အဆင့်တွေကို ဆက်လက် လုပ်ဆောင်သွားမှာပါ" လို့ မက်စ်အီဘာက ဆိုပါတယ်။