The network connection is lost.

Banner Image

ယာမယ်လ်နဲ့ သူ့ကြားထဲက ဆက်ဆံရေးအခြေအနေကို ထုတ်ဖော်ပြောကြားလာတဲ့ ကွန်ဒီ

ဘာစီလိုနာညာနောက်ခံလူ ဂျူးလက်စ်ကွန်ဒီက သူနဲ့ အသင်းရဲ့ပါရမီရှင်တောင်ပံကစားသမားလေး လာမိုင်းယာမယ်လ်တို့အကြားက ဆက်ဆံရေးအခြေအနေကို ပြောကြားလာခဲ့ပြီး သူတို့ ၂ ဦးဟာ တစ်ဦးနဲ့တစ်ဦး ကွင်းထဲမှာ နားလည်မှုအရှိဆုံး အသင်းဖော်တွေဖြစ်တယ်လို့ဆိုပါတယ်။ 

၂၀၂၂ ခုနှစ်နွေရာသီမှာ ဘာစီလိုနာသို့စတင်ရောက်ရှိလာခဲ့တဲ့ ကွန်ဒီဟာ အသင်းစတင်ရောက်ရှိချိန်က ဗဟိုခံစစ်မှူးအဖြစ် ကစားခဲ့ပေမယ့် ယခုအခါမှာတော့ ညာနောက်ခံလူအဖြစ် ယာမယ်လ်နဲ့ တွဲဖက်ကစားနေတာဖြစ်ပါတယ်။ဗဟိုခံစစ်မှူးအဖြစ်မှ ညာနောက်ခံလူအဖြစ်သို့ ပြောင်းလဲကစားတဲ့ အစပိုင်းအချိန်တွေမှာ ကွန်ဒီဟာ ခြေစွမ်းပြနိုင်ဖို့ အတော်လေးရုန်းကန်ခဲ့ရပေမယ့် ဒီရာသီမှာတော့ ယာမယ်လ်နဲ့ အတော်လေးအချိတ်အဆက်မိမိကစားထားနိုင်ပါတယ်။ 

အသက်-၂၆ နှစ်အရွယ်ကစားသမားဟာ ၂၀၂၄-၂၅ ရာသီအတွင်းမှာ ဘာစီလိုနာအတွက် ပြိုင်ပွဲစုံသွင်းဂိုး ၃ ဂိုးအထိသွင်းယူထားသလို၊ ဂိုးဖန်တီးမှုလည်း ၈ ကြိမ်အထိပြုလုပ်ပေးထားနိုင်တာဖြစ်ပါတယ်။ ဒါကြောင့် ဘာစီလိုနာဟာ ကွန်ဒီကို ကာလရှည်စာချုပ် ချုပ်ဆိုထားပြီး ကလပ်ရဲ့ပါရမီရှင်နဲ့တွဲဖက်ကစားစေဖို့ စီစဉ်ထားခဲ့တာဖြစ်ပါတယ်။ 

ယခုအခါမှာတော့ ကွန်ဒီက သူနဲ့အသက်-၁၇ နှစ်အရွယ် ယာမယ်လ်တို့ကြားက ဆက်ဆံရေးအခြေအနေကို အသိပေးပြောကြားလာခဲ့ပါတယ်။ ကစားသမားက "ကျွန်တော်က ဘယ်လိုနေရာတွေမှာ အားသာတယ်ဆိုတာ ယာမယ်လ်နဲ့ဆွေးနွေးထားခဲ့ပြီး သူ့ကိုနေရာလွတ်ရှာပေးဖို့ အဓိက ကြိုးစားရပါတယ်။ ဒါပေမယ့် သူက ကစားသမား ၂ ယောက်လောက်အထိကို ကျော်ဖြတ်နိုင်တဲ့သူဖြစ်ပြီး ကျွန်တော်နဲ့ အတော်လေးအတွဲအဖက်မိပါတယ်။ ခံစစ်ကစားတဲ့အပိုင်းမှာတော့ သူ့ရဲ့နေရာယူပုံနဲ့ပတ်သက်ပြီး ကျွန်တော်သင်ပြထားတာတွေရှိပါတယ်"

"ကျွန်တော်တို့က ကွင်းထဲမှာ တစ်ယောက်နဲ့တစ်ယောက် အတော်လေးနားလည်မှုရှိတဲ့ အသင်းဖော်တွေပါ။ တစ်ခါတလေမှာ လူတွေက မျှော်လင့်ချက်အကြီးကြီးတွေထားတတ်ကြလို့ ယာမယ်လ်က ကလေးတစ်ယောက်ပဲရှိသေးတယ်ဆိုတာ မေ့နေတတ်ကြပါတယ်။ သူက ဆယ်ကျော်သက်ကောင်လေးတစ်ယောက်ပါ။ ဟာသတွေလုပ်တတ်ပြီး ပျော်ပျော်နေတတ်ပါတယ်။ ဒါပေမယ့် ကျွန်တော်ကလည်း အဲဒီလိုလူမျိုးဆိုတော့ ကျွန်တော့်အတွက် အဆင်ပြေပါတယ်" လို့ပြောကြားခဲ့ပါတယ်။ 

ကွန်ဒီအနေနဲ့ ဘာစီလိုနာရဲ့လက်ကျန်ပွဲစဉ်တွေမှာ ယာမယ်လ်နဲ့အတူ အသင်းရဲ့တိုက်စစ်ပိုင်းကို အကူအညီတွေပေးနိုင်ဖို့ မျှော်လင့်ထားမှာဖြစ်ပြီး ဟန်ဆီဖလစ်ရဲ့အသင်းဟာ လာလီဂါမှာသာမက ကိုပါဒယ်ရေးနဲ့ ချန်ပီယံလိဂ်ပြိုင်ပွဲတွေမှာပါ အခြေအနေကောင်းနေလို့ ရာသီကုန်မှာ ဆုဖလားအောင်မြင်မှုတွေ ဘယ်လောက်အထိ ဆွတ်ခူးရရှိသွားမလဲ စောင့်ကြည့်ရပါမယ်။