ဘောလုံးရာသီကောင်းတစ်ခုကို ပိုင်ဆိုင်ခဲ့တဲ့ အက်ဇေး ဟာ မေလက ဝင်ဘာလေကွင်းမှာ ကစားခဲ့တဲ့ ဖလားဗိုလ်လုပွဲမှာ မန်စီးတီးဘက်သို့ အနိုင်ဂိုးသွင်းယူပေးခဲ့ပြီး ခရစ္စတယ်ပဲလေ့စ်အသင်းအတွက် သမိုင်းဝင် ဆုဖလားတစ်ခုကို ရယူပေးခဲ့ပါတယ်။

ပြီးခဲ့တဲ့ တနင်္ဂနွေနေ့ကလည်း အက်ဇေး ဟာ ဝင်ဘာလေကွင်းကို ပြန်လာခဲ့ပြီး နောက်ထပ် ဆုဖလားတစ်လုံး ထပ်မံရရှိခဲ့ပြန်ပါတယ်။ ခရစ္စတယ်ပဲလေ့စ်အသင်းဟာ လီဗာပူးကို ပင်နယ်တီနဲ့အနိုင်ယူပြီး ကွန်မြူနတီဒိုင်းကို ဆွတ်ခူးရယူခဲ့တာပဲ ဖြစ်ပါတယ်။

ဒါပေမဲ့ မကြာသေးခင် ရက်သတ္တပတ်တွေအတွင်းမှာတော့ တော့တင်ဟမ်နဲ့ အာဆင်နယ်တို့လို အသင်းကြီးတွေက အက်ဇေးကို အပြိုင် စိတ်ဝင်စားနေတာကြောင့် ပဲလေ့စ်အသင်းကနေ ပြောင်းရွှေ့ဖို့ သတင်းတွေ ထွက်ပေါ်နေခဲ့ပါတယ်။

အသက် ၂၇ နှစ်အရွယ်ရှိ ဘက်စုံသုံး တိုက်စစ်မှူးဖြစ်တဲ့ အက်ဇေး ဟာ တော့တင်ဟမ်အသင်းကို ပြောင်းရွှေ့ဖို့ စိတ်ဝင်စားနေတယ်လို့ သတင်းတွေ ထွက်ပေါ်ခဲ့ပေမဲ့ အပြောင်းအရွှေ့မပိတ်ခင် အာဆင်နယ်အသင်းဆီ ကမ်းလှမ်းမှုရောက်လာမယ်ဆိုရင်တော့ သေချာပေါက် ပြောင်းရွှေ့ဖို့ စဉ်းစားမှာဖြစ်တယ်လို့ သိရပါတယ်။

အင်္ဂလန်လက်ရွေးစင် ကစားသမားရဲ့ စာချုပ်မှာတော့ သောကြာနေ့အထိ အသက်ဝင်နေသေးတဲ့ ပေါင် ၆၈ သန်းတန် လျော်ကြေးငွေအချက် ပါဝင်နေတယ်လို့လည်း သိရပါတယ်။ အာဆင်နယ်နဲ့ အင်္ဂလန်တိုက်စစ်မှူးဟောင်း ဝဲလ်ကော့က အက်ဇေးရဲ့ ရွေးချယ်စရာတွေနဲ့ပတ်သက်ပြီး မေးမြန်းခံရတဲ့အခါမှာတော့ “ကျွန်တော်တို့တွေ အလေးအနက်ထား စဉ်းစားရမယ့်အချက်ကတော့ ဒါဟာ ကမ္ဘာ့ဖလား ဘောလုံးရာသီ ဖြစ်နေပါတယ်”

“ကစားသမားတစ်ယောက်အနေနဲ့ ကမ္ဘာ့ဖလား ဘောလုံးရာသီဖြစ်နေရင် ကျွန်တော်ဆိုရင်တော့ ပဲလေ့စ်အသင်းမှာပဲ ပုံမှန် ပွဲထွက်ကစားဖို့ စဉ်းစားမိမှာပါပဲ။ အက်ဇေးအနေနဲ့ကလည်း အာဆင်နယ်အသင်းကို ပြောင်းရင် ဖိအားတစ်မျိုး ရှိနေမှာ သေချာပါတယ်”

“အသင်းက ဖလားရဖို့ ရုန်းကန်နေရတဲ့ ဖိအားတွေ ရှိနေပါတယ်။ အာတီတာအနေနဲ့ ဒီနှစ်မှာ ဆုဖလားတစ်လုံးရယူဖို့ လိုအပ်နေတယ်လို့ သတင်းတွေ ထွက်နေတာလည်း ရှိပါတယ်။ ဒီအတွက် အက်ဇေးက အသင်းကို အကူအညီ ဖြစ်စေမလားဆိုတော့ သေချာပေါက် ဖြစ်စေမှာပါ။ သူက အရမ်းကို အရည်အချင်းရှိတဲ့ ကစားသမားပါ”

“ဒါပေမဲ့ သူက ကိုယ်တိုင်အတွက်ကိုရော အကူအညီ ဖြစ်စေမှာလား။ အက်ဇေးရဲ့ အားသာချက်ကတော့ သူဟာ ပဲလေ့စ်အသင်းမှာ အပတ်စဉ် ကစားနေရတာပဲ ဖြစ်ပါတယ်။ သူ့မှာ ကိုယ်ပိုင်ဟန် ရှိပါတယ်။ အန္တရာယ်ရှိတဲ့ အပေးအယူတွေကို ရဲရဲဝံ့ဝံ့လုပ်တတ်တဲ့ စတိုင်လ်မျိုး ဖြစ်ပါတယ်။ ဒီလို စွန့်စားမှုမျိုးကို ပဲလေ့စ်မှာတော့ လုပ်လို့ရပေမဲ့ အာဆင်နယ်မှာတော့ လုပ်လို့ရလိမ့်မယ် မထင်ပါဘူး” လို့ ပြောခဲ့ပါတယ်။

အက်ဇေးဟာ အာဆင်နယ်အသင်းကို ၁၀၀ ရာခိုင်နှုန်း တိုးတက်လာစေလိမ့်မယ်လို့ ဝဲလ်ကော့က ယုံကြည်နေပေမဲ့လည်း ကမ္ဘာ့ဖလားအတွက် အရေးကြီးနေချိန်မှာတော့ “မြက်ခင်းပြင်က အမြဲတမ်း စိမ်းနေတာမဟုတ်ဘူး” ဆိုတဲ့ စကားကိုလည်း သတိပေးသွားခဲ့ပါတယ်။

“သူသာ ပဲလေ့စ်မှာ ဘောလုံးရာသီကောင်းတစ်ခု ပိုင်ဆိုင်နိုင်ရင် ကမ္ဘာ့ဖလားကို သေချာပေါက် သွားရလိမ့်မယ်လို့ ကျွန်တော် ယုံကြည်ပါတယ်။ အဲ့ဒီနောက်မှာတော့ တခြားဘယ်အသင်းတွေက သူ့ကို စိတ်ဝင်စားလာမလဲဆိုတာ ကြည့်ရပါမယ်”

“ကျွန်တော်သာ အက်ဇေးဆိုရင် ကမ္ဘာ့ဖလားနှစ် ဖြစ်နေတာကြောင့် အသင်းမှာပဲ ဆက်နေဖြစ်ပါလိမ့်မယ်။ ကမ္ဘာ့ဖလား ဘောလုံးရာသီ မဟုတ်ဘူးဆိုရင်တော့ ပြောင်းရွှေ့ဖြစ်ပါလိမ့်မယ်” လို့ ဝဲလ်ကော့က ထပ်လောင်းပြောဆိုသွားပါတယ်။

“ဒါပေမဲ့ ဒီလို အခွင့်အရေးမျိုးက နောက်ထပ်တစ်ခါ မလာနိုင်တော့တာမျိုးလည်း ရှိပါတယ်။ ဒါကတော့ ကစားသမားတွေအနေနဲ့ စွန့်စားရမယ့် ကိစ္စပါပဲ” “ဒါပေမဲ့ ကျွန်တော့်အတွက်တော့ ကမ္ဘာ့ဖလားနှစ်က အရေးကြီးတဲ့နှစ်တစ်နှစ် ဖြစ်ပါတယ်။ မြက်ခင်းပြင်က အမြဲတမ်း စိမ်းနေတာမဟုတ်ဘူးဆိုတာကိုပဲ ကျွန်တော် ခံစားမိပါတယ်”

“အက်ဇေးရဲ့ ကစားဟန်ကို ပဲလေ့စ်မှာ ကစားတာကို ကျွန်တော် အရမ်းသဘောကျပါတယ်။ အာဆင်နယ်မှာဆိုရင်တော့ အရမ်းကွာခြားသွားမှာပါ။ သူက အာဆင်နယ်အသင်းကို ၁၀၀ ရာခိုင်နှုန်း တိုးတက်အောင် လုပ်ပေးနိုင်မှာပါ။ ဒါပေမဲ့ ကမ္ဘာ့ဖလားနှစ်က ကစားသမားတော်တော်များများအတွက် အရေးကြီးတဲ့ အချက်တစ်ခု ဖြစ်နေပါတယ်” လို့ ဝဲလ်ကော့က ဆက်ပြောခဲ့ပါတယ်။

ဝဲလ်ကော့ဟာ စပို့တင်းကနေ ရောက်ရှိလာတဲ့ ဗစ်တာ ရောကရက်စ် က အာဆင်နယ်အတွက် ပဟေဠိရဲ့ ပျောက်ဆုံးနေတဲ့ အပိုင်းဖြစ်လာနိုင်တယ်လို့ ယုံကြည်ထားပါတယ်။ ဒါပေမဲ့ ၂ ကြိမ်တိုင်တိုင် ဖလားရရှိခဲ့တဲ့ ဝဲလ်ကော့ဟာ အသင်းရဲ့ပထမဆုံးပွဲစဉ်ဖြစ်တဲ့ ယူနိုက်တက်နဲ့ပွဲမှာ ဒီဆွီဒင် ကစားသမားကို လူစားလဲစာရင်းမှာ မြင်တွေ့ရမယ်ဆိုရင် အံ့သြမိမှာ မဟုတ်ဘူးလို့ ပြောပါတယ်။

ရောကရက်စ်ဟာ အာဆင်နယ်အသင်း စောင့်မျှော်နေခဲ့ရတဲ့ ကစားသမားဖြစ်သလားလို့ မေးမြန်းတဲ့အခါမှာတော့ ဝဲလ်ကော့က “ဟုတ်ပါတယ်။ တိုက်စစ်မှူးတွေက မတူညီတဲ့ ပုံစံနဲ့ တွေးခေါ်တတ်ကြပါတယ်” “သူတို့မှာ ကိုယ်ချင်းစာစိတ်မရှိတဲ့ စိတ်နေစိတ်ထားမျိုး ရှိပါတယ်။ ဂိုးတွေ သွင်းယူချင်ကြပါတယ်”

“ဗန်ပါစီက အဲ့လို ကစားသမားမျိုး ဖြစ်ပါတယ်။ သူက ဘာမှမဟုတ်တဲ့ အခြေအနေကနေ တစ်ခုခုကို ဖန်တီးနိုင်ပါတယ်။ သူ့မှာ ဗီဇအတိုင်းပဲ ကွင်းထဲမှာ လှုပ်ရှားနေပါတယ်။ နောက်ခံလူတွေကို စိတ်ဒုက္ခပေးတဲ့နေရာမှာ အရမ်းကို ကောင်းမွန်ပါတယ်”

“ဒီလိုပြောရတဲ့အကြောင်းက နောက်ခံလူတွေ မလိုချင်တဲ့ အနေအထားမျိုးကို ပို့ဆောင်ပေးနိုင်ပြီး တခြားသူတွေအတွက် နေရာလွတ်တွေ ဖန်တီးပေးနိုင်တာကြောင့်ပါ” “ပြီးတော့ ဟာဗက်ဇ်လို ကစားသမားမျိုးကို ပိုင်ဆိုင်ထားတဲ့အခါမှာ ဒီအချက်က လုံးဝကို ကွဲပြားသွားစေပါတယ်။ သူက ဒီရာသီမှာ အရေးပါလာလိမ့်မယ်လို့ ကျွန်တော် ထင်ပါတယ်။ သူတို့က ဟာဗက်ဇ်ကို တော်တော်လေး လွဲချော်ခဲ့တာပါ”

“ခုတော့ အသင်းရဲ့ စွမ်းဆောင်ရည်က လုံးဝကို ကွဲပြားသွားပါပြီ။ ဘူကာယို ဆာကာက ဘောလုံးအပေးအယူလုပ်ဖို့ ကစားသမား ရှိနေပါပြီ။ ကျွန်တော့်ရဲ့ အဲ့လို ကစားသမားကတော့ ဂီရော့ ဖြစ်ပါတယ်။ ကျွန်တော်က ဂီရော့နဲ့ ပေါင်းပြီး ဘောလုံးအပေးအယူလုပ်ရတာကို အရမ်းကြိုက်ပါတယ်။ ဂီရော့ဟာ အထင်ကြီးခံရမှု နည်းနေခဲ့တဲ့ အာဆင်နယ်တိုက်စစ်မှူး ဖြစ်နိုင်ပါတယ်။ အခု သူတို့ရထားတဲ့ ကစားသမားကလည်း အလားတူပဲ ဖြစ်ပါတယ်”

“ဒါပေမဲ့ ရောကရက်စ်ကတော့ ပိုပြီးမြန်ပါတယ်။ ပိုပြီးတော့လည်း သန်မာပါတယ်။ ဂီရော့လောက်တော့ ရုပ်မချောပါဘူး” လို့ ဝဲလ်ကော့က ရယ်မောပြောဆိုခဲ့ပါတယ်။ ဝဲလ်ကော့က ဆက်လက်ပြီး “တခြားသူတွေ ဘယ်လိုထင်မလဲတော့ မသိပေမဲ့ ဒီတနင်္ဂနွေပွဲမှာ အာတီတာက ဟာဗက်ဇ်ကို ပွဲထွက်စေမယ်လို့ ကျွန်တော် ခံစားမိပါတယ်”

“ဘောလုံးရာသီရဲ့ ပထမဆုံးပွဲမှာ အိုးထရက်ဖို့ဒ်ကို သွားရမှာကို ကျွန်တော် မြင်နေမိပါတယ်။ ယူနိုက်တက်မှာ စွမ်းဆောင်ရည်အသစ်တွေ၊ အသင်းသစ်တစ်သင်း ရှိနေပါတယ်။ သူတို့က ရာသီအကြိုပွဲတွေမှာလည်း အတော်လေး ကောင်းမွန်ခဲ့ကြပါတယ်”

“အိုးထရက်ဖို့ဒ်ကို နားလည်ပြီး ပရီးမီးယားလိဂ်ကို နားလည်တဲ့ ဟာဗက်ဇ်နဲ့ပွဲထွက်လာနိုင်ပါတယ်။ ရောကရက်စ် ကစားတာကို မြင်ချင်ပေမဲ့ ဟာဗက်ဇ် ပွဲထွက်လာနိုင်တယ်လို့ပဲ ကျွန်တော် ခံစားမိပါတယ်” လို့ ဝဲလ်ကော့က ဆိုပါတယ်။