စနေနေ့က ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ဘရိုက်တန်ကို ၂-၂ နဲ့သရေကျခဲ့ပြီးနောက် မန်ချက်စတာစီးတီးကြယ်ပွင့် အိုမာ မာမွတ်ရှ်က အသင်းဖော်တွေဟာ ယုံကြည်မှုပျောက်ဆုံးနေကြတယ်လို့ ဝေဖန်ခဲ့ပြီး ရာသီကုန်မှာ ချန်ပီယံလိဂ်ဝင်ခွင့်ရဖို့ အစွမ်းကုန်ပေးဆပ်သွားရမယ်လို့ တွန်းအားပေးပြောကြားလာခဲ့ပါတယ်။ 

ယခုနှစ်ရာသီမှာ ပုံစံကောင်းရရှိဖို့ရုန်းကန်နေရတဲ့မန်စီးတီးဟာ ၂၀၁၉-၂၀ ခုနှစ်ရာသီနောက်ပိုင်း ပထမဆုံးအကြိမ်အဖြစ် ပရီးမီးယားလိဂ်ဖလားကို ဆုံးရှုံးရဖို့သေချာသလောက်ဖြစ်နေပြီး ချန်ပီယံလိဂ်ဝင်ခွင့်ရဖို့ပင် မသေချာတဲ့အခြေအနေမှာရှိနေတာဖြစ်ပါတယ်။ စနေနေ့ကပွဲစဉ်မှာ မန်စီးတီးအနေနဲ့ ဘရိုက်တန်ကို အနိုင်ရခဲ့ပါက အမှတ်ပေးဇယားရဲ့ အဆင့် ၄ နေရာသို့တက်လှမ်းနိုင်မှာဖြစ်ပေမယ့် သရေတစ်မှတ်သာရရှိခဲ့တာကြောင့် အဆင့် ၅ နေရာမှာပဲ ဆက်လက်ရပ်တည်နိုင်ခဲ့ပါတယ်။ 

ကစားသမားတွေ ဒဏ်ရာပြဿနာတွေကြုံတွေ့နေရတာကြောင့် ပြီးပြည်စုံတဲ့လူစာရင်းကို ပွဲထုတ်နိုင်ဖို့ရုန်းကန်ခဲ့ရတဲ့ မန်စီးတီးဟာ ပြီးခဲ့တဲ့ဇန်နဝါရီအပြောင်းအရွှေ့ကာလမှာ ကစားသမားအချို့ ခေါ်ယူအားဖြည့်ထားခဲ့ပြီး လမ်းကြောင်းမှန်ပေါ်ပြန်လည်ရောက်ရှိဖို့ ကြိုးစားအားထုတ်ခဲ့ပါတယ်။ ဖရန့်ဖတ်မှခေါ်ယူထားခဲ့တဲ့ တိုက်စစ်မှူး မာမွတ်ရှ်ဟာ အီတီဟတ်သို့စတင်ရောက်ရှိချိန်မှာပဲ ထူးခြားတဲ့ခြေစွမ်းကို ပြသထားနိုင်ခဲ့ပြီး ဘရိုက်တန်ကို သရေကျခဲ့တဲ့ပွဲစဉ်မှာလည်း အသင်းအတွက် ဒုတိယဂိုးကို အဝေးကန်ချက်နဲ့ သွင်းယူပေးခဲ့ပါတယ်။ 

ပွဲအပြီးမှာ အီဂျစ်လက်ရွေးစင်က "ကျွန်တော်တို့အတွက် ချန်ပီယံလိဂ်ဝင်ခွင့်က စိန်ခေါ်မှုတစ်ခုပါပဲ။ ဒီစိန်ခေါ်မှုအတွက် အရာအားလုံးကို လုပ်ဆောင်သွားပါမယ်။ ခေါင်းကိုနှိမ့်ချပြီး အလုပ်ကြိုးစားရပါမယ်။ ပွဲထဲရောက်ချိန်မှာလည်း ၁၀၀ ရာခိုင်နှုန်းအပြည့်အဝပေးဆပ်ပြီး ကစားသွားဖို့လိုပါတယ်။ ဒါဆိုရင်တော့ ချန်ပီယံလိဂ်ဝင်ခွင့်တစ်နေရာကိုတော့ ရနိုင်မယ်လို့ မျှော်လင့်ပါတယ်"

"ကျွန်တော်တို့ရဲ့အရည်အသွေးကို ဒီထက်ပိုပြသနိုင်ဖို့လိုပါတယ်။ ပြီးတော့ ယုံကြည်မှုလည်း အခုထက်ပိုပြီး ရှိနေရပါမယ်။ ဘောလုံးကိုအမြဲတမ်းကိုင်ထားပြီး အရင်ကမန်စီးတီးပြန်ဖြစ်ဖို့ ကြိုးစားသွားရပါမယ်။ ကျွန်တော်တို့တွေပိုကောင်းလာမှာပါ" လို့ပြောကြားခဲ့ပါတယ်။ 

ပရီးမီးယားလိဂ်ထိပ်ဆုံး ၄ သင်းစာရင်းဝင်ဖို့ကြိုးစားနေတဲ့ မန်စီးတီးဟာ ဆုဖလားရရှိဖို့အခွင့်အရေးအဖြစ် အက်ဖ်အေဖလားပြိုင်ပွဲ ကျန်ရှိနေသေးပြီး လာမယ့် မတ်လ ၃၀ ရက်နေ့မှာ ကွာတားဖိုင်နယ်ပွဲစဉ်အဖြစ် ဘုန်းမောက်နဲ့ ယှဉ်ပြိုင်သွားရပါမယ်။