ကစားသမားဘဝအနာဂတ်နဲ့ပတ်သက်ပြီး ဖွင့်ဟပြောကြားလာတဲ့ ရာမို့စ်
ရီးရဲလ်မက်ဒရစ်ဂန္ထဝင်နောက်ခံလူဟောင်း ဆာဂျီယိုရာမို့စ်က သူ့ရဲ့ကစားသမားဘဝအနာဂတ်နဲ့ပတ်သက်ပြီး ထုတ်ဖော်ပြောဆိုမှုတွေပြုလုပ်လာခဲ့ကာ လက်ရှိကလပ် မွန်တာရေးနဲ့ စာချုပ်သက်တမ်းကုန်ဆုံးပါက အသင်းကနေ ထွက်ခွာသွားမယ်လို့ ဆိုပါတယ်။
ရာမို့စ်အနေနဲ့ ရာယာဒို့စ်မှ ထွက်ခွာဖို့ဆုံးဖြတ်ထားပေမယ့် ကစားသမားဘဝကိုတော့ အဆုံးသတ်ဦးမှာမဟုတ်ဘဲ ပရော်ဖက်ရှင်ကစားသမားဘဝကို ဆက်လက်လျှောက်လှမ်းသွားမယ်လို့ သိရပါတယ်။ စပိန်လက်ရွေးစင်နောက်ခံလူဟောင်းဟာ ယခုနှစ်အစောပိုင်းက မက္ကဆီကိုကလပ် မွန်တာရေးနဲ့ ကာလတိုစာချုပ်ချုပ်ဆိုထားခဲ့တာလည်းဖြစ်ပါတယ်။
ရာမို့စ်ဟာ ပီအက်စ်ဂျီမှထွက်ခွာလာပြီးနောက် အသင်းလက်မဲ့နဲ့ ကာလရှည်နေထိုင်ခဲ့ပြီး ယခုနှစ်အစောပိုင်းကမှ ပရော်ဖက်ရှင်နယ်ကစားသမားဘဝကို ပြန်လည်အသက်သွင်းခဲ့တာဖြစ်ပါတယ်။ မွန်တာရေးသို့ရောက်ရှိလာပြီးနောက် ရာမို့စ်ဟာ အသင်းအတွက် ပြိုင်ပွဲစုံ ၂၁ ပွဲပါဝင်ကစားပြီး ၃ ဂိုးအထိသွင်းယူပေးထားခဲ့ပါတယ်။
ရာမို့စ်အနေနဲ့ မွန်တာရေးနဲ့စာချုပ်သက်တမ်းကုန်ဆုံးပါက မက္ကဆီကိုမြေမှာဆက်လက်နေထိုင်ဖို့ စိတ်ကူးထားခြင်းမရှိကြောင်းလည်း သိရပါတယ်။ လာမယ့်နှစ်အစောပိုင်းမှာ ရီးရဲလ်နောက်ခံလူဟောင်းဟာ အသက်-၄၀ ပြည့်မှာဖြစ်ပေမယ့် နောက်ထပ်ကလပ်အသင်းတစ်သင်းနဲ့ချိတ်ဆက်ပြီး ကစားသမားဘဝ ရှေ့ဆက်ဦးမှာဖြစ်ပါတယ်။ ရာမို့စ်အနေနဲ့ မက္ကဆီကိုမှထွက်ခွာလာခဲ့ပါက ဥရောပသို့ပြန်လည်ချိတ်ဆက်ပြီး ကစားသမားဘဝကို ရှေ့ဆက်သွားမလားဆိုတာတော့ ဆက်လက်စောင့်ကြည့်သွားရမှာဖြစ်ပါတယ်။
