ပေါင်ဒဏ်ရာပြဿနာတစ်ခုကြောင့် သောကြာနေ့မှာကြေညာခဲ့တဲ့ ကမ္ဘာ့ဖလားခြေစစ်ပွဲဝင်အသင်းလူစာရင်းမှ ထုတ်ပယ်ခံခဲ့ရပြီးနောက် ဘရာဇီးလက်ရွေးစင်အသင်းအတွက် နေမာပြန်ကစားပေးနိုင်ဖို့ကိစ္စက နှောင့်နှေးသွားခဲ့ပါတယ်။ ဘရာဇီးအသင်းက ဒူးအရွတ်စုတ်ပြဲဒဏ်ရာရရှိသွားတဲ့ သူတို့ရဲ့ကြယ်ပွင့်ကို  ၂၀၂၃ ခုနှစ်၊ အောက်တိုဘာလနောက်ပိုင်းကတည်းက လက်လွှတ်ခဲ့ရပါတယ်။ ဇန်နဝါရီအပြောင်းအရွှေ့ကာလအတွင်း ငယ်ဘဝကလပ်ဆန်းတို့စ်ဆီ ပြန်လည်ရောက်ရှိလာပြီးနောက် ကြံ့ခိုင်မှုပိုင်းပြန်ကောင်းလာခဲ့တဲ့နေမာကို ကိုလံဘီယာ၊ အာဂျင်တီးနားတို့နဲ့ရင်ဆိုင်ရမယ့် အခုလနှောင်းပိုင်းပွဲစဉ်တွေအတွက် ဘရာဇီးအသင်းလူစာရင်းမှာ ထည့်သွင်းရွေးချယ်ခဲ့ပါတယ်။

ဒါပေမယ့် မတ် ၂ ရက်၊ ဘရာဂန်တီနိုကို ၂-၀ ဂိုးဖြင့် ဆန်းတို့စ်အနိုင်ရရှိတဲ့ပွဲစဉ်မှာ နေမာက ကြွက်သားဒဏ်ရာပြဿနာတစ်ခုနဲ့ ကြုံတွေ့ခဲ့ပါတယ်။ အခုသီတင်းပတ်၊ သောကြာနေ့မှာတော့ ဘရာဇီးဘောလုံးအဖွဲ့ချုပ်က နေမာကို မန်စီးတီးဂိုးသမားအီဒါဆန်၊ ဖလာမင်ဂိုကစားသမားဒါနီလိုတို့နဲ့အတူ အသင်းလူစာရင်းမှ ထုတ်ပယ်ခဲ့တယ်လို့ အတည်ပြုကြေညာခဲ့ပါတယ်။ ဒီကစားသမားတွေနေရာမှာ ဘရာဇီးလက်ရွေးစင်အသင်းက ရီးရဲလ်မက်ဒရစ်ဆယ်ကျော်သက်တိုက်စစ်မှူး အန်းဒရစ်ချ်၊ လိုင်ယွန်ဂိုးသမားလူးကပ်စ်ပါရီနဲ့ ဖလာမင်ဂိုနောက်ခံလူအဲလက်စ်ဆန်ဒရိုတို့ကို အစားထိုးရွေးချယ်ခဲ့ပါတယ်။

ဘရာဇီးလက်ရွေးစင်အသင်းနည်းပြဒိုရီဗယ်လ်ဂျူနီယာက “ ပဏာမရွေးချယ်မှုအပြီး ကစားသမားအားလုံးရဲ့ နောက်ဆုံးအခြေအနေကို ဘရာဇီးလက်ရွေးစင်အသင်းဆေးအဖွဲ့က လေ့လာအကဲဖြတ်ခဲ့ပါတယ်။ အထူးသဖြင့် ဒါနီလို(ဖလာမင်ဂို)၊ နေမာ(ဆန်းတို့စ်)နဲ့ အီဒါဆန်(မန်စီးတီး)တို့ရဲ့အခြေအနေကို လေ့လာအကဲဖြတ်ခဲ့ပါတယ်။ လေ့လာအကဲဖြတ်မှုအပြီး ဒီဒဏ်ရာရကစားသမားတွေနေရာမှာ လိုင်ယွန်ဂိုးသမားလူးကပ်စ်ပါရီ၊ ဖလာမင်ဂိုနောက်ခံလူအဲလက်စ်ဆန်ဒရိုနဲ့ ရီးရဲလ်မက်ဒရစ်ဆယ်ကျော်သက် အန်းဒရစ်ချ်တို့ကို အစားထိုးရွေးချယ်ဖို့ ဆုံးဖြတ်ခဲ့ပါတယ်”လို့ ပြောပါတယ်။

ကမ္ဘာ့ဖလားခြေစစ်ပွဲ(တောင်အမေရိကဇုန်)အမှတ်ပေးဇယားရဲ့ပဉ္စမနေရာမှာရှိနေတဲ့ ဘရာဇီးအသင်းက လာမယ့်ကြာသပတေးနေ့မှာ ကိုလံဘီယာကို ဧည့်ခံကစားပြီးနောက် မတ် ၂၅ ရက်မှာ အာဂျင်တီးနားနဲ့ အဝေးကွင်းပွဲစဉ် ယှဉ်ပြိုင်ကစားရပါမယ်။ အမေရိကန်၊ မက္ကဆီကို၊ ကနေဒါတို့ ပူးတွဲအိမ်ရှင်အဖြစ် လက်ခံကျင်းပမယ့် ၂၀၂၆ ကမ္ဘာ့ဖလားပြိုင်ပွဲအတွက် တောင်အမေရိကဇုန်မှ အသင်းခြောက်ခု ပါဝင်ယှဉ်ပြိုင်ခွင့် ရရှိထားပါတယ်။