မနေ့ညပိုင်း၊ အိုလံပီကိုကွင်းမှာ အမ်ပိုလီကို ၇-၀ ဂိုးဖြင့် အနိုင်ရရှိတဲ့ပွဲစဉ်အတွင်း ရိုးမားမှာ သူမကြိုက်တဲ့ အရာတွေကို မြင်တွေ့နေရဆဲလို့ နည်းပြမော်ရင်ဟိုက သုံးသပ်လိုက်ပြီး အမ်ပိုလီကိုလည်း ဘောလုံးလောကမှာ အခုလိုရလဒ်တွေ ထွက်ပေါ်လေ့ရှိတယ်လို့ပြောဆိုကာ အားပေးနှစ်သိမ့်ခဲ့ပါတယ်။

စီးရီးအေရာသီ အဖွင့်ကာလမှာပဲ ဒဏ်ရာပြဿနာတွေနဲ့ ရုန်းကန်နေရတဲ့ ရိုးမားဟာ အဖွင့်ပွဲစဉ်သုံးပွဲကစားပြီးချိန်အထိ ရမှတ်တစ်မှတ်သာ စုဆောင်းထားနိုင်ခဲ့ပြီး ယမန်နေ့ညပိုင်း၊ အမ်ပိုလီကို အိမ်ကွင်းမှာ ရင်ဆိုင်ရတဲ့ပွဲစဉ်အတွင်း အနိုင်သုံးမှတ်ရှာဖွေနိုင်ဖို့ ပြင်ဆင်လာခဲ့ပါတယ်။ အခုပွဲစဉ်မှာ ရိုးမားအတွက် ဒိုင်ဘားလား(၂ ဂိုး)၊ ရီနာတိုဆန်းချက်စ်၊ ဘရိုင်ယန်ခရစ္စတန်တီ၊ မန်စီနီ၊ လူကာကူနဲ့ အမ်ပိုလီခံစစ်မှူးဂရက်စီ (O.G) တို့က သွင်းဂိုးတွေ ရယူပေးခဲ့ကြတာပါ။

ပွဲစဉ်အပြီး မော်ရင်ဟိုက “ကျွန်တော်က နည်းပြတစ်ယောက်ပါ။ ဒါကြောင့် ကျွန်တော်က အနည်းဆုံးတော့ ခြားနားတဲ့အမြင်တစ်ခုနဲ့ ထုတ်ဖော်ပြောဆိုဖို့ လိုအပ်ပါလိမ့်မယ်။ ဒါက ကောင်းမွန်တဲ့စွမ်းဆောင်ရည်ဖြစ်ပေမယ့် ၇-၀ ဂိုးဖြစ်သွားစေမယ့် စွမ်းဆောင်ရည်မျိုးတော့ မဟုတ်ဘူး။ ကျွန်တော်တို့က အခုပွဲစဉ်မှာ အနိုင်ရရှိဖို့၊ အဆင်ပြေတဲ့ပုံစံနဲ့ အနိုင်ယူဖို့ ကစားခဲ့ပါတယ်။ ကြံ့ခိုင်မှုပိုင်းအပါအဝင် အချို့အပိုင်းတွေမှာ အတက်အကျတွေရှိခဲ့တာကြောင့် မိနစ် ၉၀ လောက်အထိ ပြင်းထန်တဲ့ ခွန်အားစိုက်ထုတ်မှုပုံစံမျိုးနဲ့ မကစားနိုင်သေးသူအချို့ ရှိနေခဲ့တယ်လို့တော့ ပြောရပါလိမ့်မယ်။ အမ်ပိုလီအတွက်တော့ ကျွန်တော်စိတ်မကောင်းပါဘူး။ ဒါပေမယ့် ဒါက ဘောလုံးလောကပါ။ တခါတလေ ၇-၀ ဂိုးဆိုတာမျိုး ဖြစ်လေ့ရှိပါတယ်။ ကွင်းဘေးမှာရှိနေတဲ့ ကျွန်တော်ကိုယ်တိုင် ကိုယ်မကြိုက်တဲ့အရာတချို့ အသင်းမှာရှိနေတယ်ဆိုတာ မြင်တွေ့နေရဆဲပဲ။ နောက်ပိုင်းမှာ ကျွန်တော့်ဝန်ထမ်းတွေနဲ့အတူ ဒီလိုကိစ္စတွေအပေါ် သေသေချာချာလေ့လာအကဲဖြတ်သွားပါ့မယ်”လို့ ပြောပါတယ်။

အခုပွဲစဉ်မှာ ရိုးမားအသင်းအတွက် ပွဲထွက်ပါဝင်ကစားပေးပြီး ပွဲဦးထွက်သွင်းဂိုးရယူနိုင်ခဲ့တဲ့ လူကာကူကို ဂိုးသွင်းယူပြီးမကြာမီမှာပဲ နည်းပြမော်ရင်ဟိုက လူစားလဲလှယ်ခဲ့ပါတယ်။ ပေါ်တူဂီသားနည်းပြကတော့ အစီအစဉ်မရှိဘဲ လူစားလဲလှယ်ခဲ့တာပါလို့ ပြောပါတယ်။

“ပွဲဦးထွက်သွင်းဂိုးဆိုတာက ကျွန်တော့်အတွက်တော့ အရေးမကြီးပါဘူး။ သူ့အတွက်တော့ အရေးကြီးကောင်း ကြီးနိုင်ပါတယ်။ တိုက်စစ်မှူးဆိုတာ သွင်းဂိုးတွေနဲ့ပဲ ရှင်သန်နေရတယ်ဆိုတာ ကျွန်တော် သိပါတယ်။ သူရောက်ရှိလာပြီးကတည်းက အသင်းနဲ့တသားတည်းဖြစ်သွားခဲ့ပါတယ်။ လူကာကူ ဂိုးသွင်း၊ မသွင်းဆိုတာ အရေးမပါတော့ပါဘူး။ သေချာတာကတော့ သူဂိုးသွင်းနိုင်ပြီးနောက် ပိုပျော်ရွှင်နေတယ်ဆိုတာပါပဲ။ အထူးသဖြင့် အိမ်ကွင်းပရိသတ်ရှေ့မှောက်မှာ ဂိုးသွင်းနိုင်တာမျိုးက သူ့အတွက် ပြီးပြည့်စုံစေပါတယ်။ လူကာကူက အသင်းဆီ မတူညီတဲ့ပုံစံတစ်ခု ယူဆောင်လာပြီး သူနဲ့အဆင်ပြေအောင် ဘယ်လိုကစားရမလဲဆိုတာ ကျွန်တော်တို့ လေ့လာရပါဦးမယ်။ ဘာကြောင့်လဲဆိုတော့ အခုအချိန်အထိ ကျွန်တော်တို့အသင်းက ဟန်ချက်မညီသေးသလို လူကာကူကလည်း ကျွန်တော်တို့အသင်းအတွက် ဘယ်လိုကစားပေးရမလဲဆိုတာ မသိသေးပါဘူး။ အသင်းလိုက်ဟန်ချက်ညီလာဖို့ ကြိုးစားရာမှာ  ကျွန်တော်တို့အတွက် အချိန်ရှိသလို ပွဲစဉ်တွေများများကစားလာရမှုကလည်း အသင်းလိုက်ဟန်ချက်ညီလာဖို့ ကူညီပေးပါလိမ့်မယ်”လို့  မော်ရင်ဟိုက ဆိုပါတယ်။