The network connection is lost.

Banner Image

လူကာကူနဲ့ ရိုးမားကစားသမားတွေကို ခေါ်ယူဖို့ လုံးဝစိတ်မဝင်စားဘူးလို့ အခိုင်အမာ ပြောကြားလာတဲ့ မော်ရင်ဟို

ဖီနာဘာချီနည်းပြသစ် ဟိုဆေးမော်ရင်ဟိုက ရိုမီယိုလူကာကူကိုသာမက ရိုးမားအသင်းရဲ့ ဘယ်ကစားသမားကိုမဆို ခေါ်ယူဖို့ စိတ်ဝင်စားခြင်းမရှိဘူးလို့ အခိုင်အမာပြောကြားလာခဲ့ပါတယ်။

အသက်-၆၁ နှစ် အရွယ်ရှိပြီဖြစ်တဲ့ စပါယ်ရှယ်ဝမ်းကို ပြီးခဲ့တဲ့ သီတင်းပတ်ကုန်မှာ ဖီနာဘာချီပရိသတ် ထောင်ပေါင်းများစွာက အစ္စတန်ဘူလ်ရှိ ဆာရာကိုဂလူအာကစားကွင်းမှာ လှိုက်လှိုက်လှဲလှဲ လာရောက်ကြိုဆိုခဲ့ကြပါတယ်။ ပေါ်တူဂီသားနည်းပြဟာ ပြီးခဲ့တဲ့ရာသီက ဖီနာဘာချီကို ရမှတ် ၉၉ မှတ်အထိ ယူပေးနိုင်ခဲ့ပြီး အမှတ်ပေးဇယားရဲ့ ဒုတိယနေရာမှာ ရပ်တည်စေခဲ့တဲ့ နည်းပြ အစ်မေးကာတယ်နေရာမှာ အစားထိုးဝင်ရောက်ခဲ့တာဖြစ်ပြီး လာမယ့်ရာသီမှာတော့ အလှည့်အပြောင်းတစ်ခုကို လုပ်ပြနိုင်ဖို့ လိုအပ်နေပါတယ်။

မော်ရင်ဟိုအနေနဲ့ လာမယ့်နွေရာသီမှာ ကစားသမားသစ်တွေခေါ်ယူပြီး အသင်းကိုအားဖြည့်သွားမှာဖြစ်ပေမယ့် အသင်းဟောင်း ရိုးမားမှ ကစားသမားတွေကိုတော့ ခေါ်ယူဖို့ စိတ်ဝင်စားခြင်းမရှိဘူးလို့ ဆိုလာခဲ့ပါတယ်။ ပေါ်တူဂီသားဟာ ၂၀၂၂ ယူရိုပါလိဂ်ဖလားကို ရိုးမားအသင်းအတွက်ဆွတ်ခူးနိုင်ခဲ့ပြီး ၂ နှစ်ခွဲကြာ ကိုင်တွယ်ခဲ့တာဖြစ်ပါတယ်။

မကြာသေးမီက မော်ရင်ဟိုဟာ မန်ချက်စတာယူနိုက်တက်၊ ချဲလ်ဆီးနဲ့ ရိုးမားတို့မှာ အတူတူလက်တွဲခဲ့ဖူးတဲ့ တိုက်စစ်မှူး လူကာကူကိုဖီနာဘာချီသို့ခေါ်ဆောင်သွားမယ်လို့ သတင်းတွေထွက်ပေါ်ခဲ့ပါတယ်။ သို့သော်လည်း ယခုအခါမှာတော့ စပါယ်ရှယ်ဝမ်းက “ကျွန်တော့်အနေနဲ့ အရင်ကလက်တွဲခဲ့ဖူးတဲ့ ကစားသမားကို အရင်ကလပ်တွေနဲ့ပဲ အလုပ်လုပ်ချင်ခဲ့ပါတယ်။ အခုတော့ ရိုးမားက ဘယ်ကစားသမားကိုမှ စိတ်မဝင်စားပါဘူး။ သူတို့အပေါ်ကျွန်တော့်ရဲ့စိတ်ဝင်စားမှုက သုညပါ” “အခုက အလောတကြီးလုပ်ရမယ့် အချိန်မဟုတ်ပါဘူး။ စိတ်ခံစားမှုတွေကိုလည်း ထိန်းချုပ်ရပါမယ်။ အခုချိန်က အချို့လွဲမှားနေတဲ့အရာတွေကို မှန်ကန်အောင်ပြုလုပ်ရမယ့် အချိန်ပါပဲ။ ဘယ်ကလပ်ကိုပဲ ရောက်ရောက် ကျွန်တော်က ဘယ်ကစားသမားကို ခေါ်တော့မယ်ဆိုတဲ့ ကောလဟာလတွေက အလိုလိုထွက်လာနေကြပါ”လို့ ပြောကြားခဲ့ပါတယ်။

ဆက်လက်ပြီး မော်ရင်ဟိုက “ဖီနာဘာချီကလည်း အခြားအသင်းတွေနဲ့ အတူတူပဲဆိုတာ ကျွန်တော်နားလည်ပါတယ်။ ဒါပေမယ့် အမှန်တရားကတော့ ကျွန်တော်ဟာ ဖြစ်နိုင်ချေရှိတဲ့ အပြောင်းအရွှေ့ဈေးကွက်တွေမှာ ကစားသမား ၁ ယောက်တည်းကိုပဲ ဦးတည်ပြီး ပစ်မှတ်ထားလေ့မရှိပါဘူး။ ကျွန်တော့်ကို လာရောက်ကြိုဆိုပြီး အားပေးခဲ့ကြတဲ့ ပရိသတ်တွေအားလုံးကို ကျေးဇူးတင်ပါတယ်။ ကျွန်တော်က ကျွန်တော့်နာမည် ဟိုဆေးမော်ရင်ဟိုကို အသုံးချပြီး ဟာသတွေပြောလေ့ရှိပါတယ်။ ဒီတစ်ခေါက်မှာတော့ ကျွန်တော်က ဖီနာဘာချီနည်းပြပါ” “ကျွန်တော့်အနေနဲ့ ဘယ်ဖလားကို ဆွတ်ခူးပေးပါ့မယ်လို့ အတိအကျ ကတိမပေးနိုင်ပေမယ့် လာမယ့်ရာသီအတွက် အဓိက ပစ်မှတ်က တူရကီစူပါလိဂ်ဖလားပါပဲ။ အသင်းရဲ့ပရောဂျက်က ကျွန်တော့်အပေါ်သက်ရောက်မှုရှိနေပါပြီ။ အခု ကျွန်တော်တို့ရဲ့အဓိကပစ်မှတ်က အမှတ်ပေးဖလားပါ” လို့ ထပ်လောင်းပြောကြားခဲ့ပါတယ်။