လေဗာကူဆင်ကို အရေးနိမ့်ခဲ့တဲ့ပွဲစဉ်မှာ မန်စီးတီးအသင်း ကြိုးစားကစားခြင်း မရှိဘူးလို့ ယုံကြည်နေတဲ့ ပက်ဂွါဒီယိုလာ
ပက်ဂွါဒီယိုလာက လေဗာကူဆင်ကိုအရေးနိမ့်ခဲ့တဲ့ ချန်ပီယံလိဂ်ပွဲစဉ်မှာ မန်စီးတီးအသင်း ကြိုးစားပမ်းစားကစားခဲ့ခြင်း မရှိဘူးလို့ ယုံကြည်နေပါတယ်။ ပက်ဂွါဒီယိုလာက ပြီးခဲ့တဲ့သီတင်းပတ်၊ နယူးကာဆယ်ကိုရှုံးနိမ့်ခဲ့တဲ့ပွဲစဉ်ရဲ့ ပွဲထွက်လူစာရင်းကို ၁၀ နေရာအထိ အပြောင်းအလဲပြုလုပ်ကာ ပြင်ဆင်လာခဲ့ပေမယ့် အင်္ဂါညပိုင်းအယ်တီဟတ်ကွင်းပွဲစဉ်မှာတော့ ဝ-၂ ဂိုးဖြင့် ရှုံးနိမ့်ခဲ့ပါတယ်။ ဒါပေမဲ့ အဲ့ဒီပွဲစဉ်မှာ ပက်ဂွါဒီယိုလာရဲ့အသင်းက လေဗာကူဆင်ရဲ့ XG 0.51 ထက်သာလွန်တဲ့ XG 1.78 အထိ ရောက်ရှိအောင် စွမ်းဆောင်နိုင်ခဲ့ပြီး ကြီးမားတဲ့အခွင့်အရေးသုံးခုကိုလည်း ဖန်တီးနိုင်ခဲ့ပါတယ်။
ဒါပေမဲ့ ပက်ဂွါဒီယိုလာကတော့ သူ့ရဲ့အသင်းမှာ ဦးဆောင်မှုနဲ့ ယုံကြည်မှုပိုင်း အားနည်းခဲ့ပြီး အနာဂတ်အတွက် သင်ယူသွားရမယ့်အရာတစ်ခုဖြစ်တယ်လို့ ပြောကြားခဲ့ပါတယ်။ မန်စီးတီးနည်းပြက “ ရလဒ်တစ်ခုတည်းတော့ မဟုတ်ပါဘူး၊ ဒါက စွမ်းဆောင်ရည်ပိုင်းနဲ့လည်း သက်ဆိုင်ပါတယ်။ အမှန်ပါပဲ၊ ရလဒ်တွေဆိုတာ စွမ်းဆောင်ရည်ပိုင်းကို အကူအညီပေးပါတယ်။ ဒါပေမဲ့ နယူးကာဆယ်နဲ့ပွဲစဉ်ကိုတော့ အလွန်အမင်းစိတ်ပျက်မိတာမျိုး မရှိပါဘူး။
နောက်ဆုံးကစားခဲ့တဲ့လေဗာကူဆင်နဲ့ပွဲစဉ်ကတော့ ကျွန်တော့်ရဲ့ဆုံးဖြတ်ချက်အပြင် ကြိုးစားပမ်းစားမကစားခဲ့လို့ အတော်လေးစိတ်ပျက်မိပါတယ်။ အဲ့ဒီလောက်ကို ရိုးရှင်းပါတယ်။ မြက်ခင်းပြင်ပေါ်မှာ ဘောလုံးကစားချိန် တစ်ခုခုကိုလုပ်နိုင်ဖို့ ကြိုးစားရပါမယ်။ ကျွန်တော်တို့ မကြိုးစားခဲ့ပါဘူး။ ကျွန်တော့်အမြင်အရ သူတို့တွေ အမှားတွေလုပ်ဖို့ ဘောလုံးကစားတာမဟုတ်ဘဲ တစ်ခုခုလုပ်ပြဖို့ ဘောလုံးကစားတာလို့ ထင်ပါတယ်။ ကျွန်တော့်အတွက်တော့ သင်ခန်းစာကောင်းတစ်ခု ဖြစ်ခဲ့ပါတယ်။ နည်းပြတစ်ဦးအဖြစ် အတွေ့အကြုံတွေ ရှိသင့်သလောက်ရှိပေမယ့် ဒါကတော့ အနာဂတ်မှာ ကျွန်တော့်အတွက် သင်ခန်းစာကောင်းတစ်ခု ဖြစ်ခဲ့ပါတယ်”လို့ ပြောပါတယ်။
အခုသီတင်းပတ်၊ ပရီမီးယားလိဂ်ပွဲစဉ်တွေမှာ အာဆင်နယ်နဲ့ ချဲလ်ဆီးတို့ ထိပ်တိုက်တွေ့ဆုံချိန် မန်စီးတီးက လိဒ်ကို ဧည့်ခံကစားရဖို့ ရှိနေပါတယ်။ မန်စီးတီးက လိဒ်နဲ့ရင်ဆိုင်ရတဲ့ ပရီးမီးယားလိဂ်နောက်ဆုံးလေးပွဲဆက်အနိုင်ရရှိခဲ့ပြီး ၁၆ ဂိုးအထိ သွင်းယူခဲ့ပါတယ်။ ပက်ဂွါဒီယိုလာကတော့ တံကောက်ကြောဒဏ်ရာကြောင့် မန်စီးတီးရဲ့နောက်ဆုံးကိုးပွဲမှာ ရှစ်ပွဲအထိ လွဲချော်ခဲ့တဲ့ ရိုဒရီ ပြန်ကစားနိုင်ဖို့ နီးစပ်နေပြီဖြစ်ပေမယ့် လိဒ်နဲ့ပွဲစဉ်ကိုတော့ လွဲချော်လိမ့်မယ်လို့ ထုတ်ဖော်ပြောကြားခဲ့ပါတယ်။
