၂၀၂၅-၂၆ ရာသီတွင် ဆုတံဆိပ်စုဆောင်းမှုထဲသို့ နောက်ထပ်ဆုဖလားများ ထည့်သွင်းရန် ကြိုးပမ်းနေတဲ့အချိန်မှာ ပီအက်စ်ဂျီနည်းပြ လူးဝစ်အင်းနရစ်က ကြယ်ပွင့်တိုက်စစ်မှူး အူစမာနီဒမ်ဘီလီအား သူ့ရဲ့ ဘောလွန်းဒီအောဆုက ဘာအဓိပ္ပာယ်မှမရှိဟု ပြင်းထန်စွာ ပြောကြားလိုက်ပါတယ်။ ဒမ်ဘီလီဟာ ဒဏ်ရာမှ ပြန်လည်သက်သာလာပြီးနောက် ဂုဏ်သိက္ခာကြီးမားတဲ့ ရွှေဘောလုံးဆုကို ဆွတ်ခူးပြီးကတည်းက ပထမဆုံးအကြိမ်အဖြစ် ပြန်လည်ကစားရန် အသင့်ဖြစ်နေပြီ ဖြစ်သော်လည်း လူးဝစ်အင်းနရစ်ကမူ ဒါဟာ အတိတ်တွင် ကျန်ရစ်ခဲ့ပြီဖြစ်ပြီး ရှေ့ဆက်ရန် အချိန်တန်ပြီလို့ ဆိုလိုက်ပါတယ်။

ဒမ်ဘီလီဟာ ဒဏ်ရာရရှိပြီးနောက် အင်္ဂါနေ့တွင် ဘိုင်ယန်လေဗာကူဆင်နှင့် ကစားမည့် ချန်ပီယံလိဂ်ပွဲစဉ်အတွက် ပီအက်စ်ဂျီအသင်းလူစာရင်းတွင် ပြန်လည်ပါဝင်လာခဲ့ပြီး သြဂုတ်လနောက်ပိုင်း ကလပ်အသင်းအတွက် ပထမဆုံး ပွဲထွက်ကစားခွင့်ရရန် မျှော်လင့်နေသည်။ ထိုအချိန်အတောအတွင်း ဒမ်ဘီလီသည် လာမင်းယာမဲလ်ကို ကျော်ဖြတ်ကာ ကမ္ဘာ့အကောင်းဆုံး အမျိုးသားကစားသမားအဖြစ် သတ်မှတ်ခံခဲ့ရပြီး ဘောလွန်းဒီအောဆုကို ရရှိခဲ့သည်။ ပြင်သစ်ကြယ်ပွင့်ဟာ ပီအက်စ်ဂျီအသင်း လီဂူးဝမ်း ဖလား ၊ ပြင်သစ်ဖလား ၊ ပြင်သစ်စူပါဖလား နှင့် ချန်ပီယံလိဂ်တို့ကို ဆွတ်ခူးနိုင်ခဲ့တဲ့ မယုံနိုင်စရာနှစ်တစ်နှစ်အတွင်း ပြိုင်ပွဲစုံတွင် ၃၅ ဂိုးသွင်း၊ ၁၄ ကြိမ် ဂိုးဖန်တီးမှု ပြုလုပ်နိုင်ခဲ့ပြီးနောက် အဆိုပါဆုကို ဆွတ်ခူးနိုင်ခဲ့ခြင်း ဖြစ်ပါတယ်။

လူးဝစ်အင်းနရစ်က ဒမ်ဘီလီကို ကစားပွဲများသို့ ပြန်လည်ကြိုဆိုရန် ပြင်ဆင်နေချိန်တွင် ကြယ်ပွင့်တိုက်စစ်မှူးအား ဘောလွန်းဒီအောဆုကို မေ့ပစ်လိုက်ရန် အချိန်တန်ပြီဟု သတိပေးခဲ့ပါတယ်။ "ခင်ဗျားတို့ မီဒီယာတွေက အရာရာကို မတူညီတဲ့အမြင်နဲ့ ကြည့်ကြတယ်။ သူက ဘောလွန်းဒီအောဆုရှင် မဟုတ်ဘူး၊ သူက အူစမာနီဒမ်ဘီလီပဲ။ သူဖြစ်တည်နေတဲ့ ပုဂ္ဂိုလ်နဲ့ သူယူဆောင်လာတဲ့ စွမ်းအင်က အသင်းအတွက် ပိုအရေးကြီးတယ်" 

"ဘောလွန်းဒီအောဆုက ပြီးသွားပြီ။ ခင်ဗျားတို့က ဒါကို တန်ဖိုးထားတယ်၊ ဒါပေမဲ့ ဒါက ဘာအဓိပ္ပာယ်မှ မရှိဘူး။ ကျွန်တော်တို့အတွက် အရေးကြီးတာက မာကင်ဟို့စ်၊ ဒက်ဆီယာ ဒူးရေး နဲ့ အူစမာနီတို့ကို ပြန်ရဖို့ပဲ! ကျွန်တော်က ဘောလွန်းဒီအောဆုထက် သူ့ရဲ့ စွမ်းအင်၊ သူ လူတစ်ယောက်အနေနဲ့ ဘယ်လိုရှိလဲဆိုတာကို ပိုသဘောကျတယ်၊ ဘောလွန်းဒီအောဆုက ပြီးသွားပါပြီ" လို့ Canal Plus သို့ ပြောကြားခဲ့ပါတယ်။

လူးဝစ်အင်းနရစ်က ဂျာမနီမြေတွင် လေဗာကူဆင်နှင့် ရင်ဆိုင်ရချိန်တွင် သူ့အသင်း ရင်ဆိုင်ရမည့် စမ်းသပ်မှုအကြောင်းကိုလည်း ပြောကြားခဲ့ပါတယ်။ "ကစားသမား အယောက် ၂၀ နဲ့ နည်းပြသစ်တစ်ယောက် ခေါ်ယူထားတဲ့ လေဗာကူဆင်ကို ချီးကျူးဖို့ ခက်ပါတယ်။ သူတို့ ဂိုးတွေ သွင်းနိုင်တယ်၊ ခံစစ်ကို အရမ်းနက်နက်ရှိုင်းရှိုင်း ကစားနိုင်တယ်၊ ဖိအားဘယ်လိုပေးရမလဲဆိုတာ သူတို့သိတယ်။ သူတို့ ဘာမဆို လုပ်နိုင်ပြီး ကျွန်တော်တို့ ဒါကို ကောင်းကောင်း စီမံခန့်ခွဲရပါလိမ့်မယ်။ ပွဲစဉ်တိုင်းက မတူညီတဲ့ အခြေအနေတွေကို တင်ဆက်ပေးမှာပါ၊ လေ့ကျင့်ခန်းအပြီးမှာ ကျွန်တော်တို့ ကစားသမားတွေ ဘယ်လိုအခြေအနေမှာ ရှိနေမလဲဆိုတာ စောင့်ကြည့်ရပါမယ်"

"ကျွန်တော်တို့ အရည်အချင်းရှိတာကို ပြသနိုင်ခဲ့တဲ့ လူငယ်ကစားသမားတွေ အများကြီး ခေါ်ယူထားပါတယ်။ ဒီရာသီအစက ကွဲပြားခဲ့ပြီး အရမ်းခက်ခဲခဲ့ပါတယ်၊ ဘာဖြစ်လို့လဲဆိုတော့ ကျွန်တော်တို့ ကျော်လွှားစရာမလိုသင့်တဲ့ အခက်အခဲတွေကို ကျော်လွှားခဲ့ရလို့ပါပဲ။ ကျွန်တော်တို့ ကြံ့ကြံ့ခံနိုင်စွမ်းကို ပြသနိုင်ခဲ့ပါတယ်။ မနက်ဖြန်ပွဲက အရမ်းအရေးကြီးတဲ့ ပွဲတစ်ပွဲပါ၊ ဘာလို့လဲဆိုတော့ ကျွန်တော်တို့ အမှတ်တွေ စောစောရလေ ပိုကောင်းလေပါပဲ။ ကျွန်တော်တို့ ဒါကို သိပ်မစဉ်းစားချင်ပါဘူး၊ ဒါပေမဲ့ ဒီပွဲကို အနိုင်ရအောင် ကြိုးစားကစားချင်ပါတယ်" လို့ ပွဲကြိုသတင်းစာရှင်းလင်းပွဲတွင် ပြောကြားခဲ့ပါတယ်။

တစ်ချိန်တည်းမှာပင် လေဗာကူဆင်နည်းပြ ကက်စ်ပါ ဟွတ်လ်မန်က သူ့အသင်းဟာ ပီအက်စ်ဂျီနှင့် ရင်ဆိုင်ရချိန်တွင် ကမ္ဘာ့အကောင်းဆုံးအသင်းနှင့် ရင်ဆိုင်ရမည်ဖြစ်ကြောင်း ပြောကြားခဲ့ပါတယ်။ "ပီအက်စ်ဂျီက ကမ္ဘာ့အကောင်းဆုံးအသင်း ဖြစ်ကောင်းဖြစ်နိုင်ပါတယ်။ သူတို့ ဒီပြက္ခဒိန်နှစ်အတွင်းမှာ ဆုဖလား ၅ လုံး ဆွတ်ခူးထားပါတယ်။ ကျွန်တော်တို့ လေးစားမှု အများကြီးရှိပြီး ဒါက ခက်ခဲတဲ့ တာဝန်တစ်ခု ဖြစ်ပါလိမ့်မယ်။ ဒါပေမဲ့ ကျွန်တော်တို့ ဒါကို မျှော်လင့်နေပါတယ်၊ ဘာဖြစ်လို့လဲဆိုတော့ ချန်ပီယံလိဂ်ပွဲစဉ်တွေက အမြဲတမ်း ကောင်းမွန်နေလို့ပါပဲ။ ကျွန်တော်တို့ အိမ်ကွင်းမှာ ကစားရမှာဖြစ်ပြီး ကျွန်တော်တို့ရဲ့ အရည်အသွေးတွေကို ပြသဖို့ စိတ်ပိုင်းဖြတ်ထားပါတယ်။ အနိုင်ရဖို့ အရာအားလုံးကို ပေးဆပ်သွားမှာပါ" လို့ ပြောပါတယ်။