အာဂျင်တီးနားနည်းပြစကာလိုနီက ဘရာဇီးကို ၄-၁ ဂိုးဖြင့် အနိုင်ရရှိတဲ့ ကမ္ဘာ့ဖလားခြေစစ်ပွဲစဉ်နဲ့ပတ်သက်လို့ သူ့ရဲ့အမြင်ကို ထုတ်ဖော်လာခဲ့ပါတယ်။ ပွဲစဉ်အပြီး သတင်းထောက်တွေနဲ့တွေ့ဆုံချိန် စကာလိုနီက “ အသင်းလိုက်အောင်ပွဲတစ်ခု ဖြစ်ပါတယ်။ ဘာကြောင့်လဲဆိုတော့ ကျွန်တော်တို့က အသင်းတစ်ခုအဖြစ် ကစားခဲ့ပြီး ဘရာဇီးကို အနိမ့်ဆုံးအနေအထားအထိ ဆွဲချနိုင်ခဲ့လို့ ဖြစ်ပါတယ်။ ဒါကပဲ ကစားသမားကောင်းတွေနဲ့ပြည့်နှက်နေတဲ့ ပြိုင်ဘက်ကောင်းကို အနိုင်ယူနိုင်မယ့် တစ်ခုတည်းသောနည်းလမ်းဖြစ်ပါတယ်။ ကျွန်တော်တို့တွေ ပွဲကြီးပွဲကောင်းတွေကို ကစားခဲ့ပြီးပြီလို့ ထင်ပါတယ်။ အရေးအကြီးဆုံးအရာကတော့ ဒီပွဲစဉ်တစ်ခုချင်းစီဟာ ဘယ်လိုအဓိပ္ပါယ်တွေနဲ့ပြည့်ဝနေသလဲဆိုတာ သိထားဖို့ ဖြစ်ပါတယ်။

ကျွန်တော်တို့ ဒုက္ခကြုံမယ့်ပွဲစဉ်တွေ ရှိလာနိုင်သလို ကျွန်တော်တို့ ပျော်ရွှင်ရမယ့်ပွဲစဉ်တွေလည်း ရှိလာပါလိမ့်မယ်။ ဒါကြောင့် ကျွန်တော်တို့က မတူညီတဲ့အခြေအနေတွေအောက်မှာ ကစားနိုင်စွမ်းရှိတယ်ဆိုတာ ပြသသွားရပါမယ်။အခုလိုနည်းစနစ်ပိုင်းကောင်းမွန်လွန်းတဲ့ပြိုင်ဘက်ကို ဖိအားပေးနိုင်ဖို့ဆိုတာ ခက်ခဲပါတယ်။ စောစောစီးစီး ဂိုးတွေရလိုက်တာက သူတို့တွေ တိုက်စစ်ဖွင့်ကစားလာအောင် လုပ်ပေးလိုက်သလို ဖြစ်သွားပါတယ်။ ကျွန်တော်တို့ကလည်း နေရာလွတ်တွေကို အကောင်းဆုံးအသုံးချနိုင်ပါတယ်။ အထူးသဖြင့် ဒီလိုကစားသမားတွေနဲ့ဆိုရင် အရာအားလုံးက အမြန်ဆုံးအသားကျသွားပါလိမ့်မယ်။

လုပ်ရမယ့်အလုပ်တွေ ကျန်ရှိနေသေးသလို မထင်မှတ်ထားတာတွေအများကြီးလည်း ဖြစ်သွားနိုင်ပါတယ်။ တစ်ပွဲချင်းကျော်ဖြတ်ပြီး အခုနေရာဆီရောက်ရှိလာလို့ ကျေနပ်မိပါတယ်။ ပရိသတ်တွေကိုလည်း အခုအခိုက်အတန့်မှာ ပျော်ရွှင်စေချင်တယ်။ ဒီလိုပျော်ရွှင်မှုက ဘယ်လောက်ကြာမယ်ဆိုတာ မသိပေမယ့် အလှည့်အပြောင်းတစ်ခုတော့ ဖြစ်လာပါလိမ့်မယ်။

ဒီလိုပျော်ရွှင်မှုတွေ အကြာကြီးရှိနေဖို့အတွက် မျှော်လင့်မိတာပေါ့။ ဒါပေမယ့် တချိန်တည်းမှာပဲ ကျွန်တော်တို့အသင်းရဲ့ကောင်လေးတွေ ဘယ်လိုကစားနေသလဲဆိုတာကို ခံစားကြည့်ကြမယ်။ ကျွန်တော်တို့ ဆက်ကြိုးစားသွားပါမယ်”လို့ ပြောပါတယ်။ ဆက်လက်ပြီး စကာလိုနီက အခုပွဲစဉ်မတိုင်ခင် ရာဖင်ဟာပြောဆိုခဲ့တဲ့မှတ်ချက်တွေနဲ့ပတ်သက်လို့ ဆွေးနွေးပေးခဲ့ပါတယ်။

စကာလိုနီက “ ရည်ရွယ်ချက်ရှိရှိ၊ တမင်သက်သက်မဟုတ်ဘဲ သူ့နိုင်ငံကို ကာကွယ်ပေးနေတယ်ဆိုတာကို သိရှိထားလို့ ကျွန်တော်ကတော့ ရာဖင်ဟာရဲ့မှတ်ချက်တွေကို ဗွေမယူပါဘူး။ သူကိုယ်တိုင်လည်း တစ်ဦးဦးကိုနစ်နာစေလိုတဲ့ဆန္ဒ မရှိနေဘူးဆိုတာ သေချာပါတယ်။ အမုန်းတရားတွေနဲ့လည်း ပွဲတွေကို ကစားသွားလို့ မရပါဘူး။ ဒါကြောင့်ပဲ ကျွန်တော်တို့က အဲ့ဒီလိုပုံစံမျိုးနဲ့ မကစားခဲ့တာပါ”လို့ ပြောပါတယ်။