ကမ္ဘာ့ဘောလုံးလောကရဲ့ အတောက်ပဆုံးကြယ်ပွင့် လီယွန်နယ်မက်ဆီက သူ့ရဲ့ ဘောလုံးကစားသမားဘဝအတွက် လွှမ်းမိုးမှုအရှိခဲ့ဆုံး ပုဂ္ဂိုလ် ၂ ဦးရဲ့အမည်ကို ဖွင့်ဟပြောကြားလာခဲ့ပါတယ်။ 

အာဂျင်တီးနားဂန္ထဝင်ကစားသမားဟာ သူ့ရဲ့ပထမဆုံးကစားသမားဘဝက စပိန်လာလီဂါထိပ်သီးကလပ် ဘာစီလိုနာမှာ စတင်ခဲ့တာဖြစ်ပြီး အသင်းနဲ့အတူ အောင်မြင်မှုတွေအများအပြားရရှိခဲ့သူဖြစ်ပါတယ်။ ယခုအခါမှာတော့ မက်ဆီက ဘာစီလိုနာမှာ ကစားသမားဘဝစတင်ချိန်က သူ့အပေါ် လွှမ်းမိုးနိုင်ခဲ့တဲ့ လူနှစ်ဦးရဲ့ အမည်ကို ထုတ်ဖော်ပြောကြားလာခဲ့ပြီး ပထမတစ်ဦးက ပက်ဂွါဒီယိုလာဖြစ်တယ်လို့ ဆိုပါတယ်။ 

အင်တာမီယာမီစူပါစတားက “ကျွန်တော့်ကို လွှမ်းမိုးနိုင်ခဲ့တဲ့ လူ ၂ ယောက်ရှိပါတယ်။ ပထမတစ်ယောက်ကတော့ ပက်ဂွါဒီယိုလာပါ။ ကျွန်တော်နဲ့သူနဲ့ နှစ်ပေါင်းများစွာ လက်တွဲခဲ့ကြပြီး ကျွန်တော်တို့ စိတ်ကူးနဲ့တောင်မျှော်လင့်လို့မရနိုင်တဲ့ အောင်မြင်မှုတွေ အတူတူရရှိခဲ့ကြပါတယ်” လို့ပြောကြားခဲ့ပါတယ်။ မက်ဆီနဲ့ ဂွါဒီယိုလာတို့ဟာ ဘာစီလိုနာမှာ လက်တွဲစဉ်က ချန်ပီယံလိဂ် ၂ ကြိမ်၊ လာလီဂါ ၃ ကြိမ်၊ စပိန်ကိုပါဒယ်ရေး ၂ ကြိမ်၊ စပိန်စူပါဖလား ၃ ကြိမ်၊ ကလပ်ကမ္ဘာ့ဖလား ၂ ကြိမ်နဲ့ ဥရောပစူပါဖလား ၂ ကြိမ်တို့ကို အတူတူဆွတ်ခူးနိုင်ခဲ့ကြတာဖြစ်ပါတယ်။ 

မက်ဆီအတွက် လွှမ်းမိုးမှုအရှိဆုံးဖြစ်ခဲ့တဲ့ ဒုတိယတစ်ဦးကတော့ ရော်နယ်ဒင်ဟိုဖြစ်ပြီး ဘာစီလိုနာ စီနီယာအသင်းမှာ မက်ဆီစတင်ကစားရချိန်မှာ ဘရာဇီးဂန္ထဝင်က အရေးပါတဲ့ကစားသမားအဖြစ် ရပ်တည်ထားနိုင်ခဲ့တာဖြစ်ပါတယ်။ ရော်နယ်ဒင်ဟိုဟာ မက်ဆီကို နွေးနွေးထွေးထွေးနဲ့ ကြိုဆိုခဲ့ပြီး နှစ်ပေါင်းများစွာ သင်ကြားပေးခဲ့ကာ ဆရာတပည့်ဆက်ဆံရေးမျိုးတည်ဆောက်ခဲ့ပုံရပါတယ်။မက်ဆီနဲ့ရော်နယ်ဒင်ဟိုတို့ကလည်း ဘာစီလိုနာနဲ့အတူ လာလီဂါ ၂ ကြိမ်၊ ချန်ပီယံလိဂ် ၁ ကြိမ်နဲ့ စပိန်စူပါဖလား ၂ ကြိမ်တို့အပါအဝင် အောင်မြင်မှုတွေအများအပြားဆွတ်ခူးနိုင်ခဲ့ကြပါတယ်။ မက်ဆီက “ကျွန်တော့်ကစားသမားဘဝကို လွှမ်းမိုးခဲ့တဲ့ ဒုတိယတစ်ယောက်ကတော့ ရော်နယ်ဒင်ဟိုပါ။ သူ ကျွန်တော့်ကို ကြိုဆိုခဲ့ပုံ၊ ကူညီခဲ့ပုံတွေက ကျွန်တော့်လို ကစားသမားသစ်လေးတစ်ယောက်အတွက် အများကြီး အထောက်အကူဖြစ်စေခဲ့ပါတယ်” လို့ပြောကြားခဲ့ပါတယ်။ 

ဆက်လက်ပြီး မက်ဆီက အင်နီယေစတာနဲ့ ဇာဗီတို့ကိုလည်း ဖော်ပြခဲ့ပြီး လက်ရှိအင်တာမီယာမီမှာ အတူတူတွဲဖက်ကစားနေကြတဲ့ ဘက်စ်ကွက်စ်၊ အယ်လ်ဘာနဲ့ ဆွာရက်ဇ်တို့ကလည်း ရင်နှီးတဲ့မိတ်ဆွေတွေဖြစ်တယ်လို့ ပြောကြားခဲ့ပါတယ်။ 

ဘောလွန်းဒီအော် ၈ ဆုရှင်က “ကျွန်တော် အင်နီယေစတာနဲ့ ဇာဗီတို့ကိုလည်း သတိရပါတယ်။ ပြီးတော့ ကျွန်တော်နဲ့အတူအခု မီယာမီမှာကစားနေတဲ့ ၃ ယောက်ကလည်း အရမ်းရင်းနှီးတဲ့ မိတ်ဆွေတွေပါပဲ” လို့ပြောကြားခဲ့ပါတယ်။နောက်ဆုံးအနေနဲ့ မက်ဆီက ဘာစီလိုနာအတွက် ရမှတ် ၁၀၀ အထိရယူပေးပြီး လာလီဂါဖလားကို ဆွတ်ခူးပေးခဲ့တဲ့ နည်းပြဟောင်း တီတိုဗီလာနိုဗာကိုလည်း သတိရမိကြောင်း ပြောကြားခဲ့ပါသေးတယ်။ “ပြီးတော့ ကျွန်တော် တီတိုဗီလာနိုဗာကိုလည်း အထူးဖော်ပြချင်ပါသေးတယ်။ ကျွန်တော်တို့သူ့ကို အရမ်းလည်းလွမ်းပါတယ်” လို့ပြောကြားခဲ့ပါတယ်။