စပိန်လာလီဂါဟာ (၂၀၂၅-၂၆) ရာသီမှာ ချန်ပီယံလိဂ်ပြိုင်ပွဲဝင်ရောက်ယှဉ်ပြိုင်ခွင့်အတွက် အနည်းဆုံးအသင်း ၅ သင်းနဲ့ ယှဉ်ပြိုင်ခွင့်ရရှိသွားပြီဖြစ်ကြောင်း အတည်ပြုလိုက်ပါတယ်။ကြာသပတေးည ယူရိုပါလိဂ်ပြိုင်ပွဲရလဒ်တွေထွက်ပေါ်လာပြီးနောက် ကြေညာခဲ့တာဖြစ်ပါတယ်။ လာလီဂါဟာ ယူအီးအက်ဖ်အေက သတ်မှတ်တဲ့ ဥရောပစွမ်းဆောင်ရည်အမှတ်ပေးမှု နှစ်ခုထဲက တစ်ခုကို ရရှိခဲ့တာဖြစ်ပါတယ်။ 

ဒီသတ်မှတ်မှုဟာ လက်ရှိရာသီမှာ ဥရောပပြိုင်ပွဲတွေမှာ အကောင်းဆုံးစွမ်းဆောင်နိုင်ခဲ့တဲ့ အသင်းတွေကို ပေးအပ်တာဖြစ်ပါတယ်။ အင်္ဂလန်ပရီးမီးယားလိဂ်ဟာ ဒီသတ်မှတ်မှုကို ပထမဆုံးရရှိခဲ့ပြီး ပုံမှန် ပြည်တွင်းလိဂ်မှာ ထိပ်ဆုံး ၄ သင်းဝင်ရောက်ယှဉ်ပြိုင်ခွင့်ရတဲ့အပြင် ဒီသတ်မှတ်မှုကြောင့် အသင်းတစ်သင်းထပ်တိုးပြီး ဝင်ရောက်ယှဉ်ပြိုင်ခွင့်ရရှိမှာဖြစ်ပါတယ်။

ကြာသပတေးနေ့ကထွက်ပေါ်လာတဲ့ ရလဒ်တွေဟာ လာလီဂါအတွက် နေရာလွတ်တစ်ခုရရှိဖို့ အဓိကကျခဲ့ပါတယ်။ အီတလီကလပ် လာဇီယိုအသင်းဟာ ယူရိုပါလိဂ်ကနေ ထွက်ခဲ့ရပြီး စပိန်ကလပ် ဘီလ်ဘာအိုအသင်းက ဆီမီးဖိုင်နယ်အဆင့်ကို တက်ရောက်သွားတာကြောင့် လာလီဂါရဲ့ စုစုပေါင်းအမှတ်ပေးစနစ် မြင့်တက်လာခဲ့ပါတယ်။ လက်ရှိလာလီဂါအမှတ်ပေးဇယားမှာ ဗီလာရီးရဲလ်အသင်းက အဆင့် ၅ နေရာမှာရှိနေပြီး၊ ချန်ပီယံလိဂ်ဝင်ခွင့်ရရှိမယ့် အပိုနေရာအတွက် အကျိုးအမြတ်ရရှိမှာဖြစ်ပါတယ်။ 

ဗီလာရီးရဲလ်အသင်းဟာ အဆင့် ၆ နေရာက ရီးရဲလ်ဘက်တစ်အသင်းကို ၃ မှတ်အသာရရှိထားပြီး၊ ဆယ်လ်တာဗီဂိုနဲ့ မာယော့ကာအသင်းတို့ကို ၈ မှတ်အသာရရှိထားပါတယ်။ ဒါပေမဲ့ အဆိုပါအသင်းတွေအားလုံးဟာ ဗီလာရီးရဲလ်ထက် တစ်ပွဲပိုကစားထားပါတယ်။