နေးရှင်းလိဂ်ကွာတားဖိုင်နယ်ပထမအကျော့ပွဲစဉ်အဖြစ် ဆန်စီရိုမှာ အီတလီကို ၁-၂ ဂိုးဖြင့် အနိုင်ယူပြီးနောက် ဂျာမနီအသင်းနည်းပြနာဂယ်စ်မန်းက သူ့ရဲ့အတွေးအမြင်တွေကို သတင်းမီဒီယာတွေဆီ မျှဝေခဲ့ပါတယ်။ အသက်-၃၇ နှစ်အရွယ်နည်းပြက ပြိုင်ဘက်ဆီ ဦးဆောင်ဂိုးခွင့်ပြုပေးလိုက်ရပေမယ့် နောက်မှလိုက်ကစားကာ နိုင်ပွဲဖော်ဆောင်ခဲ့တဲ့ သူ့အသင်းရဲ့စိတ်ဓါတ်ပိုင်းကို ကျေနပ်နေခဲ့ပါတယ်။

နာဂယ်စ်မန်းက “ ဦးဆောင်ဂိုးပေးလိုက်ရပြီးတော့မှ နိုင်ပွဲပါပြန်ရခဲ့လို့ ကျွန်တော် အထူးပျော်ရွှင်ကျေနပ်မိပါတယ်။ ကောင်လေးတွေလည်း အကောင်းဆုံးလုပ်ဆောင်နိုင်ခဲ့ပါတယ်။ ဒုတိယပိုင်းပွဲချိန်တွေမှာ ကျွန်တော်တို့တွေ အခုထက်ပိုပြီး ဂိုးတွေသွင်းနိုင်ခဲ့သင့်တယ်။ ပထမပိုင်းပွဲချိန်အတွင်းမှာတော့ ကျွန်တော်တို့အတွက် ပြဿနာအချို့ရှိခဲ့ပါတယ်။ ဒုတိယပိုင်းပွဲချိန်တွေမှာလည်း လူစားလဲလှယ်မှုအနည်းငယ်နဲ့အတူ များများစားစား မပြောင်းလဲခဲ့ပါဘူး။အသင်းက ဒီနေ့မှာ အနိုင်ရရှိဖို့အတွက် အစွမ်းကုန်ကြိုးစားမယ်ဆိုတဲ့စိတ်ဆန္ဒကို ပြသသွားခဲ့ပါတယ်”လို့ ပြောပါတယ်။

ဆက်လက်ပြီး ဂျာမနီလက်ရွေးစင်အသင်းနည်းပြက တနင်္ဂနွေနေ့၊ ဒေါ့မွန်မြေ ဒုတိယအကျော့ပွဲစဉ်အကြောင်း မဆွေးနွေးခင် ကွင်းလယ်ကစားသမားဂေါ်ရက်ဇ်ကာကို ချီးကျူးဂုဏ်ပြုခဲ့ပါတယ်။ နာဂယ်စ်မန်းက “ ဂေါ်ရက်ဇ်ကာအတွက် ကျွန်တော် အလွန်ပျော်ရွှင်မိပါတယ်။ သူက အရမ်းကောင်းတဲ့ပွဲစဉ်တစ်ခုကို ကစားခဲ့တယ်လို့ ထင်ပါတယ်။ အထူးသဖြင့် ဒုတိယပိုင်းပွဲချိန်တွေမှာ ခံစစ်ပိုင်းအပြင် ပြိုင်ဘက်ဂိုးဧရိယာထဲမှာပါ သူရှိနေပေးခဲ့ပါတယ်။

သူက ပွဲစဉ်တစ်ခုလုံးကို နည်းလမ်းနှစ်မျိုးနဲ့ လွှမ်းမိုးထားခဲ့ပါတယ်။ တကယ့်ထိပ်တန်းစွမ်းဆောင်ရည် ဖြစ်ပါတယ်။ ပြီးခဲ့တဲ့ယူရိုပြိုင်ပွဲမှာလည်း ဒေါ့မွန်မြေမှာ ဒိန်းမတ်နဲ့ ရူးလောက်စရာပွဲစဉ်တစ်ခုကို ကစားခဲ့ဖူးပါတယ်။ အားပေးမှုပုံစံတွေကတော့ တကယ်ကိုအံ့မခန်းစရာပါပဲ။

နောက်ထပ်အားကစားကွင်းကြီးတစ်ခုမှာကစားရမယ့် ပွဲစဉ်ကိုတော့ ကျွန်တော် စောင့်မျှော်နေပါပြီ။ ဒီနေ့ပွဲစဉ်မှာလည်း ကျွန်တော်တို့အသင်းပရိသတ်တွေက အပြင်းအထန်အားပေးခဲ့ကြပါတယ်။ လာမယ့်တနင်္ဂနွေနေ့မှာလည်း ဒီအတိုင်းပဲ ဖြစ်နေလိမ့်မယ်လို့ မျှော်လင့်မိပါတယ်”လို့ ပြောပါတယ်။