ဘင်ဖီကာနည်းပြဟိုဆေးမော်ရင်ဟိုက ရီးရဲလ်မက်ဒရစ်ကို ၄-၂ ဂိုးဖြင့် အနိုင်ယူကာ ချန်ပီယံလိဂ်ရှုံးထွက်ပလေးအော့ဖ်အဆင့်ဆီ တက်ရောက်ခဲ့ပြီးနောက် သူ့ရဲ့ယူကရိန်းဂိုးသမား အနာတိုလီထရူဘင်သွင်းယူခဲ့တဲ့ နောက်ဆုံးမိနစ်ဂိုးကို သမိုင်းဝင်အောင်မြင်မှုအဖြစ် သတ်မှတ်ခဲ့ပါတယ်။

မော်ရင်ဟိုအတွက်တော့ Estadio da Luz မှာ စိတ်ခံစားမှုပြင်းထန်တဲ့ညတစ်ခုဖြစ်ခဲ့ပြီး ထရူဘင်ရဲ့ပွဲချိန်-၉၈ မိနစ်ထူးရှယ်ခေါင်းတိုက်ဂိုးကြောင့် ဂိုးကွာခြားချက်အသာစီးဖြင့် ရှုံးထွက်ပလေးအော့ဖ်ဆီ ဘင်ဖီကာအသင်း တက်လှမ်းသွားခဲ့ပါတယ်။

ဘင်ဖီကာရဲ့အံ့မခန်းအောင်ပွဲအပြီး Movistar Plus ရုပ်သံအစီအစဉ်မှာ သိသိသာသာစိတ်လှုပ်ရှားနေတဲ့ ပေါ်တူဂီလူမျိုးနည်းပြကိုမြင်တွေ့ခဲ့ရပါတယ်။ ပြိုင်ပွဲရဲ့ပြင်းထန်မှုနဲ့ ဒရာမာဆန်ဆန်အဆုံးသတ်အကြောင်း ပြန်ပြောင်းပြောဆိုရာမှာ မော်ရင်ဟိုက “ ကျွန်တော့်အတွက် စိတ်ခံစားမှုပြင်းထန်တယ်ဆိုတာ ပုံမှန်အခြေအနေပါပဲ။ ဒီလိုစိတ်ခံစားမှုမျိုးနဲ့လည်း ထိုက်တန်တယ်လို့ ထင်ပါတယ်။

ဘင်ဖီကာအတွက် ရီးရဲလ်မက်ဒရစ်ကို အနိုင်ရရှိတယ်ဆိုတာ အံ့အားသင့်လောက်စရာဂုဏ်သတင်းတစ်ရပ် ဖြစ်ပါတယ်။ ဒီအံ့ဖွယ်အသင်းနှစ်ခုက အံ့အားသင့်စရာကာလတွေအပြီး ထိပ်တိုက်တွေ့ဆုံခြင်း မရှိခဲ့ပါဘူး။ အခုတော့ ဘင်ဖီကာရဲ့ဂုဏ်သိက္ခာ၊ ကစားသမားတွေရဲ့ဂုဏ်သိက္ခာအတွက် အံ့ဖွယ်အရာတစ်ခု ဖြစ်လာပါတယ်”လို့ သုံးသပ်ခဲ့ပါတယ်။

ဒီအသင်းနှစ်ခုက ၁၉၆၅ ခုနှစ်၊ ဥရောပဖလားပြိုင်ပွဲရဲ့ကွာတားဖိုင်နယ်အဆင့်မှာ နောက်ဆုံးအကြိမ်ထိပ်တိုက်တွေ့ဆုံခဲ့ပြီး ဘင်ဖီကာက စပိန်ဘီလူးကြီးကိုကျော်ဖြတ်ကာ ဗိုလ်လုပွဲအဆင့်အထိ တက်လှမ်းနိုင်ခဲ့ပါတယ်။ ဒါ့အပြင် ၁၉၆၁-၁၉၆၂ ဥရောပဖလားဗိုလ်လုပွဲမှာလည်း ဘင်ဖီကာနဲ့ ရီးရဲလ်မက်ဒရစ် ထိပ်တိုက်တွေ့ဆုံခဲ့ပြီး ပေါ်တူဂီကလပ်အသင်းက အနိုင်ရဗိုလ်စွဲခဲ့ပါတယ်။

မော်ရင်ဟိုကတော့ ပွဲချိန်နောက်ဆုံးမိနစ်ခေါင်းတိုက်ဂိုးနဲ့အတူ ပရိသတ်တွေကို အံ့အားသင့်စေခဲ့တဲ့ အသက်-၂၄ နှစ်အရွယ်ဂိုးသမားထရူဘင်ကို ချီးကျူးဂုဏ်ပြုခဲ့ပါတယ်။ မော်ရင်ဟိုက “ ၃-၂ ဂိုးဆိုတဲ့ရလဒ်ဟာ နောက်တစ်ဆင့်တက်လှမ်းနိုင်ဖို့ မလုံလောက်ဘူးဆိုတာ ကျွန်တော်သိပါတယ်။ အလွတ်တည်ကန်ဘောတစ်ကြိမ်နဲ့အတူ ကျွန်တော်တို့ ကံကောင်းခဲ့ပါတယ်။

ကျွန်တော်တို့ရဲ့ အရပ်နှစ်မီတာလောက်မြင့်မားတဲ့ ဂိုးသမားထရူဘင်က ပြိုင်ဘက်ဂိုးဧရိယာဆီဝင်ရောက်ပြီး အံ့ဖွယ်သမိုင်းဝင်ဂိုးကို သွင်းယူခဲ့ပါတယ်။ ဒီကွင်းကြီးတစ်ခုလုံး ပြိုကျသွားတော့မလို ခံစားမိခဲ့ပါတယ်။ မယုံကြည်နိုင်စရာပါပဲ”လို့ ပြောပါတယ်။