
တူချယ်ရဲ့အင်္ဂလန်လူစာရင်းရွေးချယ်မှုနဲ့ပတ်သက်ပြီး ကာကွယ်ပြောကြားလာတဲ့ အီယန်ရိုက်
အာဆင်နယ်ဂန္ထဝင်ဟောင်း အီယန်ရိုက်က တူချယ်တစ်ယောက် ဟန်ဒါဆန်ကို အင်္ဂလန်အသင်းလူစာရင်းထဲ ပြန်လည်ရွေးချယ်တာနဲ့ပတ်သက်ပြီး ကာကွယ်ပြောကြားလိုက်ပါတယ်။ ဟန်ဒါဆန်ဟာ တူချယ်ရဲ့အင်္ဂလန်အသင်းလူစာရင်းမှာ အံ့အားသင့်ဖွယ်ပါဝင်လာခဲ့တာဖြစ်ပါတယ်။ အေဂျက်အသင်းခေါင်းဆောင်ဟာ ၂၀၂၃ နိုဝင်ဘာကတည်းက နိုင်ငံအသင်းလူစာရင်းမှာ မပါဝင်တော့တာဖြစ်ပြီး ဝင်ဘာလေမှာ အနိုင်ရခဲ့တဲ့ ၂ ပွဲစလုံးမှာ ဒုတိယပိုင်းအတွင်း လူစားဝင်ကစားခဲ့ပါတယ်။
ဟန်ဒါဆန်ပြန်လည်ပါဝင်လာမှုနဲ့ပတ်သက်ပြီး တူချယ်က လာမယ့်နှစ်ကမ္ဘာ့ဖလားအတွက် အသင်းကို ဟန်ချက်ညီအောင် တည်ဆောက်ဖို့ လုပ်ဆောင်သွားမှာဖြစ်တယ်လို့ ပြောကြားခဲ့ပါတယ်။ “ဂျော်ဒန်က အများကြီးအောင်နိုင်ထားတဲ့သူပါ။ သူကအေဂျက်အသင်းခေါင်းဆောင်ပါ။ အသင်းတိုင်းကို သူက ဦးဆောင်နိုင်မှု ၊ ခွန်အား နဲ့ ကိုယ်ရည်ကိုယ်သွေးတွေ ယူဆောင်လာနိုင်ပါတယ်။ သူက လူတိုင်းကို သူ့အဆင့်အတန်းနဲ့သူ နေနိုင်အောင် လုပ်ဆောင်ပေးပါတယ်။ သူ့ကိုဦးတည်ပြီး ကျွန်တော်တို့ အသင်းတစ်သင်းတည်ဆောက်ချင်ပါတယ်”လို့ တူချယ်က ပြောကြားခဲ့ပါတယ်။
ဟန်ဒါဆန်ရဲ့ ဆော်ဒီလိဂ်အခြေအနေက ဆိုးဝါခဲ့ပြီး ၆ လအကြာမှာ အေဂျက်အသင်းထံ ပြောင်းရွှေ့ခဲ့ပါတယ်။ ဒဏ်ရာပြဿနာတွေကြောင့် နယ်သာလန်လိဂ်ရဲ့ပွဲဦးထွက်ရာသီမှာ ဟန်ဒါဆန်အနေနဲ့ ပြိုင်ပွဲစုံ ၃၉ ပွဲသာ ပါဝင်ခွင့်ရရှိထားခဲ့ပါတယ်။
အီယန်ရိုက်ကတော့ တူချယ်အနေနဲ့ ဟန်ဒါဆန်ကို ခေါ်ယူခဲ့တာနဲ့ပတ်သက်ပြီး မအံ့သြခဲ့တာဖြစ်ပါတယ်။ “သူ့ကို နိုင်ငံအသင်းအတွက် ပြန်လည်ခေါ်ယူခဲ့တာနဲ့ပတ်သက်ပြီး ကျွန်တော် မအံ့သြပါဘူး။ သူ ဝှက်ဖဲဖြစ်လာနိုင်ပါတယ်။ ခင်ဗျား တူချယ်ရဲ့အင်တာဗျူးကို နားထောင်မယ်ဆိုရင် သူက အသင်းသားတွေအကြောင်းပြောဖြစ်ပါတယ်။
အဲ့ထဲမှာ သူက ဂျော်ဒန်ကို အသားပေးပြောဖြစ်ပါတယ်။ ကျွန်တော်ကတော့ ဟန်ဒါဆန်ကို တူချယ်ပြန်ခေါ်တာနဲ့ပတ်သက်လို့ မအံ့သြပါဘူး။ တကယ်လို့ ဂျော်ဒန်အနေနဲ့ ကြံ့ခိုင်မှုပြည့်ဝပြီး ကစားနိုင်မယ်ဆိုရင် သူက အသင်းကို အများကြီးအကျိုးပြုနိုင်ပါတယ်။ တူချယ် နဲ့ ဟန်ဒါဆန်တို့ကြားမှာလည်း စကားပြောဆိုထားတာတွေရှိမှာပါ။ ကျွန်တော် စောင့်ကြည့်ဖြစ်သလို တွေးလည်းတွေးဖြစ်ပါတယ်။ ဂျော်ဒန်က ပွဲပြီးခါနီး ၅ မိနစ်လောက်ပါဝင်လာနိုင်ပါတယ်။ ကမ္ဘာ့ဖလားလူစာရင်းမှာလည်း ပါဝင်လာနိုင်ပါတယ်။ အဲ့တာက သူ့အခြေအနေတွေအပေါ်မှာ မူတည်နေပါတယ်။ ဒါပေမယ့် သူဂျော်ဒန်ကို မတူညီတဲ့အကြောင်းပြချက်ကြောင့် ခေါ်ယူခဲ့တာနေမှာပါ။
ဘာလို့လဲဆိုတော့ သူ့မှာ ၁၈ လပဲ အချိန်ရပါတယ်။ အဲ့တာက ၄ နှစ်မဟုတ်ပါဘူး။ တစ်ချိန်လုံး ရွေးချယ်မယ့်ကစားသမားကို လျှောက်ကြည့်နေဖို့ အချိန်မရပါဘူး။ ဟန်ဒါဆန်ရဲ့ဦးဆောင်နိုင်မှုက အင်္ဂလန်ကို အကျိုးပြုနိုင်ပါတယ်။ သူ့အတွေ့အကြုံက အသင်းမှာရှိတဲ့ လူငယ်တွေကို အထောက်အကူဖြစ်စေမှာပါ”လို့ အီယန်ရိုက်က ပြောကြားခဲ့ပါတယ်။