မနေ့ညပိုင်း၊ ဘရိုက်တန်နဲ့သရေကျတဲ့ ပွဲစဉ်အပြီး ကွင်းလယ်ဒိုင်ဆိုင်မွန်ဟူးပါးဆီ သွားရောက်ကာ  ဒေါသတကြီးပြောဖြစ်ခဲ့တဲ့စကားကို ပက်ဂွါဒီယိုလာက ထုတ်ဖော်လိုက်ပါတယ်။ ဘရိုက်တန်နောက်ခံလူဗန်ဟက်ကီရဲ့ဘောလုံးဖျက်ထုတ်မှုမှာ ဟန်ဆောင်လှဲချတယ်ဆိုတဲ့ စွဲချက်နဲ့ တောင်ပံကစားသမားဒိုကူကို ကွင်းလယ်ဒိုင်ဆိုင်မွန်ဟူးပါးက အဝါကတ်ပြသပြီးနောက် မန်စီးတီးနည်းပြပက်ဂွါဒီယိုလာ ဒေါသူပုန်ထခဲ့ပါတယ်။ ဘာစီလိုနာနည်းပြဟောင်းက အခုလိုဖျက်ထုတ်မှုကို ခုန်မရှောင်လိုက်ဘူးဆိုရင် ဘယ်လ်ဂျီယာသားရဲ့ခြေထောက် ထက်ပိုင်းကျိုးသွားနိုင်တယ်လို့ အလေးပေးပြောကြားခဲ့ပါတယ်။

ပွဲစဉ်အပြီး ပက်ဂွါဒီယိုလာက “ ဒိုကူသာ မခုန်လိုက်ဘူးဆိုရင် သူ့ရဲ့ခြေထောက် ထက်ပိုင်းကျိုးသွားနိုင်ပါတယ်။ မြက်ခင်းပြင်ပေါ်မှာ ဖျက်ထုတ်မှုတစ်ခုဖြစ်ခဲ့ပြီး ဒိုကူ ခုန်ရှောင်လိုက်လို့ ထိတွေ့မှုတော့ မရှိခဲ့ပါဘူး။ ဒိုကူက ဒိုင်ဗင်ပစ်လေ့ရှိတဲ့ကစားသမား မဟုတ်ပါဘူး။ သူတို့တွေ ဒီအချက်ကို သိထားသင့်ပေမယ့် နောက်ဆုံးရလဒ်က ဒါပါပဲ။ ကျွန်တော်လည်း ကွင်းလယ်ဒိုင်ဆီ ဒိုကူသာ ခုန်မရှောင်လိုက်ရင် ပြင်းပြင်းထန်ထန်ထိခိုက်သွားလိမ့်မယ်လို့ ပြောခဲ့ပါတယ်။ သူ့ကိုယ်သူကာကွယ်ဖို့ ခုန်ရှောင်လိုက်တာပါ။ ဒါပေမယ့် နောက်ဆက်တွဲဘာကိစ္စမှမဖြစ်ခဲ့တာကြောင့် ဒီအကြောင်းအရာကို ကျွန်တော့်ဆီ ဆက်မမေးကြပါနဲ့”လို့ ပြောပါတယ်။

အီတီဟတ်ကွင်းမှာ ဘရိုက်တန်နဲ့နှစ်ဂိုးစီသရေကျပြီးနောက် ပရီးမီးယားလိဂ်အမှတ်ပေးဇယားပဉ္စမနေရာမှာ မန်စီးတီးအသင်း ဆက်ရှိနေပြီး ချန်ပီယံလိဂ်ဝင်ခွင့်ရရှိဖို့အတွက် ဆက်လက်တိုက်ပွဲဝင်သွားရပါမယ်။  ပက်ဂွါဒီယိုလာကိုယ်တိုင်လည်း သူ့အသင်းမှာ ဖိအားတွေ ရှိနေတယ်လို့ အတိအလင်းဝန်ခံခဲ့ပါတယ်။

သူက “ ကိုးပွဲကျန်နေသေးတယ်ဆိုတော့ ဗိုလ်လုပွဲကိုးပွဲပေါ့။ ဒါပါပဲ။ အဆုံးမှာ မှန်ကန်တဲ့လမ်းကြောင်းဆီ ရောက်ရှိသွားလိမ့်မယ်လို့ ထင်ပါတယ်။ ကျွန်တော်ကတော့ အမြဲတမ်းယုံကြည်မှုအပြည့်ရှိပါတယ်။ အချို့အခိုက်အတန့်တွေမှာ ကျွန်တော်လည်း သံသယတွေ ရှိခဲ့ပေမယ့် မှန်ကန်တဲ့လမ်းကြောင်းကို ရှာဖွေဖို့ အမြဲတမ်းကြိုးစားခဲ့ပါတယ်။ ကွင်းတွင်းမှာရှိနေတဲ့ဖိအားကို ခင်ဗျားတို့လည်း ခံစားမိပါလိမ့်မယ်။ ကျွန်တော်တို့ ပိုကောင်းအောင်ကစားဖို့လိုအပ်ပြီး ပရိသတ်တွေကိုယ်တိုင်လည်း ဒါကိုပဲ လိုချင်ခဲ့ပါတယ်။ ဒါကြောင့် အတော်လေးဆိုးရွားလွန်းပါတယ်။ လူတိုင်းလည်း ဒါကို ခံစားမိပါလိမ့်မယ်”လို့ ပြောပါတယ်။

လာမယ့်မတ်လနိုင်ငံတကာသီတင်းပတ်အပြီး မန်စီးတီးက မတ် ၃၀ ရက်မှာ ဘုန်းမောက်နဲ့ အက်ဖ်အေဖလားကွာတားဖိုင်နယ်အဝေးကွင်းပွဲစဉ် ယှဉ်ပြိုင်ကစားရပါမယ်။