ဘာနာဒိုဆေးလ်ဗား မန်စီးတီးမှာ ဆက်နေမယ်ဆိုရင် ဝမ်းသာမိလိမ့်မယ်လို့ ပက်ဂွါဒီယိုလာပြောကြား
မန်စီးတီးနည်းပြ ပက်ဂွါဒီယိုလာက လာမယ့်နွေရာသီမှာ စာချုပ်သက်တမ်းကုန်တော့မယ့် ပေါ်တူဂီလက်ရွေးစင် ဘာနာဒိုဆေးလ်ဗားရဲ့ အနာဂတ်အပေါ် သူ့ရဲ့ ခံစားချက်ကို ရှင်းရှင်းလင်းလင်း ပြောကြားခဲ့ပါတယ်။
ဂွါဒီယိုလာရဲ့ နည်းပြသက်တမ်းနဲ့ အကြီးမားဆုံးအောင်မြင်မှုတွေရခဲ့တဲ့ ကာလမှာ ဆေးလ်ဗားဟာ အဓိကကစားသမားတစ်ဦးဖြစ်ခဲ့ပေမဲ့ ဘင်ဖီကာကို ပြန်ဖို့ ဒါမှမဟုတ် ဆော်ဒီကို ပြောင်းရွှေ့ဖို့ဆိုတဲ့ သတင်းတွေ ဆက်လက်ထွက်ပေါ်နေဆဲဖြစ်ပါတယ်။ Fabrizio Romano ရဲ့ အဆိုအရ စာချုပ်သက်တမ်းတိုးဖို့ ဆွေးနွေးမှုတွေ မရှိသေးဘဲ ဆေးလ်ဗားဟာ ၂၀၂၆ ခုနှစ်မှာ အလွတ်ပြောင်းရွှေ့ကြေးနဲ့ ထွက်ခွာသွားနိုင်တဲ့ ကြီးမားတဲ့ဖြစ်နိုင်ခြေရှိနေပါတယ်။
ဒီလိုပြောဆိုမှုတွေကြောင့် ပေါ်တူဂီကြယ်ပွင့်ဟာ အီတီဟတ်ကွင်းမှာ ဆက်နေပြီး အသင်းခေါင်းဆောင်အဖြစ် ဆက်လက်တာဝန်ယူဖို့ မျှော်လင့်နေတဲ့ မန်ချက်စတာစီးတီးပရိသတ်တွေကြားမှာ ထင်ကြေးပေးမှုတွေ ပိုများလာစေခဲ့ပါတယ်။ စက်တင်ဘာလကုန်ပိုင်းက ပြုလုပ်ခဲ့တဲ့ သတင်းစာရှင်းလင်းပွဲမှာ ဘာနာဒိုဆေးလ်ဗားက သူ့ရဲ့အနာဂတ်အကြောင်း အရိပ်အမြွက်ပြောကြားခဲ့ပါတယ်။
ဘာနာဒိုက"ကျွန်တော် ဘာလုပ်မယ်ဆိုတာ အတိအကျသိပါတယ်။ ဒါပေမဲ့ အခုပြောဖို့ အချိန်မကျသေးပါဘူး။ အခုအချိန်က မန်စီးတီးမှာ အာရုံစိုက်ဖို့နဲ့ ကလပ်ကို သူ့နေရာနဲ့သူ ပြန်ရောက်အောင် အကောင်းဆုံးကြိုးစားဖို့ အချိန်ပါပဲ။ ကျွန်တော့်စာချုပ်နဲ့ပတ်သက်ပြီး ကျွန်တော် တကယ်အာရုံစိုက်နေတာက တရားဝင်ရာသီတစ်ခုကို ကောင်းနိုင်သမျှကောင်းအောင် ကစားဖို့နဲ့ အသင်းနဲ့ကလပ်ကို သူတို့နဲ့ထိုက်တန်တဲ့အဆင့်ကို ပြန်ရောက်အောင် လုပ်ဖို့ပါပဲ"လို့ ပြောကြားခဲ့ပါတယ်။
ဘာနာဒိုဆေးလ်ဗားဟာ ၂၀၂၅-၂၆ ရာသီအတွက် အသင်းခေါင်းဆောင်အဖြစ် ခန့်အပ်ခံရပြီးနောက် သူ့ရဲ့ အရေးပါမှုဟာ ပိုမိုမြင့်တက်လာခဲ့ပါတယ်။ ဂွါဒီယိုလာက"ကျွန်တော် ဘာနာဒိုအတွက် အကောင်းဆုံးဖြစ်စေချင်ပါတယ်။ သူဆက်နေချင်တယ်ဆိုရင် ကျွန်တော် အရမ်းပျော်ရွှင်ဝမ်းသာပါလိမ့်မယ်။ ဒါပေမဲ့ ကျွန်တော် သူ့ကို ဒီအကြောင်းအရာနဲ့ပတ်သက်ပြီး စကားမပြောပါဘူး၊ သူ့မိသားစုအတွက် အကောင်းဆုံးဖြစ်စေချင်ပါတယ်။
သူဒီမှာ ၉ နှစ်ရှိပါပြီ။ နောက်ဆုံးမှာတော့ သူကလပ်နဲ့အတူ ဘာအကောင်းဆုံးလဲဆိုတာကို ဆုံးဖြတ်မှာပါ"လို့ ပြောခဲ့ပါတယ်။
