အသက် ၂၃ နှစ်အရွယ် ဂိုးသမားဟာ လာလီဂါမှာ နောက်ထပ် နာမည်ကောင်းရစေမယ့် ရာသီတစ်ခုကို ပိုင်ဆိုင်ထားပြီး ဥရောပရဲ့ အကောင်းဆုံး လူငယ်ဂိုးသမားတွေထဲက တစ်ဦးအဖြစ် သတ်မှတ်ခံထားရပါတယ်။ အာဆင်နယ်အသင်းဟာ ပြီးခဲ့တဲ့ နွေရာသီမှာ ဂါစီယာကို ခေါ်ယူဖို့ ကြိုးစားခဲ့ပေမယ့် သူ့ရဲ့ ပြောင်းရွှေ့ကြေး ပေါင် ၂၃.၄ သန်းကို ပေးချေဖို့ ဆန္ဒမရှိခဲ့ပါဘူး။

အဲဒီအစား ဂန်းနားတို့ဟာ ဘုန်းမောက်ကနေ အတွေ့အကြုံရှိတဲ့ နီတိုကို အငှားနဲ့ ခေါ်ယူခဲ့ပေမယ့် ဘရာဇီးသားဟာ ပွဲအနည်းငယ်သာ ကစားခဲ့ရတာကြောင့် အပြီးသတ်ခေါ်ယူဖို့ အလားအလာနည်းပါးနေပါတယ်။ ဒေးဗစ် ရာယာဟာ အာဆင်နယ်ရဲ့ အဓိက ဂိုးသမားအဖြစ် ဆက်လက်တည်ရှိနေပေမယ့် လူငယ်ဂိုးသမားတွေဖြစ်တဲ့ ဂျက် ပေါ်တာနဲ့ တော်မီ ဆက်ဖို့ဒ်တို့ဟာ အသင်းကြီးထံရောက်ဖို့ အဆင်သင့်မဖြစ်သေးတာကြောင့် အာတီတာဟာ ဒီနွေရာသီမှာ ပြိုင်ဆိုင်မှုပေးနိုင်တဲ့ အတွေ့အကြုံရှိ အရန်ကစားသမားတစ်ဦးကို ခေါ်ယူဖို့ စိတ်အားထက်သန်နေဖွယ်ရှိပါတယ်။

ဂါစီယာအနေနဲ့ စိန်ခေါ်မှုအသစ်ကို ရှာဖွေလိုစိတ်ရှိမယ်ဆိုရင် အက်စ်ပန်ညိုအသင်းက သူ့ကို တားဆီးဖို့ မဖြစ်နိုင်ဘဲ နည်းပြ ဂွန်ဇာလက်ဇ်ကလည်း ရာသီကုန်အထိ သူဆက်နေမယ်လို့ အာမခံချက်မပေးနိုင်ဘူးလို့ ဝန်ခံခဲ့ပါတယ်။ “နောက်ရာသီမှာ သူ အက်စ်ပန်ညိုမှာ ဆက်နေမယ်လို့ ကျွန်တော် အာမခံလို့မရပါဘူး။ သူ ဘယ်အဆင့်မှာရှိနေလဲဆိုတာ သင်တို့အားလုံး မြင်တွေ့နေရတာပဲလေ အဲဒါက အဲဒီလိုပဲ” လို့ သူက ပြောကြားခဲ့ပါတယ်။

ဂါစီယာဟာ နွေရာသီအပြောင်းအရွှေ့ဟာ နှစ်ဖက်စလုံးအတွက် အကျိုးရှိမယ်လို့ သူယုံကြည်ကြောင်း အရင်ကအတည်ပြုပြောကြားခဲ့ဖူးပြီး အခုဆိုရင် သူ အက်စ်ပန်ညိုကနေ ထွက်ခွာမယ်ဆိုရင် အကောင်းဆုံးနည်းလမ်းနဲ့ ထွက်ခွာမယ်လို့ ပြောကြားခဲ့ပါတယ်။ “လောလောဆယ် ကျွန်တော် အနာဂတ် အကြောင်း မစဉ်းစားသေးပါဘူး၊ ဒါပေမဲ့ ဘယ်တော့မှ မသိနိုင်ပါဘူး။ အဲဒါဖြစ်လာရင် အကောင်းဆုံးနည်းလမ်းနဲ့ ဖြစ်ပါစေ” လို့ သူက Estadio Deportivo ကို ပြောကြားခဲ့ပါတယ်။

“နောက်ဆုံးမှာ ကျွန်တော် ထွက်ခွာရမယ်ဆိုရင် ဘယ်လိုလုပ်ပြီး ကောင်းကောင်း နှုတ်ဆက်လို့ မရမှာလဲ။ အက်စ်ပန်ညိုက ကျွန်တော့်ကို အရာရာပေးခဲ့တဲ့ ကလပ်ပါ။ကျွန်တော် နောက်တံခါးကနေ ထွက်သွားရင် ကောင်းမှာမဟုတ်ဘူး” လို့ ဂါစီယာက ဆိုပါတယ်။ ဂါစီယာဟာ ဇန်နဝါရီ အပြောင်းအရွှေ့နောက်ဆုံးရက်တွေမှာ သူထွက်ခွာသွားရင် ‘အားလုံးအတွက် ကောင်းမယ်’ လို့ အခိုင်အမာပြောကြားခြင်းဖြင့် အက်စ်ပန်ညိုအသင်းအား ရောင်းချဖို့ ဖိအားပေးနေပုံရပါတယ်။

သူက Mundo Deportivo သို့ “ကျွန်တော်က ဘယ်အရာနဲ့မဆို အေးစက်တဲ့လူတစ်ယောက်ပါ၊ ပြီးတော့ ဒီစိတ်ထားက ကျွန်တော့်ကို အကူအညီပေးတယ်လို့ ထင်ပါတယ်။ကျွန်တော် အက်စ်ပန်ညိုမှာ အရမ်းတည်ငြိမ်အေးဆေးပြီး ကျွန်တော် အချိန်အကြာကြီး စောင့်ဆိုင်းခဲ့ရတဲ့ အခွင့်အရေးတစ်ခုကို ရရှိထားပါတယ်။ “ကျွန်တော်ထွက်သွားရင် အားလုံးအတွက် ကောင်းလိမ့်မယ်။ ကျွန်တော့်အတွက်ရော ကျွန်တော့်ကို ကြီးပြင်းလာအောင် ပြုစုပျိုးထောင်ပေးခဲ့တဲ့ ကလပ်အတွက်ပါပဲ။ တခြားနည်းလမ်း မဖြစ်နိုင်ပါဘူး” လို့ ပြောကြားခဲ့ပါတယ်။