ဆိုစီဒက်နဲ့ ကိုပါဒယ်ရေးဆီမီးဖိုင်နယ်မှာ အရေးပါတဲ့ဂိုးသွင်းယူနိုင်ခဲ့ပြီးနောက် ရီးရဲလ်စတား အန်းဒရစ်ခ်က အနာဂတ်နဲ့ပတ်သက်ပြီး ထုတ်ဖော်ပြောကြားလိုက်ပါတယ်။ ဆိုစီဒက်ကို ၂ ကျော့ပေါင်းရလဒ် ၅-၄ နဲ့ အနိုင်ရပြီးနောက် ရီးရဲလ်အသင်းဟာ ကိုပါဒယ်ရေးဖို်င်နယ်ကို တက်ရောက်နိုင်ခဲ့ပါတယ်။ ဒုတိယအကျော့ကို ဘာနေဗျူးမှာကန်ခဲ့ရပြီး ရူဒီဂါရဲ့ခေါင်းတိုက်ဂိုးကြောင့် ၄-၄ သရေကျခဲ့တဲ့အနေအထားမှာ အချိန်ပိုအထိဆက်သွားခဲ့ရပါတယ်။

ဆိုစီဒက်နဲ့နိုင်ပွဲမှာ အန်းဒရစ်ခ်တစ်ယောက် စွမ်းဆောင်ရည်ကောင်းတွေပြသနိုင်ခဲ့ပြီး ၃၀ မိနစ်မှာ ဂိုးသွင်းယူနိုင်ခဲ့ပါတယ်။ အဆိုပါဂိုးကြောင့် အန်းဒရစ်ခ်ဟာ သမိုင်းမှတ်တိုင်တစ်ခုစိုက်ထူနိုင်ခဲ့ပြီး ၂၀၁၃ ရော်နယ်ဒိုနောက်ပိုင်း ကိုပါဒယ်ရေးပြိုင်ပွဲတစ်ခုတည်းမှာ ၅ ဂိုးသွင်းယူနိုင်တဲ့ ပထမဆုံးကစားသမားဖြစ်လာခဲ့ပါတယ်။ ပွဲအပြီးမှာ အန်းဒရစ်ခ်က သူ့အနာဂတ်နဲ့ပတ်သက်ပြီး ပြောကြားခဲ့သလို အသင်းမှာဆက်ရှိနေမယ်လို့ အတည်ပြုခဲ့ပါတယ်။

“ကျွန်တော် မက်ဒရစ်ကစားသမားဖြစ်ရတာကို ချစ်မြတ်နိုးပါတယ်။ ဒီမှာကစားရတာကိုလည်း နှစ်သက်ပါတယ်။ ဒီအသင်းကို ချစ်ပါတယ်။ ကျွန်တော် သင်ယူပြီး တိုးတက်အောင်လုပ်ဆောင်ချင်သလို အသင်းကိုလည်း ကူညီချင်ပါတယ်ကျွန်တော် ဒီမှာမိနစ်တိုင်းပါဝင်ချင်ပါတယ်။ ကျွန်တော်ဘောလုံးကစားချင်သလို ဒီမှာတစ်ဘဝလုံးကုန်ဆုံးချင်ပါတယ်။ အခွင့်အရေးရလာခဲ့ရင် အသုံးချချင်ပါတယ်။

ကမ္ဘာ့အကောင်းဆုံးအသင်းမှာကန်ရတာက ခက်ခဲပါတယ်။ ကျွန်တော် အခွင့်အရေးရလာခဲ့ရင် ဂိုးသွင်းယူနိုင်ဖို့ ကြိုးစားပါတယ်။ အခုလိုအသင်းကိုကူညီပေးနိုင်လို့ ပျော်ရွှင်မိပါတယ်။ဒီမှာက ဗင်နီ ၊ ဘာပေ ၊ ရိုဒရီဂို ၊ ဘယ်လင်ဟမ်တို့လို ကမ္ဘာ့အကောင်းဆုံးကစားသမား ၄ ဦးရှိနေပါတယ်။ ကျွန်တော်က ဘာမှမဟုတ်သေးပါဘူး။ ကျွန်တော် အကောင်းဆုံးလုပ်ဆောင်နေပါတယ်။ ကွင်းထဲမှာ ဘယ်သူကပဲ ပွဲထွက်ခွင့်ရရ ပြဿနာမဟုတ်ပါဘူး”လို့ အန်းဒရစ်ခ်က ပြောကြားခဲ့ပါတယ်။ 

ကိုပါဒယ်ရေးဖိုင်နယ်တက်ရောက်နိုင်ခဲ့ပြီးနောက် ရီးရဲလ်အသင်းဟာ လာလီဂါ နဲ့ ချန်ပီယံလိဂ်ကို ပြန်လည်အာရုံစိုက်ရမှာဖြစ်ပါတယ်။ လာမယ့်ဧပြီလ ၅ ရက်နေ့မှာ ရီးရဲလ်အသင်းဟာ ဗလန်စီယာနဲ့ လာလီဂါပွဲကန်ရမှာဖြစ်ပြီး အဲ့နောက် အာဆင်နယ်နဲ့ ချန်ပီယံလိဂ်ပထမအကျော့ကန်ရမှာဖြစ်ပါတယ်။