အမေရိကန်နိုင်ငံမှာကျင်းပဖို့စီစဉ်ထားတဲ့ ပြိုင်ပွဲဝင်ကလပ်အသင်း ၃၂ ခုပါဝင်မယ့် ကလပ်ကမ္ဘာ့ဖလားပြိုင်ပွဲရဲ့ ချန်ပီယံအသင်းကို ဆုကြေးငွေဒေါ်လာ ၁၂၅ သန်းအထိ ချီးမြှင့်မယ်လို့ ကမ္ဘာ့ဘောလုံးအဖွဲ့ချုပ်(ဖီဖာ)က ဗုဒ္ဓဟူးနေ့မှာ ကြေညာခဲ့ပါတယ်။ ဇွန် ၁၄ ရက်မှ ဇူလိုင် ၁၃ ရက်အထိကျင်းပမယ့်ပြိုင်ပွဲအတွက် စုစုပေါင်းဆုကြေးငွေဒေါ်လာ တစ်ဘီလျံအထိ ရှိမယ်လို့ ဖီဖာက အခုလအစောပိုင်းမှာ ထုတ်ပြန်ခဲ့ပါတယ်။ ဒါက လက်တလောအခိုက်အတန့်မှာ ကလပ်အသင်းတွေအတွက် ဘဏ္ဍာရေးစည်းမျဉ်းအရ အရေးပါမယ့်ခြေလှမ်းတစ်ရပ်လည်း ဖြစ်လာနိုင်ပါတယ်။

ဖီဖာဥက္ကဋ္ဌအင်ဖန်တီနိုက “ ကမ္ဘာ့ဘောလုံးအဖွဲ့ချုပ်ကတော့ ဒီပြိုင်ပွဲအတွက်ရရှိတဲ့ငွေကြေးတွေကို ထိန်းသိမ်းသွားဖို့ မရှိပါဘူး။ ရရှိလာတဲ့ဝင်ငွေအားလုံးကို ကလပ်ဘောလုံးအသင်းတွေဆီ ခွဲဝေပေးသွားပါမယ်။ ဒါက ဖီဖာအဖွဲ့ဝင်ဘောလုံးအဖွဲ့ချုပ် ၂၁၁ ခုမှတဆင့် ကမ္ဘာ့ဘောလုံးလောကဖွံ့ဖြိုးတိုးတက်ရေးအတွက် သုံးစွဲမယ့် ဖီဖာရဲ့အရန်ငွေတွေကိုလည်း ထိခိုက်စေမှာမဟုတ်ပါဘူး”လို့ ပြောပါတယ်။

ဒါကြောင့် အခုဒေါ်လာတစ်ဘီလျံရဲ့ထက်ဝက်ခန့်ပမာဏကို ပြိုင်ပွဲဝင်ကလပ်အသင်း ၃၂ ခုဆီ ခွဲဝေပေးသွားပါလိမ့်မယ်။ ကလပ်အသင်းတစ်ခုအတွက် ရရှိနိုင်မယ့်ပမာဏကိုတော့ အားကစားနဲ့ စီးပွားရေးစံနှုန်းတွေကို အခြေခံကာ သတ်မှတ်ပေးပါလိမ့်မယ်။ ဥပမာ- မန်စီးတီး၊ ရီးရဲလ်မက်ဒရစ်တို့လို ကလပ်အသင်းကြီးတွေက ကလပ်အသင်းငယ်တွေထက် ဆုကြေးငွေပိုမိုရရှိနိုင်ပါတယ်။

နောက်ထပ်ဆုကြေးငွေ ၄၇၅ သန်းကိုတော့ ပြိုင်ပွဲကာလစွမ်းဆောင်ရည်ပိုင်းကိုအခြေခံကာ ချီးမြှင့်သွားပါလိမ့်မယ်။ ဥပမာအားဖြင့် အများဆုံးခုနစ်ပွဲအထိ ကစားရနိုင်ခြေရှိတဲ့ပြိုင်ပွဲမှာ နိုင်ပွဲအများဆုံးရှာဖွေနိုင်တဲ့ ကလပ်အသင်းတစ်ခုအတွက် အမြင့်ဆုံးဆုကြေး ၁၂၅ သန်းအပြင် ငွေသားပမာဏများစွာကို ပိုမိုစုဆောင်းသွားနိုင်ပါလိမ့်မယ်။ အင်္ဂလန်အသင်းခေါင်းဆောင်ဟယ်ရီကိန်းအပါအဝင် ကစားသမားတွေနဲ့ နည်းပြတွေက ကလပ်ကမ္ဘာ့ဖလားပုံစံသစ်ကြောင့် ဘောလုံးရာသီတစ်ခုနဲ့တစ်ခုအကြား အနားယူချိန်ရှားပါးလာမှုနဲ့အတူ ကစားသမားတွေရဲ့လက်ငင်းအကျိုးစီးပွားအပေါ် စိုးရိမ်မိတယ်လို့ သုံးသပ်လာကြပါတယ်။

အခုသီတင်းပတ်အတွင်း ဟယ်ရီကိန်းက “ အမှန်ပါပဲ၊ အားလပ်ရက်မရှိနိုင်တဲ့ နောက်ထပ်နွေရာသီကာလတစ်ခု ဖြစ်ပါတယ်။ ဒါမျိုးတွေနဲ့ ကျွန်တော်တို့တွေ ကျင့်သားရနေပြီလို့ ထင်ပါတယ်။ ဒီလိုကိစ္စတွေနဲ့ပတ်သက်လို့လည်း ကျွန်တော်တို့လုပ်နိုင်တာ ဘာမှမရှိပါဘူး”လို့ ဆိုပါတယ်။ ဒါပေမယ့် FIFA ဝက်ဘ်ဆိုဒ်နဲ့တွေ့ဆုံချိန် ပြိုင်ပွဲကာလအတွင်း သူ့ရဲ့ရည်မှန်းချက်ကို ရှင်းပြရာမှာ ဘိုင်ယန်မြူးနစ်တိုက်စစ်မှူးက “ အနိုင်ရဗိုလ်စွဲဖို့ပါပဲ။ ကျွန်တော်တို့တွေက ကမ္ဘာ့အကောင်းဆုံးအသင်းတွေထဲမှာ ပါဝင်တယ်ဆိုတာ သံသယမရှိလိုက်ပါနဲ့။ ဒါကြောင့် ပြိုင်ပွဲတိုင်းကို အနိုင်ရဗိုလ်စွဲဖို့ဆိုတဲ့အတွေးအခေါ်မျိုးနဲ့ပဲ ပါဝင်ယှဉ်ပြိုင်ပါတယ်”လို့ ပြောပါတယ်။