စီရော်နယ်ဒိုရဲ့သွင်းဂိုးစံချိန်ကို လိုက်မီနိုင်ပြီးနောက် အမ်ဘာပေဟာ ပေါ်တူဂီကြယ်ပွင့်ရဲ့ဂန္တဝင်မြောက်မှုကို ထပ်မံတုပနိုင်ဦးမယ့်ကစားသမားလို့ အန်ဆယ်လော့တီ ယုံကြည်နေပါတယ်။ လွန်ခဲ့တဲ့နွေရာသီကာလအတွင်း ရီးရဲလ်မက်ဒရစ်ဆီ ပြောင်းရွှေ့ကာ အိပ်မက်တွေကို အကောင်အထည်ဖော်နိုင်ခဲ့တဲ့ ပြင်သစ်တိုက်စစ်မှူးက လာလီဂါပွဲဦးထွက်ရာသီမှာ ၂၇ ပွဲကစား၊ ၂၂ ဂိုးသွင်းယူပြီး စွမ်းဆောင်ရည်ကောင်းတွေ ပြသထားပါတယ်။ ဒါ့အပြင် သူက ချန်ပီယံလိဂ်ပြိုင်ပွဲမှာလည်း ခုနစ်ဂိုးသွင်းယူပြီး ရီးရဲလ်မက်ဒရစ်ရဲ့ကွာတားဖိုင်နယ်ခရီးလမ်းမှာ အဓိကကျသူအဖြစ် ပါဝင်ခဲ့ပါတယ်။

ပြီးခဲ့တဲ့စနေနေ့၊ လီဂါနက်စ်ကို ၃-၂ ဂိုးဖြင့် အနိုင်ယူခဲ့တဲ့ Comeback ပွဲစဉ်မှာ ရီးရဲလ်မက်ဒရစ်အတွက် အမ်ဘာပေက နှစ်ဂိုးသွင်းယူပေးခဲ့ပါတယ်။ အဲ့ဒီသွင်းဂိုးနှစ်ဂိုးကြောင့်ပဲ သူက ရီးရဲလ်မက်ဒရစ်ကစားသမားဘ၀ ပွဲဦးထွက်ရာသီမှာ ၃၃ ဂိုးအထိ သွင်းယူနိုင်တဲ့ စီရော်နယ်ဒိုရဲ့စံချိန်ကို လိုက်မီသွားပြီး အစောပိုင်းကာလရုန်းကန်ခဲ့ရမှုတွေကို ချေဖျက်ပြနိုင်ခဲ့ပါတယ်။

သတင်းထောက်တွေနဲ့တွေ့ဆုံချိန် အန်ဆယ်လော့တီက “ ဒါက ခက်ခဲပါတယ်။ ဒါပေမယ့် ရီးရဲလ်မက်ဒရစ်မှာ စီရော်နယ်ဒို ကာလရှည်လုပ်ပြခဲ့တဲ့ပုံစံမျိုး အမ်ဘာပေ လုပ်နိုင်ပါစေလို့ ဆုတောင်းပေးပါတယ်။ ဒါတော့ သေချာပါတယ်။ သူ့မှာ အဲ့ဒီလိုမျိုးလုပ်ပြနိုင်မယ့် အရည်အသွေးတွေ ရှိပါတယ်။ သူ့ကို ဒီကလပ်အသင်းရဲ့ ဂန္တဝင်ပုဂ္ဂိုလ်တစ်ဦးဖြစ်လာဖို့ မျှော်လင့်ထားပါတယ်။ အမ်ဘာပေ လုပ်နိုင်မှာပါ။ ဒီကလပ်အသင်းမှာ စီရော်နယ်ဒိုရဲ့သက်ရောက်မှုက သွင်းဂိုးတွေထက် အများကြီးပိုမိုခဲ့ပါတယ်”လို့ ဆိုပါတယ်။

အမ်ဘာပေက ရီးရဲလ်မက်ဒရစ်အသင်းသမိုင်းတလျှောက် ပွဲဦးထွက်ရာသီမှာ ဂိုးအများဆုံးသွင်းယူနိုင်ခဲ့တဲ့ ဇာမိုရာနိုရဲ့စံချိန်ကို အမီလိုက်နိုင်ဖို့ နောက်ထပ်သွင်းဂိုးလေးဂိုးမျှသာ လိုအပ်ပါတော့တယ်။ ချီလီတိုက်စစ်မှူးက ၁၉၉၂-၁၉၉၃ ဘောလုံးရာသီမှာ ၃၇ ဂိုးအထိ သွင်းယူခဲ့ပြီး အမ်ဘာပေအတွက် လက်ကျန်ဘောလုံးရာသီကာလအတွင်း လိုက်မီနိုင်ဖို့ ကြိုးစားရမယ့် မှတ်တိုင်တစ်ရပ်ဖြစ်ပါတယ်။

အမ်ဘာပေက ဒီည၊ ဆိုစီဒက်နဲ့ရင်ဆိုင်ရမယ့် ရီးရဲလ်မက်ဒရစ်ရဲ့ကိုပါဒယ်လ်ရေးဖလားဆီမီးဖိုင်နယ်ဒု-ကျော့ ပွဲစဉ်မှာ ပါဝင်ကစားသွားပါလိမ့်မယ်။ အန်ဆယ်လော့တီရဲ့အသင်းက ပထမအကျော့ပွဲစဉ်အပြီး ၁-၀ ဂိုးဖြင့် ပြိုင်ဘက်အပေါ် ကျဉ်းမြောင်းစွာဦးဆောင်ထားနိုင်သလို အမ်ဘာပေကလည်း ရီးရဲလ်မက်ဒရစ်သမိုင်းမှာ မှတ်တိုင်သစ်တစ်ခုစိုက်ထူနိုင်ဖို့အတွက် သူ့ရဲ့သွင်းဂိုးမှတ်တမ်းကို ဆက်လက်တိုးမြှင့်သွားဖို့ မျှော်လင့်နေပါလိမ့်မယ်။